صدمة جديدة للمواطنين.. ارتفاع اسعار اللحوم في الاسواق

كل المؤشرات بتقول ان سنة 2024 ستكون سنة صعبة علي المواطنين، والاسعار هترتفع فيها بشكل كبير، وكانت البداية بزيادة اسعار تذاكر مترو الانفاق وبعدها زيادة اسعار باقات الانترنت، وجه بعدها قرار اسعار شرائح الكهرباء، واخيرا اسعار اللحوم اللي شهدت هيا كمان زيادة في الاسعار.. يا تري الزيادة دي وصلت لكام وهل في مناطق معينة ولا في كل المحافظات واية اسباب الزيادة دي وهيكون سعر الكيلو كام في شهر رمضان.

اسعار السلع في مصر واحدة من الحاجات اللي ملهاش ضابط ولا رابط، والتجار بيتحكموا فيها براحتهم، ودي كانت واحدة من النقط الاساسية اللي ثار فيها اعضاء مجلس النواب علي الدكتور علي مصليحي وزير التموين والتجارة الداخلية، وقت وقفته تحت قبه البرلمان للرد علي طلبات الاطاحة اللي قدمها النواب واللي وصل عددها 98 طلب احاطة، لمعرفة اسباب الارتفاع الجنوني في الاسعار وغيرها من التفاصيل اللي بشكل كبير هتكون سبب في رحيل وزير التموين الحالي عن تشكيل الحكومة في الفترة الرئاسية الجديدة.
الدكتور علي مصيلحي اللي وقف مهموم تحت قبة البرلمان ومعرفش يرد علي اعضاء مجلس النواب واللي طالبوه بتقديم استقالته والرحيل من الحكومة بعد فشله في السيطرة علي الاسواق ده غير المشاكل الموجودة في توزيع دقيق المخابز والحذف العشوائي للمواطنين من بطاقات التموين وقالوه الناس في الشارع بتدعي عليك.
وزير التموين قعد يسرد لأعضاء مجلس النواب اسباب ارتفاع اسعار السلع ورمي المشكلة علي مجلس الوزراء، وقال هو المسئولة عن الارتفاع الموجود في اسعار السلع دلوقتي، وقال للنواب «ادوني فلوس اشتري سلع وانا هضبط الاسعار في السوق النهاردة، واللي حصل دلوقتي نتيجة نقص في السلع خصوصا السلع اللي بنستورها من برده» ورد عليه المستشار حنفي الجبالي رئيس مجلس النواب وقاله: «انت حضرتك جاي النهاردة تدينا حلول مش تصدر لنا مشاكل».
واضح ان محاكمة وزير التموين تحت قبة البرلمان مجابتهش همها، وكملت السلع ارتفاعتها، وكان اخرها اسعار اللحوم اللي ارتفعت من 15 الي 45 جنيهًا، ووصل سعر كيلو اللحوم البلدي لـ 400 جنيه في بعض المناطق.
صدام أبو حسين نقيب الفلاحين، قال إن سعر كيلو اللحم البلدي هيرتفع الفترة اللي جاية وهيوصل رسمي لـ 400 جنيه وهيدعي السعر ده في بعض المناطق، وده بسبب العجز الموجود عندنا في تربية الثروة الحيوانية واللي بيوصل 40% من تغطية احتياجات السوق المحلي، وحذر من ارتفاع اسعار اللحوم اكثر واكثر مع دخول شهر رمضان، وطالب الدولة بالتدخل حاليا وزيادة استيراد كميات كبيرة من اللحوم لسد العجز الموجود.

شلبي جابر عضو شعبة القصابين بالغرفة التجارية بمحافظة القاهرة؛ أكد لـ«بانكير»، أن أن أسعار اللحمة رفعت قبل أوانها اللي المفترض يكون علي عيد الاضحي المبارك، وبدأت أسعار اللحوم في الزيادة علي الرغم من ركود حالات البيع في محالات الجزارة وضعف الاقبال من المواطنين لشراء اللحوم بسبب الظروف الاقتصادية اللي بيمر بيها الناس.

عضو شعبة القصابين بالغرفة التجارية بمحافظة القاهرة قال لـ«بانكير»، أن اسعار اللحوم ارتفعت 10 جنيهات في فترة احتفالات رأس السنة واعياد الكريسماس، وقدم 3 اسباب لارتفاع الاسعار اولهم ضعف الاهتمام بمشروع البتلو، وثانيهم نقص زراعة الذرة خصوصا مع ارتفاع أسعار الأعلاف المستوردة، واخيرًا ارتفاع ذبح إناث الماشية لتعويض انواع الذكورة المخصصة للذبح لتغطية احتياجات السوق.

عضو الشعبة قال أن سعر كيلو اللحم القائم بيوصل الي 150 جنيها، وبيترواح سعره من 240 الي 250 جنيه في المذابح وبيوصل للمستهلك بسعر 350 جنيه في المناطق الشعبية، وبيعدي 450 جنيه في المناطق الراقية.