إيه علاقة التعويم بالشهادات الجديدة.. وإيه اللي بيحصل في مصر

ايه اللي حصل في البنوك المصرية في ليلة الخميس، وإيه علاقة  طرح الشهادات بالتعويم وهل فيه قرارات جديدة في الطريق وايه اللي بيحصل في البلد.. تعالوا نشوف ايه اللي حصل.

معروف إن أكتر استثمار مضمون في العالم هو في شهادات الادخار اللي بتطرحها البنوك ودي لأنها بتكون في حماية البنك المركزي والحكومة يعني فلوسهم مضمونة مضمونة.. وفي أوقات كتيرة الشهادات البنكية بتكون أفضل من الاستثمار في الدهب بسبب التقلبات الكبيرة في سعره..

والنهاردة حصلت مفاجآت كتيرة وكلها أخبار مفرحة الحقيقة زي ارتفاع الاحتياطي النقدي في مصر لمستويات جديدة في نوفمبر وكمان طرح بنك مصر والأهلي المصري شهادات طلعت حرب جديدة بفايدة قياسية 27% لمدة سنة وبتصرف في أخر المدة.

لكن فيه ناس ربطت بين اللي بيحصل في مصر يوم الخميس وبين قرار مرتقب بتعويم الجنيه أو تحرير سعر الصرف، لكن الحقيقة مفيش علاقة إطلاقا بين قرارات الخميس وبين التعويم ودا لأنهم متفصلين خالص والمركزي بيعلن بشكل دوري عن ارقام الاحتياطي المصري، وكمان طرح البنوك للشهادات الجديدة كان سببها انتهاء مدة شهادات مطروحة من سنة وحل معاد استردادها فقرت البنوك الحفاظ على فلوس المودعين وتقديم عرض مغري وأفضل بكتير من الشهادة القديمة واللي بفايدة 25% وعشان كده طرحت 27% ودي فايدة غير مسبوقة.
نرجع لقصة التعويم واللي هي الخطوة أو الملف الأخطر في سنة 2024 ولأنها ليها علاقة بحاجات كتير لسه القرار ماتحسمتش، وبالعكس خبراء كتير اعتبروا الزيادات الرسمية في اسعار خدمات حكومية في اليومين اللي فاتوا أنها بديل للتعويم، ولان كمان كل بيانات البنك المركزي بتقول إن الدولار الرسمي لسه متماسك بقوة والدولة بتسدد التزاماتها من كل النواحي سواء اقساط وفوايد ديون أو الاستييراد أو تلبية مطالب المستوردين وأصحاب الشركات ولسه الاحتياطي بيزيد وغير كمان ارتفاع مخزون السلع الرئيسية.

يعني كل الأرقام الرسمية بتقول إن التعويم مش ملح ولا ضروري والوضع المالي للدولة قوي ومتماسك ومرن كمان، ولو ملاحظين الجنيه المصري بيزيد قدام العملات الأجنيبة الرئيسية بعيد عن الدولار ودا بيدينا إشارة إن العملة المصرية قادرة تقاوم وتنافس كمان.
وعلى فكرة ممكن في الايام الجاية يحصل انقلاب في سعر الدولار على عكس المتوقع ودا لأن فيه تطورات اقتصادية وقرارات  سياسية مهمة جدا هتحصل اليومين اللي جايين.