صيد الحيتان بدأ.. بعد امبراطور الدهب سقوط تجار العيار التقيل
ازاي القبض على امبراطور الدهب فتح عش الدبابير على تجار العملة والدهب وليه معلمين السوق السوداء بدأو يهربوا وايه اللي بيحصل في السوق والصاغة دلوقتي.. وايه حكاية من اين لك هذا والحكومة واجهزة الرقابة ناو وين على إيه لكل اللي كسب من أزمات البلد
اكتر من نص الأزمات اللي عايشاها الناس هي في التجار الجشعين والطمع والاحتكار.. ولو فيه رقابة اكبر من كده مكنتش حصلت لعبة زي لعبة السجاير والسكر وغيرها من السلع اللي اختفت لفترة عشان تجار الأزمة يكسبوا ملايين الملايين كل يوم وبعدها ترجع السلعة وكأن مفيش حاجه حصلت.. لكن تقريبا كده ده وقت الحساب خلاص ورغم إنه أجهزة الدولة قبضت على شبكات كتير من تجار العملة وتجار السلع والجملة المخالفين وتجار الدهب والمضاربين لكن مكانش كفاية واجهزة الرقابة كانت محتاجوطة تدخل في الغويط وتجيب المعلمين الكبار اللي بيتحكموا في السوق والاسعار ولأن ماينفعش تقبض على حد من غير تحريات ودليل وده اللي كان معطل عمليات كتير لضبط الاسواق لغاية اللي حصل يوم الاحد في الصاغة وقدرت الرقابة تقبض على الحوت الكبير واللي وصل جبروته في السيطرة على الصاغة وسوق الدهب إنه يعمل زي بورصة خاصة بيه للأسعار وكان التجار يستنوا كلمته عشان يعرفوا هيبيعوا بكام ودا لأنه بيتحكم في كمية كبيرة جدا من الدهب قدر يخزنها الشهور اللي فاتت كلها.
وبعد ساعات قليلة من سقوط إمبراطور الدهب وجهت أجهزة الأمن ا ضربات جديدة وموجعة وقوية لحيتان الدهب والدولار، واللي اتسببوا في ارتفاع أسعار الصاغة ووصول الدولار لأرقام قياسية مقابل الجنيه في السوق السوداء.
وحسب معلومات بانكير شنت أجهزة الأمن في الساعات الأخيرة حملات تفتيش موسعة على محلات الصاغة المملوكة لعدد من التجار الكبار المتحكمين في تحديد السعر او حيتان الدهب، زي ما بيسموهم وحسب المعلومات بردوا تم القبض علي عدد كبير من المتهمين في محافظات القاهرة الكبرى واللي شغالين لصالح بعض الحيتان الكبار، ومعاهم كميات كبيرة من الدهب غير المدموغ ومبالغ كبيرة من الدولارات.
اعترافات المتهمين كشفت مفاجآت من العيار التقيل لما قالوا إن الدهب والدولارات المضبوطة معاهم بتاعة تجار دهب من العيار التقيل في اسوان وبعضهم كان تابع لامبراطور الدهب اللي تم القبض عليه وواضح كده إن الموضوع كبير وكانت وليه بتديره شبكات نفوذها كبير وخلي بالك من قصة الدهب الغير مدموغ دا هيدخلنا في مخالفات تانية وهي التنقيب غير المشروع عن الدهب وهتتفاجيء لما تعرف إن فيه عصابات في اسوان مشهورة بأعمال التنقيب عن الدهب زي التنقيب عن الآثار كده.. واضح كده إن فيه لعبة كبيرة بتحصل أو كانت بتحصل وواضح كمان إن الأمن والأجهزة الرقابية حطت أيديها على كل التفاصيل وهنشوف مفاجآت مش هنصدقها في الأيام الجاية
