توقيت خبيث وميزانية مفتوحة.. لغز عودة شياطين المنصات والذباب الإلكتروني

اشمعنا دلوقتي ظهرت كتايب الإخوان ومنصات الاجهزة اياها مهي مصر في أزمة من سنة وايه الغرض منها ومين بيفكر ويخطط ومين بيمول ومين بينشر وإيه علاقة الهجوم الالكتروني الأخير بالتوقيت.. حاجات كتيرة وأسرار هنقولهالكم عشان تخلو بالكم من اللي بيحصل.. خليكم معانا

البلد بتفلس والناس جاعت والمسؤولين بيهربوا والسيسي خرب البلد وبيني كباري واللي جاي خراب ... أكيد وانت قاعد بتقلب في موبايلك سمعت جملة من دول ده إذا مكنتش سمعت وشفت كل اللي قلنا وأكتر كمان لأن دي نماذج بس.. لكن الحقيقة الموضوع كبير وخطير ولما بنتكلم فيه مش معناه اننا بندفن راسنا في الرمل ومش شايفين الأزمة الاقتصادية اللي فيها البلد ولا الغلا وارتفاع  الاسعار بالعكس احنا في بانكير أكتر ناس اتكلمت في كل موضوعات الاقتصاد وقدمنا حلول كمان للازمات عشان يبقى دورنا إيجابي لكن لما الموضوع يبقي أمن قومي والمقصود بيه البلد توقع يبقي لازم نعلق جرس ونبه الناس.
لو ربطت بين اللي بيحصل وهجوم المنصات والذباب الالكتروني على البلد وعلى رئيسها تحديدا وبين التوقيت والشهر واللي هو يناير هتفهم الناس دي عاوزة إيه وإنها هي اللي عندها أجندة خراب وسقوط وفوضى مدمرة.
ولو ربطت بين الكلام والألفاظ اللي ببتقال والجمل والمصطلحات هتلاقيها تقريبا موحدة في منصات الاخوان الاللكترونية ومنصات مجهولة تانية وحسابات غريبة على مواقع التواصل الاجتماعي واللي وراها وبتمولها أجهزة معادية ولو تلاحظ بردو وتيرة الهجوم بتزيد كل المعاد اللي محددينه ما بيقرب عشان يوصلوا في النهاية لمرحلة الغليان بعد انتهاء مرحلة التسخين.

كمان هتلاحظ حاجة مهمة جدا هتتأكد منها إن الناس دي مابتلعبش وعارفة بتعمل إيه ووراها كوادر محترفة بتقولهم يقولو إيه وإزاي وهي إن الاشاعات والاكاذيب والتحليلات اللي بيتعمل بتكون  موجهة لفئات معينة زي الشباب وهو المقصود لأنه هو المحرك الأساسي لأي مخططات عاوزين يوصلوها وعشان كده بيسودوا المستقبل في وشه عشان يغضب وغضبه يخرج عن السيطرة وكمان حاجة تانية وهي إن الكلمات دي والمادة اللي بتتقدم على منصات الفتنة بتكون ليها خوارزمات معينة وتأثير نفسي مدمر ومدروس كويس جدا واللي واقف وراها خبراء في علم النفس والإعلام وعلوم الاتصال وبيمولها ميزانيات مفتوحة وكله بالدولار طبعا.

لو مش بتؤمن بنظرية المؤامرة شوف اللي بيحصل حولينا والشغل العالي في استهداف البلد جوه وبره وادي نفسك فرصة واحبها كويس .. فعلا عندنا أزمات لكن عايشين وتمر لكن موصلناش لمرحلة الانهيار ومش هنوصلها إن شاء الله لأن البلد واقفة على رجليها وزي ما فيه واقع صعب فيه بردو مؤشرات إيجابية وبتقول إن البلد فيها شغل واقتصاد ماسك نفسه واتعلم من دروس الازمات واللي بيحصل وحصل مش هيتكرر تاني وكفاية إن مصر اتعلمت درس العمر من الأزمات اللي فاتت وهو إن الانتاج والتصنيع والزراعة والاستثمار والاكتفاء ضروري جدا لأي دولة ومش معقول نقعد نستورد ونبقي شعب مستهلك باستمرار وعشان كده البلد بقت بتنتج وبتوطن صناعة وبتزرع ملايين الأفدنة وفاتحة شغل للمستثمرين في كل حتة والمشروعات بدأت تجيب خير وحصل لأول مرة في تاريخ مصر فاتورة الاستيراد تنزل لأكتر من 12 مليار دولار في 7 شهور بس وقصادها التصدير بيزيد ودا مثل بسيط بيورينا قد ايه البلد ثقافتها اتغيرت وكنا محتاجين ضربة على دماغنا عشان نفوق.

اوعي تصدق اللي بيتقال وإن مصر هتخرب والسيسي ضيع البلد ودا كلام اللي بيقولو مجنون وأعمى ومش بيشوف كم المشروعات اللي اتعملت والبلد الجديدة اللي اتبنت والفكر الجديد اللي بيتنفذ ومشافش إن مصر قبل أزمة كورونا كانت أعلى معدل نمو في العالم والبلد كانت طايرة وكل المؤشرات كانت بتقول إننا هنعدي لكن للأسف حصل كوورنا والعالم قفل على نفسه وبعدها يادوب بنفوق وجت الحرب الروسية ولسه بناخد نفسنا حصل اللي حصل في غزة والمنطقة والبحر الأحمر ولسه البلد بتعافر ونحمد ربنا عندنا اقتصاد متنوع ولو وقف أو أتأثر قطاع فيه غيره شغال.

السيسي مسك بلد ميتة اقتصاديا وصرف 10 ترليون جنيه في اقل من 10 سنين على مشروعات عشان يعمل بلد بحق وحقيقي وكلنا شايفين اللي اتحقق والناس كانت مبسوطة بيه ومش هيجي شوية لجان وذباب إلكتروني وجماعات نفسها ترجع للحكم أو تنتقم وجهات تانية عاوزاك تسيب ملفات السودان وليبيا وغزة وتركز في الداخل بتاعك ويوقعوا البلد.