أصعب 365 يوم على المصريين.. 2024 عام القرارات الصعبة
لو حضرتك رب أسرة أو مسئول عن بيت وعيال فلازم تكون عارف ان سنة 2024 هتكون ضعبة جدا وهيتم فيها اتخاذ مجموعة من القرارات الاقتصادية اللى هيكون ليها تأثير كبير على حياتك ومصروب البيت ونفقات المعيشة.. ولازم من دلوقتي تاخد بالك كويس جدا ومتصرفش فلوسك الا فى المكان الصح ويفضل تشيل من خططك اى رفاهيات وتركز على الأساسيات والحاجت اللى متقدرش تستغنى عنها لغاية ما السنة دي تمر على خير وبعدها ان شاء الله الدنيا هتبقى كويسة.. ليه بنقول كده وايه القرارات الصعبة اللى لسه الحكومة ما خدتهاش لحد دلوقتي ؟ وايه المتوقع يحصل فى 2025؟
من ساعات كان فيه مؤتمر مهم جدا لرئيس الوزراء الدكتور مصطفى مدبولي اتكلم فيه عن سبب القرارات اللى خدتها الحكومة برفع أسعار عدد من الخدمات زي تذاكر المترو وشرايح الكهرباء وفواتير الانترنت
مدبولي صارح الناس بحقيقة الوضع الاقتصادي الصعب اللى بتمر بيه مصر وقال لازم المواطن يعرف انه لما بيتم زيادة جزئية لأسعار بعض السلع أو الخدمات الأساسية فدي محاولة لتخفيف حجم الأعباء المالية اللي زادت بصورة كبيرة جدا على الدولة واستمرارها مش يكون صحي على الاقتصاد المصري.
وأكد رئيس الوزراء ان الحكومة بتنحاز للمواطن المصري البسيط في إجراءاتها وان جميع إجراءات الإصلاح الاقتصادي كان هدفها وصول الدعم إلى مستحقيه.. وقال ان مصر زيها زي كل دول العالم واجهت أزمات عالمية طاحنة محصلتش من 60 سنة بدءًا بفيروس كورونا وبعده الحرب الروسية الأوكرانية وأزمة التضخم العالمية اللي عملت على زيادة أسعار كل حاجة وشكلت ضغط على الاقتصاد المصري وأدت إلى اختلاف سعر الصرف بين الدولار والجنيه
طب امتى الزمات دي كلها تخلص وامتى الاقتصاد المصري هيستعيد عافيته؟
رئيس الحكومة جاوب على السؤال ده وقال إن اقتصاد مصر قدامه 2024 وجزء من 2025 للعودة إلى المسار الطبيعي.. وأوضح ان الحكومة حاولت منذ بداية الأزمة الروسية الأوكرانية التخفيف عن المواطن بعدم زيادة أسعار الخدمات خصوصا الكهرباء والمياه لكن خلاص الموازنة العامة ما بقتش تستحمل.
مدبولي كشف ان إن مكافحة التضخم على رأس أولويات البنك المركزي وقال أنه اعتبارا من 2025 هيرجع التضخم إلى أقل من 10%.. وأكد ان هدف عملية الإصلاح الهيكلي أن الاقتصاد المصري يكون قادر علي مواجهة التحديات العالمية.
طب بعيدا عن كلام رئيس الحكومة.. ايه القرارات الصعبة المنتظرة الفترة الجاية؟
فيه اكتر من قرار لكن اهم قرارين هما زيادة أسعار البنزين والسولار ومعاهم تخفيض قيمة الجنيه وده لأن رفع اسعار البنزين والسولار هيتبعوا ارتفاع كبير فى كل السلع اللى بيتم نقلها وخصوصا السلع الاستراتيجية والغذائية اللى بيعتمد عليها المصريين في حياتهم اليومية كمان تخفيض قيمة الجنيه هيصاحبه ارتفاع كبير فى اسعار السلع وقيمة العملة هتنخفض يعنى لو حضرتك دخلك 5 الاف جنيه قيمتهم بعد التعويم مش هتساوي 4 الاف جنيه حاليا لأن التضخم هيزيد والاسعار هترتفع بشكل جنوني
طب ازاى ممكن تقلل خساير اللى هيحصل على حياتك؟
لازم من دلوقتى تشوف ميزانية بيتك وتحاول تشوف اى رفاهيات او حاجات مش لازمة وتستغني عنها على الاقل لغاية السنة دي ما تعدي على خير كمان تقدر تخفض قيمة استهلاكك فى الكهربا لقل حد ممكن وما تستخدمش مصادر اضاءة كتير وده هيقلل شوية من ضغط فاتورة الكهربا ولازم تدور على مصادر دخل اضافية لأن الجاى مش هيكون سهل أبدا
