هل تخفي الحكومة مصيبة.. وسر عودة إعلام التسخين
هو صحيح احنا في مصيبة والحكومة مخبية علينا وايه سر عودة إعلام ومنصات التسخين بقوة وعاوزة ايه في الوقت ده تحديدا وايه اللي حصل بالليل وبيقول إن مصر فعلا على المحك وممكن تدخل في دوامة كبيرة.. وياترى الرئيس مشغول بايه دلوقتي..
طول أزمة الدولار من حوالي سنة تقريبا منصات الفتنة ماوقفتش دقيقة واحدة عن مهاجمة البلد والحكومة والرئيس والناس نفسها ودا معروف وكلنا شايفينه لكن الموضوع زاد اووي اليومين دول وخلي بالكم من التوقيت ومحاولة إعادة ايام الفتنة والفوضى والضياع لما مصر كانت بينها وبين الإنهيار مسافة أقل من متر لكن ربنا تعالى كان رحيم وانقذها وكلنا عارفين اللي حصل بعدها... لكن توقيت القنوات دي الخبيث بيقول أنهم صاحيين والناس اللي وراهم عارفين بيعملوا ايه وبيدفعوا لمين عشان يولع الشارع.. مفيش شك واحد في المليون إن مصر عندها مشاكل اقتصادية زي ظل دول العالم وحتى الغني منه لكن معندناش انهيار ولاسقوط وموصلتش لمرحلة الفوضى الاقتصادية.
طيب ياترى الحكومة مخبية حاجة عن الشعب وايه حكاية كمية الإشاعات اللي بتطلع كل يوم دي.. بص حضرتك مفيش حكومة دلوقتي بتقدر تخبي اي حاجة لأن العالم كله مفتوح على بعض وكل اقتصاديات الدول وتفاصيلها في مؤسسات بتحللها وبتنشرها وبتكتب عنها توقعات كمان ودا غير أنك الاقتصاد المصري مرتبط في مؤشراته بمؤسسات مالية دولية وكل تحرك في الاقتصاد والأسواق بيبقى معروف فطبيعي لو عندك كارثة مش هقدر تخبيها لكن الحمدلله احنا قربنا نعدي من الأزمة الكبيرة لكن بص حوليك كده وانت تعرف إن الموضوع مش اقتصاد بس لكن أكبر من كده بكتير جدا وأخطر .. بص كويس هتلاقي إن أمنك القومي في خطر حقيقي واللي بيحصل على الحدود دا مش صدفة والصراعات اللي في المنطقة جاية في توقيت غريب ومحاولة جر البلد لحروب جانبية ومحاولة استفزاز مصر عشان توقع في الفخ مش هتبطل والمقصود في النهاية البلد تدخل المصيدة وترجع سنين لورا.
حد يقولي ازاي احنا مش في فوضى اقتصادية مع كل الزيادة في الأسعار دي.. هرد على حضرتك واقولك إن العالم كله في أزمة اسعار ودا مش دفاع ولا مبرر للحكومة أو التجار أنها ترفع الأسعار لكن بريطانيا نفسها الناس عملت مشاكل كبيرة عشان مش قادرين يشتروا ومش لاقيين السلع في وقت قريب .. لكن عندنا مفيش سلعة اختفت بشكل كامل من السوق الا إذا تم تخزينها من التجار عشان يرفعوا سعرها لكن احنا بنتكلم على الاحتياطي الاستراتيجي للبلد من السلع والمخزون اللي بيخلي الناس في دايرة الأمان ودا الحمدلله موجود وبيزيد ومفيش خوف من اي كوارث.. لكن الخوف الحقيقي من اللي بيحصل حولينا وعشان كده الرئيس السيسي تقريبا مش بينام ومتابع لحظة بلحظة للي بيحصل.
