لازم ولا بد ومفيش مفر.. أخطر تصريح رسمي عن التعويم وتوقف برنامج الطروحات

في وقت رئيس الحكومة قال لسه قرار التعويم وفي انتظار نتايج مفاوضات الحكومة مع صندوق النقد الدولي طلع مسؤول كبير وقال حاجة مهمة وخطيرة عن التعويم وتوقيته وأهميته وخطورته وكمان بخصوص ملف برنامج الطروحات الحكومية.. ايه اللي حصل وليه قال كده........ تعالو نشوف مع بعض
 

معروف إن ملف التعويم من أخطر الملفات اللي بتواجه الدولة وصداع في راس المركزي والحكومة وسبب أزمات في الأسواق وارتفاع أسعار الدولار في السوق السودا أو الموازية، ودا لأن الكلام الكتير عن التعويم أو تحرير سعر الجنيه بيربك الأسواق ويخلف الاشاعات السلبية وبالتالي الناس بتجري تشتري دهب وتخزن السلع وتحول الجنيهات لعملات تانية وفي الاخرب المواطن هو اللي بيدفع التمن بسبب ارتفاع الأسعار في كل حاجة رغم إنه لسه قرار التعويم متحسمش والرئيس السيسي قال مفيش تعويم طول ما فيه خطر اقتصادي على المواطن..
وعشان كده الحكومة واجهت صندوق النقد بالحقيقة إنه مفيش تعويم غير لما يتوفر الدولار وتبقى اثار تحرير الجنيه مش خطيرة على الأسواق والمواطن وإلا هيبقى حلينا مشكلة صعبة بحل أصعب وأخطر..
الدكتور فخري الفقي رئيس لجنة الخطة والموازنة بمجلس النواب طلع في تصريحات صحفية من ساعات وقال فيما معناه إن تحرير سعر صرف الجنيه ضروري جدا لإنعاش الاقتصاد المصري و إن سبب تعثر ملف الطروحات الحكومية هو وجود سعرين للدولار في السوق، وقال إن تم طرح 50 أصل و شركة للقطاع الخاص أو للمشاركة مع الحكومة لكن توقف الأمر بسبب تعدد و ازدواجية سعر الصرف.
وهو شايف إن انخفاض معدلات التضخم علي مدار الشهور التلاتة الأخيرة حاجة بتدعو للتفاؤل في استمرار انخفاضه ووصوله لـ 35%..، عشان الدنيا تمشي صح رئيس الموازنة شايف إن خطوة التعويم مهما اتأخرت فهي لابد منها ولازم يكون فيه سعر واحد للدولار، وإن توحيد السعر وربطه بمؤشر الجنيه اللي اقترحه البنك المركزي لقياس أداء العملة المصرية مقابل العملات التانية هيضمن عدم تذبذب سعر الجنيه إلا في حدود ضيقة للغاية وبالتالي استقرار المؤشرات الاقتصادية إلى حد كبير.

وكمان شايف الفقي إن تحرير سعر الصرف مهم لإنعاش الاقتصاد المصري ، لأن وجود سعرين للدولار أثر سلبا على تحويلات المصريين بالخارج ، و إيرادات السياحة بخلاف العجز علي جذب استثمارات أجنبية مباشرة واللي في النهاية بيأثر على حصيلة النقد الأجنبي لمصر.، لكن في النهاية المسؤول شايف إن التعويم قرار بيحتاج لتدابير كبيرة وبيتعلق بالأمن القومي وعشان كده القرار هيصدر في الوقت المناسب لكن فيه حاجة غريبة في تصريحات البرلماني المسوؤل عن أهم لجان البرلمان  لما قال إن ملف الطروحات توقف ودي مش حقيقة على لسان الحكومة بدليل الأرقام اللي اتوقعتها في البرنامج خلال 2024  وتحقيق 70 مليار جنيه في الفترة الجاية من البرنامج وعشان كده مش عارفين رئيس الخطة والموازنة قال كلامه بناء على إيه.