خللي بالك دي مصيبة.. ايه حكاية زيت العربيات المغشوش في الأسواق

ليه الغش في أي حاجة خاصة بالعربيات بيبقى جريمة قتل عمد كده وليه الدولة مش بتتهاون في أي عمليات غش لأي مكون من مكونات السيارة.. وايه اللي حصل في السوق الساعات الأخيرة وازاي الحكومة اتحركت في الوقت المناسب.. وازاي تخلي بالك من نفسك ومن أسرتك وانت على الطريق.

الغش أي حاجة جريمة وبيعتبر جناية زيها زي الاختلاس والقتل والحرق وخيانة الأمانة لكن الغش في أي زيوت أو بنزين أو عجلات أو فرامل العربيات من أخطر الجرايم اللي من النوع دا .. وده عشان اي غش في حاجة من دول بتعرض حياة  صاحب العربية وأسرته والناس اللي راكبة معاه لو كانت وسيلة مواصلات نقل جماعي يعني تخيل كده لو انت اشتريت وركبت اس قطعة غيار لفرامل مش مطابقة للمواصفات أو مغشوشة أو تقليد ومعاك 15 راكب وفجأة ملقتش فرامل في العربية يبقي فيه 15 أسرة فقدت مستقبلها وشوف لو قطعة الغيار المغشوشة دي اتركبت في كام ألف عربية النتيجة هتكون ايه.

ليه بنقول الكلام ده.. عشان اللي حصل في محلات زيوت السيارات واللي جهاز حماية المستهلك شن حملات كبيرة علي عدد كبير منها بعد ما وصلته معلومات إنه فيه زيوت سيارات مغشوشة بتتباع في الأسواق وخلي بالك زيت مغشوش يعني العربية ممكن تولع وانت راكبها واقل الأضرار محرك أو موتور العربية هيبوظ يعني عربيتك مش هيبقى ليها لازمة عشان واحد ولا عصابة قررت تغش زيت العربيات..

بداية حملة جهاز حماية المستهلك  كانت في مدينة 6 أكتوبر وضبط مصنع لإعادة تدوير زيوت مُحركات السيارات وإعادة تعبئتها في عبوات ووضع مُلصقات "استيكر" عليه أسماء علامات تجارية شهيرة، وده تمهيدا لإعادة بيعها للمواطنين مرة أخري والتي تؤثر علي أمن وسلامة قائدي السيارات بمختلف أنواعها وتم التحفظ على 13000 لتر زيت مجهول المصدر وغير مدون عليه أى بيانات، وضبط الأدوات المُستخدمة فى التعبئة والتغليف النهائى.. يعني تخيل لو كل عربية حطت لتر من الزيت المغشوش دا يعني فيه 13 ألف مصيبة هتحصل وفيه آلاف الأرواح مهددة بالموت في حوادث عشان تاجر مايعرفش يعني ايه أرواح ناس.

جهاز حماية المستهلك قرر يكمل في حملاته على زيوت العربيات المغشوشة لكن انت كصاحب أو شغال على عربية متستناش لما المصيبة تحصل ومشتريش اي حاجة لعرييتك غير من تاجر مضمون ولازم تتأكد من اي عبوة تشتريها أنها أصلية ولو لقيت اي حاجه غلط طلع تليفونك وبلغ عنه لأن اللي قدامك دا شيطان وطماع وكل همه يكسب فلوس حتي لو على حساب حياة الناس.