تفاصيل المؤامرة الكبرى على الجنيه

هو ليه فيه قنوات عربية ومنصات رقمية كتيرة مالهاش سيرة غير الدولار؟ وازاى منصات وشاشات خليجية نصبوا نفسهم كمتحدث رسمي باسم السوق السودا للعملة فى مصر؟ وايه وجه استفادت القنوات دي من اغتيال الجنيه واشعال أزمة الدولار؟ وليه بيسعروا العملة الأمريكية بمزاجهم ؟ وبيجيبوا الأسعار اللى بيقولوها منين؟

فيه ظاهرة غريبة بقت منتشرة بقوة فى الايام اللى فاتت..  ومحدش فاهم ايه اللى بيحصل وليه  ومين المستفيد..

والظاهرة دي بتقودها منصات كتير نصبت نفسها كمتحدث رسمي باسم السوق السودا لصرف العملات فى مصر .. ورغم ان السوق دي مش شرعية الا ان فيه مواقع وصحف وقنوات ما بتعملش حاجة على مدار اليوم غير بتنقل اخبارها وبتروج للشائعات اللى بيطلعها المضاربين وتجار العملة وده بيؤدي بشكل مباشر الى اشعال أزمة الدولار وارتفاع سعره بشكل ملحوظ لدجة ان سعر العملة المريكية قرب من مستويات ال 60 جنيه

الغريبة ان المذيعين والصحفيين اللى شغالين فى المنصات دي بيطلعوا كل يوم يقولوا اسعار للدولار بمزاجهم من غير ما يسندوا الخبر لمصدر أو حد معروف وبيكتفوا بعبارة فضفاضة  بتقول متعاملين فى السوق الموازية أو مصادر بدون ما يذكروا أسماء وطبعا دي لعبة معروفة بيلعبها الاعلام لما يكون عاوز يمرر حاجة من غير ما يقع فى مشاكل قانونية

وفى الحالات اللى زي دي لازم تسأل مين المستفيد من اغتيال الجنيه ومين من مصلحته ان سعر العملة المصرية ينخفض وليه وقتها هتعرف المنصات دي ليه بتهاجم مصر وليه بستهدف اشعال أزمة الدولار .. ولو صادف وجه قدامك فيديو أو خبر من نوعية الاخبار دي تقدر بسهولة جدا تعرف توجهات كل قناة وايه المصالح اللى بتخدم عليها ومين الدولة المستفيدة اللى بتمول تقارير استهداف عملة مصر

ولو حضرتك بتسأل وتقول وهي المنصات دي بتجيب من عندها ويعنى احنا ما عندناش أزمة عملة ولا نقص فى الدولار؟

هقول لحضرتك ان مصر عندها بالفعل أزمة فى نقص العملة وشح فى الدولار والحكومة وكل المسئولين معترفين بده بس هل السعر اللى بيتباع بيه الدولار بعيدا عن البنوك هو السعر العادل للعملة الأمريكية .. الاجابة ببساطة لأ طبعا .. لكن اللى بيحصل ان الاشاعات اللى بتطلعها القنوات دي كل شوية بتخلى الناس تتكالب وتجرى تشترى دولارات وتحول فلوسها لعملة أجنبية تحوطا من هبوط وتخفيض قيمة الدجنيه وده بيزود الطلب على العملة الأمريكية وبيخلى سعرها يرتفع كل يوم

وخد بالك رغم وجود أزمة فى نقص العملة الجنيه متماسك وسعره الرسمي فى البنوك مستقر بقالوا شهور والبنك المركزي فى الفترة الخيرة وفر للحكومة أكتر من 72 مليار دولار تم استخدامهم فى الافراج عن البضايع المستوردة فى موانى مصر

والبنك المركزي بيدبر معظم احتياجات المستوردين وسدد كل التزامات مصر الخارجية في 2023 وبيسدد الأقساط المستحقة في مواعيدهافى  2024 يعنى الأوضاع مختلفة تماما عن اللى بتقولوا المنصات اللى اتكلمنا عليها واللجان الاليكترونية اللى بتستهدف الجنيه المصري وبتعظم من قيمة الدولار

والى جانب اجراءات وتحركات البنك المركزي لتوفير سيولة دولارية فيه كمان خطة عاملاها الحكومة وشغالة عليها لتعزيز موارد الدولار والخطة ماشية كويس جدا وحققت نتايج ملموسة وفيه زيادة فى واردات السياحة والصادرات وقناة السويس

بس كل التحركات والجهود اللى بتحصل من البنك المركزي بيقابلها الاعيب وتحركات خبيثة من بعض الأبواق وده بيساعد طبعا في اشعال أزمة  أزمة الدولار وزيادة قوة ونفوذ  السوق السوداء

الأغرب من كده ان فى الوقت اللى المنصات والأبواق بتوجه سهامها السامة للجنيه وللاقتصاد المصري فيه اختفاء مريب للاعلام المصري ومفيش حد بيرد ولا بيوضح ولا يكشف المؤامرة الكبيرة اللى بتتعرض لها مصر