الدولار عامل ايه في الدول اللي حوالينا وليه مصر موصلتش لمرحلة الخطر
اللي يشوف أزمات الدول اللي حولينا تهون عليه أزمته.. ياترى الدولار عامل ايه في الدول التانية وليه مصر موصلتش لمرحلة الخطر الحقيقي وليه موقفنا افضل بكثير رغم كل الأزمات
عمرك سألت نفسك أزمة الدولار اللي في مصر لو خرجت عن السيطرة أو قربت من دائرة الخطر كان ايه اللي ممكن يحصل وليه احنا لسه في منطقة الأمان الاقتصادي والمالي.. الاول عشان نجاوب على السؤال دا لازم نشوف إيه اللي بيحصل حولينا.. طبعا الأزمات الاقتصادية والمالية واللي سببها الدولار بردوا اثر على كل دول العالم تقريبا لكن ظهرت الأزمة بشكل كبير في الدول الناشئة أو النامية اللي زي مصر ومعظم دول افريقيا لأنها بتعتمد بشكل كبير على الاستيراد والحاجة الدايمة لوجود الدولار ومع الاستيراد معظم دول افريقيا بتعاني من أرقام ديون كبيرة هتخليها دايما في حالة احتياج للعملة الأمريكية عشان تستورد وعشان تسدد ديونها وعشان تصرف مستحقات الشركات الأجنبية والعالمية اللي شغالة على ارضها لأنها بتتعامل بالدولار.
في غانا مثلا الحكومة أعلنت عجزها عن سداد الدفعات المستحقة بشأن غالبية ديونها الخارجية، ودا خلاها مش قادرة على السداد بسبب التحديات التي تواجهها على صعيد تحقيق توازن في ميزان المدفوعات بسبب الأزمات الاقتصادية العالمية واضطرت تعمل جدولة ديون عشان تعرف تاخد قرض جديد ونجحت في إعادة هيكلة الديون واللي شرحناها قبل كده انها بتكون بطلب من الدولة المدينة للدول الدائنة أو المؤسسات المقرصة زي صندوق النقد والبنك الدولي لتخفيف الأقساط أو إلغاء جزء من الديون أو زيادة مدة السداد عشان الدولة تقدر تسدد وغالباً بيتم الموافقة على الطلب في أغلب الأحيان حسب علاقة الدولة بالدائنين.
وفي نيجيريا وهي اقتصاد قوي في افريقيا وعندها نفط بردو عندها أزمة الدولار لدرجة أن الشركات العالمية والأجنبية عندها هددت بالتوقف ومقاضاة الدولة عشان ليها مستحقات بالدولار والدولة مش قادرة تسدد ديون الشركات دي واللي لو رفعت قضايا هتكسبها وهتاخد فوق حقها تعويضات ضخمة.
في مصر موصلناش للمرحلة دي عشان مصر لسه قوية وأزمة الدولار لسه تحت السيطرة ولأن مصر عندها تنوع في الموارد الدولارية من قناة السويس للتحولات للتصدير ومن السياحة والاستثمار الأجنبي والقروض والودايع ودخل عليهم برامج الطروحات الحكومية ومبادرات جمع الدولار اللي أطلقها البنك المركزي بطرح اراضي ووحدات مميزة بالدولار للمصريين بالخارج غير. مبادرة السيارات والدهب وغير إن الشركات الأجنبية في مصر خاصة في قطاع النفط والغاز شغالة بقوتها في مصر وبتضخ استثمارات ضخمة زي اللي حصل في حقل النرجس للغاز واللي ضخت فيه شركة شيفرون مبالغ ضخمة بالدولار وهتشغل الحقل بداية السنة الجاية وميزة مصر أن الشركات العالمية بتحقق مكاسب كبيرة في السوق المصري واللي شايفاه سوق واعد وكبير.
بجانب ده كله مصر قدرت تقفز قفزات كبيرة في الاستثمار والتنمية الاقتصادية المستدامة وعندها مناطق اقتصادية عالمية زي اقتصادية قناة السويس واللي جذبت مليارات الدولارات في المناطق الصناعية الصينية والرويية والهندية والإسبانية.. من الاخر مصر بلد واعدة اقتصاديا في كل القطاعات وعندها تنوع زي ما قلنا وعشان كده لسه في دايرة الأمان.
