إيه اللي بيحصل في سوق الحديد؟.. وليه الأسعار زادت 80% في سنة واحدة ؟
هو ايه اللى بيحصل فى سوق حديد التسليح فى مصر؟ وليه الأسعار زادت فى اخر سنة بس بحوالى 80% ؟ والحكومة فين من اللى بيحصل ؟ وايه تأثير الارتفاع الكبير ده على اسعار الشقق والعقارات ؟ وهل فيه علاقة بين جنون الدهب ودولار السوق السودا اللى وصل لمستويات قياسية فى الساعات الأخيرة؟
فى الساعات الأخيرة قفز سعر حديد التسليح في مصر تسليم أرض المصنع بنحو 80% على أساس سنوي ووصل خلال يناير الجاري إلى 49 ألف جنيه للطن مدفوع بضغوط شح العملة الصعبة وتراجع الطاقة الإنتاجية للمصانع بصورة كبيرة
ووفقا لعدد كبير من اللى شغالين في قطاع الحديد فأغلب المصانع الكبيرة شغالة بنص طاقتها الإنتاجية حالياً بسبب صعوبات استيراد المواد الخام اللازمة للعملية الإنتاجية.. بالاضافة كمان لتسعير دولار الحديد عند مستوى حوالى 64 جنيه
وانخفض إنتاج مصر من حديد التسليح خلال 2023 بنحو 4% إلى 8.047 مليون طن، بحسب وثيقة حكومية حديثة أظهرت انخفاض حجم المبيعات بحوالي 17.7% إلى 6.5 مليون طن.
وبيبلغ عدد مصانع حديد التسليح في مصر 14 مصنع أبرزها "مجموعة حديد عز"، و"بشاي للصلب"، و"السويس للصلب"، و"حديد المصريين".
ورغم ان البيانات الرسمية بتشير لتراجع مبيعات حديد التسليح في الأسواق خلال 2023 الا ان سعر الحديد بيرتفع بصورة جنونية بسبب زيادة الطلب من قبل القطاع الخاص والأفراد وتحديداً خلال الربع الأخير من العام الماضي ، بعدما صدر قانون التصالح على البناء واللي تضمّن تسهيلات كبيرة من بينها إجازة التصالح على المباني المقامة على خط التنظيم.
وبيرجع السبب الرئيسي وراء ارتفاع سعر حديد التسليح، إلى ارتباط الحديد بمكون أجنبي، وارتفاع سعر الدولار مقابل الجنيه بالإضافة الى أن مدخلات الإنتاج في صناعة الحديد مستوردة من الخارج مع وزيادة تكاليف أسعار الشحن واللي أدت لصعود سعر الطن كما هو الحال حاليا
والى جانب العوامل اللى فاتت فيه كمان استغلال من الشركات والمصنعين لحالة الفوضى الموجودة ومعظم الاسعار اللى بتعلن اسعار تحوطية بتحط فى حساباتها امكانية ارتفاع قيمة الدولار مستقبلا وانخفاض قيمة العملة المصرية وده اللى مخلى الاسعار توصل للارقام الصعبة اللى بنسمع عنها كل يوم من شركات حديد التسليح.
كمان الرقابة على الاسواق غايبة بصورة واضحة وجهاز حماية المستهلك واقف زينا بيتفرج على اللى بيحصل من غير ما يستخدم أدواته لضبط السوق او حتى يوجه رسالة للمصنعين ان اللى بيحصل ده مش هيكون مسموح بيه خصوصا ان جزء من السعر المعلن أربح بتدخل جيوب اصحاب المصانع والشركات من غير اى تكلفة انتاجية
