مفاجأة في تشكيل الحكومة الجديدة.. ورهان على المجموعة النارية

يا ترى مين هيكون رئيس الحكومة الجديد خلفا للدكتور مصطفى مدبولي؟ وايه هى الحقب الوزارية اللى الرئيس السيسي مهتم بيها وعاوز فيها كفاءات كبيرة وليها وأسماء ليها تاريخ وانجازات فى مجالها؟ وهل كل الوزراء هيمشوا فى التشكيل الجديد للحكومة ولا فيه وزراء ممكن يفضلوا مستمرين ؟ وليه التشكيل المتوقع هيكون فيه عدد كبير من رجال البنوك والقيادات المصرفية والمالية؟ وامتى أصلا ممكن يتم الاعلان عن الحكومة الجديدة؟
 

دستوريا الرئيس السيسي هيبدأ مهام عمله رئيسا للبلاد في الولاية الجديدة اعتبارا من اول شهر ابريل لكن وفقا لمصادر بانكير الرئيس مش هيستنى الوقت ده كله وبدأ فعليا ترتيب الأوراق فيما يتعلق بتشكيل الحكومة الجديد واختيار وجوه جديدة قادرة على تحقيق طموح الشعب والقضاء على الازمات والمشاكل اللى بتواجه المصريين في الفترة الأخيرة وفور الانتهاء من المشاروات مع الشخصيات المختارة هيتم عرض التشكيل الجديد للحكومة على البرلمان لمنحها الثقة. 
حدد دستور 2014  ضوابط تشكيل الحكومة الجديدة من غير النص علي إلزام أن يتم ذلك عقب الانتخابات الرئاسية.. ولكن  العرف في مصر جرى  على قيام رئيس  الجمهورية بتشكيل حكومة جديدة بعد الانتخابات الرئاسية مباشرة وعرض برنامجها على مجلس النواب للحصول على الثقة
حد هيسأل ويقول مين رئيس الحكومة الجديد ؟ 
بص لحد اللحظة اللى بنتكلم فيها مع حضراتكم دلوقتى اللى يقولك اسم معين يبقا بيقول اى كلام وده لأن الرئيس ومؤسسة الرئاسة مكتمين جدا على اسم رئيس الحكومة الجديد رغم ان الرئيس استقر عليه بالفعل واللى نقدر نقولكم عليه هو شوية معلومات حصلنا عليها من مصادرنا بتقول ان رئيس مجلس الوزراء الجديد هيكون شخصية اقتصادية من المستوى الرفيع و علاقاته بالمؤسسات المالية العالمية على أعلي مستوي ومؤثر وليه صوت مسموع جدا بره مصر في دوائر المال والأعمال 
والرئيس كان واضح من أول لحظة ومقرر ان الفترة الحالية والجاية محتاجة رئيس وزراء ليه خلفية اقتصادية مش سياسية لأن الأوضاع والمشاكل اللى بتعانى منها مصر هي مشاكل اقتصادية بالأساس

طبعا فيه ناس كانت بتقول ان ممكن يتم التجديد للدكتور مصطفى مدبولي.. بس الكلام ده مش صحيح  
الدكتور مدبولي  شخص وطنى ورئيس وزراء شاطر جدا أدى الدور المطلوب منه على أكمل وجه لكن التغيير سنة الحياة والمرحلة الجديدة محتاجة أفكار مختلفة ودماء جديدة وقيادات شابة تقدر تواكب التطور اللى بيحصل في العالم كله .. وفيه اهتمام كبير باختيار كفاءات على أعلى مستوى خصوصا في المجموعة الاقتصادية والوزرات المعنية بخطط الدولة الاقتصادية سواء في الاستثمار او الصناعة او التجارة والتعاون الدولي

طب هل فيه وزراء ممكن يكملوا مع رئيس الوزراء الجديد؟
بنسبة كبيرة الحكومة الجديدة هتيجي بتشكيل مختلف تماما وكل وجوه جديدة لأن زي ما قولنا لحضراتكم الرئيس السيسي عاوز أفكار مختلفة ورؤى جديدة تقدر تساهم في الخروج من مرحلة عنق الزجاجة اللى مصر بتعانى منها من فترة طويلة فطبيعى اختيار وجوه جديدة لكن عندها رصيد من النجاحات على المستوى المهنى 
وامتى ممكن يتم الإعلان عن الحكومة الجديدة ؟
خلال أيام قليلة هيكون تشكيل الحكومة اكتمل والسيسي هيعرضها على البرلمان اللى هيعقد جلسة خاصة لمنح الحكومة الثقة وبعدها هتؤدي اليمين الدستورية وتبدأ ممارسة مهام عملها على طول

وهل رئيس الحكومة وحده هيقدر يعمل حاجة ؟ 
الرئيس السيسي بيعول على وزراء المجموعة الاقتصادية انهم يكون عندهم حلول بره الصندوق ويقدروا يلاقوا حلول للمشاكل والأزمات اللى بتعانى منها مصر وعشان كده دول أكتر وزراء السيسي بيتابع اختيارهم بنفسه وكلهم او غالبيتهم هيكونوا من خلفيات مالية يعنى ناس شغالين فى القطاع المصرفي أو فى الصناعة والاستثمار عشان يكونوا فاهمين فى ملفاتهم والتشكيل هيكون مالى بحت والمفاجأة الأكبر ان رئيس الحكومة نفسه هيكون من خلفية مالية مش سياسي 
ومعظم و الحقب الوزارية الاقتصادية هتكون من القيادات البنكية خاصة بعد النجاح الكبير اللي عملو وزير السياحة احمد عيسي واللى تجربته الناجحة فى السياحة شجعت القيادة السياسية على تكرارها فى وزارت تانية