بـ 98 طلب احاطة.. محاكمة وزير التموين تحت قبة البرلمان

وزارة التموين من اكثر الوزارات اللي عليها مشاكل في الحكومة الحالية بعد ما فقدت السيطرة علي الاسعار بالاسواق، واختفي دور حماية المستهلك وده فتح سيل كبير من طلبات الاحاطة للدكتور علي مصيلحي وزير التموين والتجارة الداخلية بمجلس النواب لمعرفة اسباب اختفاء دور الوزارة في القيام بدورها في متابعة ومراقبة الاسعار بالاسواق.. ياتري اية اللي اعضاء مجلس النواب قاله النهاردة لوزير التموين، واية ردود وزير التموين علي اسئلة اعضاء مجلس النواب، واية خطته للتعامل مع الاسعار الفترة اللي جاية.
 

النهاردة كان في جلسة سخنة جدأ لوزير التموين في مجلس النواب وكانت شبه محاكمة بناء علي طلبات الاحاطة المقدمة من اعضاء المجلس وكانت شبه رسالة بتاكيد رحليه عن الحكومة الجديدة في الفترة الرئاسية من 2024 الي 2030، ووصلت عدد الأدوات الرقابية الموجهة لوزير التموين والتجارة الداخلية الي 98 أداة رقابية وتضمنت تساؤلات عن دور الوزارة في الرقابة على الأسواق لمواجهة الاحتكار وارتفاع الأسعار ونقص بعض السلع والمخزون الاستراتيجي لمواجهة أزمة الغذاء العالمية، وأعمال تقنية بطاقات التموين، وتصويب منظومة الدعم والخبز، وخطة إنشاء المخابز ومستودعات الدقيق والمطاحن والرقابة على جودة رغيف الخبز.

مواجهة وزير التموين في مجلس النواب بدأت بـ60 طلب إحاطة و5 أسئلة موجهة من النواب عن سبل الرقابة على الأسواق لمواجهة الاحتكار وارتفاع الأسعار ونقص بعض السلع، وخطة الحفاظ على المخزون الاستراتيجي لمواجهة أزمة الغذاء العالمية، بالاضافة الي 23 طلب إحاطة وسؤال عن أعمال تنقية بطاقات التموين وتصويب منظومة الدعم والخبز، و6  طلبات إحاطة وسؤال عن إنشاء المخابز، و 3 طلبات إحاطة عن مستودعات الدقيق والمطاحن والرقابة على جودة رغيف الخبز.

محاكمة وزير التموين كانت أعنف مواجهة مع اكثر من 100 نائب، وظهر وزير التموين مهموم ومش عارف يرد علي اسئلة مين ولا مين من النواب اللي كانت اغلبها ان المواطنين مش عارفين يعيشوا بسبب الغلاء.
النائب محمد عبد العليم داود عضو مجلس النواب كان اكثر عضو هاجم وزير التموين والحكومة وقال «انت لو مش عارف تدير الوزراة أستقيل... في ناس مش لاقيه تاكل والجوع انتشر محدش لاقي.. وانتوا حطيتوا نواب البرلمان في وش المدفع، وفين دور المجموعة الاقتصادية والحكومة ووزير المالية اللي دوره حاليا مقتصر علي فرض الضرائب وخلاص».

النائب محمد عبد الحكيم أبو زيد عضو مجلس النواب، كمل هو كمان هجومه علي وزير التموين وقال: «أسعار السلع الأساسية ملهاش ضابط ولا رابط في السوق.. كل واحد بيبيع بمزاجه.. فين رقابة وزارة التموين.. وفين الحلول العملية للتخلص من السوق السوداء في تجارة السلع».
النائب محمد عبدالحكيم كمل هجومه علي وزير التموين وقاله: «في مخابز بتاخذ 3 اشوله دقيق يوميا لانتاج الخبز.. هل الكمية دي كافة لسد احتياجات المواطنين... يا ريت حضرتك تعيد النظر في كمية الدقيق المقررة للمخابز.ز وكفاية حذف عشوائي من بطاقات التموين الناس مش ناقصة».

النائب نافع عبد الهادي، عضو مجلس النواب، استلم الميكروفون من زملائه وقال لوزير التموين: «الموظفين عندك اتحولوا لتجار.. الوزير اللي يوقف المواطنين بالساعات علشان ياخدوا كيلو سكر يبقى فاشل.. ولما مسئول الرقابة في وزارة التموين يكون فاسد يبقى حاميها حراميها، ودليل على أننا أمام وزير فاشل.. هو حضرتك مستني اية..أنا لو منك ألم حاجتي وأمشي بره الوزارة، الناس بتحسبن عليك لا عارف تظبط أسعار ولا توفر سلع.. وعلي فكرة الكلام ده لمش ليك لوحدك، الكلام ده لوزراء المالية والتنمية المحلية والتعليم والصحة».

يا دوب النائب نافع عبد الهادي، خلص كلامه مع وزير التموين والمستشار حنفي الجبالي رئيس مجلس النواب عطي الكلمة للنائب عبد المنعم إمام، عضو مجلس النواب ورئيس حزب العدل وقال لوزير التموين: « حضرتك طلعت من كام يوم واعتذرت للشعب عن اللي بيحصل في ارتفاع الأسعار ونقص السلع... اعتذارك مرفوض».
رئيس حزب العدل كمل هجومه علي وزير التموين: « مشكلة مصر مش في قلة الفلوس، وأزمتنا الحقيقة في زيادة اللصوص.. ازاي بلد فيها اكتفاء ذاتي من البصل والسكر يحصل فيها ازمة بالشكل ده.. انا بسأل معالي وزير التموين سؤال وعايزه يجاوب عليا.. لو افترضا أن نصف الشعب المصري دخله 4 آلاف جنيه ازاي هيعيش بيهم وهو محتاج اكل وشرب بـ 6 آلاف جنيه كحد أدني في الوقت غير فواتير المياه والكهرباء وغيره.. انا عايز حضرتك تاخذ 6 آلاف جنيه وتعيش نفسك بيهم أسبوع مش شهر.. اللي بيحصل مش مقبول تماما.. انتوا حطتوا المواطن بين خيارين اما الجوع او السرقة... وفيه اختيار تالت تورونا عرض اكتفاكم».
وزير التموين مكانش عارف يرد علي اسئلة اعضاء مجلس النواب، وقعد يشرح في تفاصيل ازمة اسعار السلع من البداية واية اللي وصلنا للمرحلة دي وتدخل المستشار حنفي الجبالي رئيس مجلس النواب وقاطعه« اختصر في كلمتك ذكرت نقطة الأسعار انتقل لنقطة أخرى، الوقت قصير، مش هتاخد كل الوقت.. كدا هنقعد لحد بالليل» ورد وزير التموين«حاضر».