أكبر مصنع سكر في مصر يتوقف عن الانتاج.. مفاجأة وراء قرار الشركة

في الساعات الأخيرة .. الناس على السوشيال ميديا مش مشغولة بحاجة غير بخبر توقف أكبر مصنع لانتاج السكر من القصب لأول مرة من 155 سنة.. وكل الناس بتسأل يا ترى ايه السبب ؟ وازاى مصنع كبير وضخم زي كده يتوقف فجأة عن الانتاج ؟ وايه تأثير ده على أزمة وأسعار السكر خلال الفترة الجاية؟

فجأة وبدون مقدمات أعلنت الشركة المسئولة عن تشغيل مصنع سكر أبوقرقاص وقف العمل فى المصنع لأول مرة من سنة تاسيسه قبل حوالي 155 سنة في الول الناس مكنتش فاهم ليه الادارة خدت قرار مهم وخطير زي ده وايه الأسباب اللى وصلت الشركة لكده.. وشوية بشوية بدأنا نفهم ونسمع مبررات وأسباب.

ووفقا لتصريحات للواء عصام البديوي، الرئيس التنفيذي والعضو المنتدب لشركة السكر والصناعات التكاملية المصري، المالكة للمصنع فسبب توقف الانتاج هو التراجع الكبير اللى حصل فى زراعة القصب فى مصر فى اخر 5 سنين.

وحسب الأرقام المعلنة من رئيس الشركة، فمحافظة المنيا وحدها كانت بتنتج 950 ألف طن من القصب، وكان المصنع بيستقبل منها 750 ألف طن لغاية سنة 2020، ولكن في السنة اللى فاتت استقبل المصنع 90 ألف طن بس وده أدى خسائر بحوالي112 مليون جنيه.

واجتمعت إدارة الشركة مع المزارعين لبحث زيادة وارداتهم للمصنع، لكن  للأسف انخفضت كمية القصب المورد للمصنع في 2023 إلى 10 آلاف طن فقط، ودي كمية تكفي للعمل لمدة 5 أيام فقط وعشان كده كان قرار الادراة بوقف خطوط انتاج السكر من القصب.. ورفعت كمية انتاج السكر من البنجر إلى مليون طن وحولت توريدات القصب لمصنع تابع للشركة فى  جرجا بمحافظة سوهاج مع تحمل مصانع سكر أبوقرقاص تكاليف النقل بالكامل.

حسب تصريحات المسئولين عن ادارة المصنع فرغم زيادة سعر توريد القصب 500 جنيه للطن عن السنة اللى فاتت وانه بقا 1500 جنيه بدل من 1000 جنيه لكن المزارعين بيبعوا القصب لتجار «العوادي» اللى بيشتروا المحصول منهم بأسعار تتجاوز الـ 2200 جنيه و2500 جنيه للطن الواحد، وبيبيعوه لعصارات العسل الأسود ومحلات العصير.

وبسبب ازمة تراجع القصب اللى بيتم توريده خسرت الشركة المالكة لمصنع أبوقرقاص في انتاج السكر 3.5 مليار جنيه، وحققت مكاسب خارج السكر بحواليمليار و350 مليون جنيه.

أزمة مصنع سكر أبوقرقاص وصلت البرلمان ووجهت النائبة آمال عبد الحميد، عضو لجنة الخطة والموازنة بمجلس النواب، طلب إحاطة إلى الحكومة ممثلة في وزارتي التموين والتجارة الداخلية، والزراعة، بشأن توقف المصنع عن إنتاج السكر لأول مرة منذ إنشائه عام 1869 أي منذ نحو 155 عامًا.

النائبة قالت فى طلبها ان زراعة قصب السكر تتميز باعتماد ملايين الأسر فى صعيد مصر على منتجاتها الرئيسية والفرعية اللي بتنشأ عنها صناعات السكر والكيماويات والورق والأغذية والمشروبات والأعلاف، وأكدت أن زراعة قصب السكر فى مصر بتواجه تحديات كتيرة ولازم وزارة الزراعة وكل الجهات المعنية تتحرك لانقاذ الموقف لأن توقف مصنع بالحجم ده عن الانتاج هيؤدي الى تعظيم أزمة اسعار السكر اللى فيها مشكلة كبيرة أصلا.