أهم 24 ساعة في 2023 .. مصر هتتنقل نقلة تانية خالص

 
خلاص باقي أقل من 24 ساعة ومصر تحقق رسميا واحد من أهم أهدافها في آخر كام سنة بالانضمام لتجمع بريكس مع بداية 2024 وفقا لما تم الاعلان عنه فى اجتماع أغسطس الشهير باعلان بريكس قبول عضوية 5 دول هي مصر وإثيوبيا وإيران والمملكة العربية السعودية والإمارات العربية المتحدة.. فيا ترى مصر هتستفاد ايه من الانضمام لبريكس؟ وايه تداعيات انضمامها على الاقتصاد والاستثمار وأزمة نقص العملة؟ وهو ايه أصلا تجمع بريكس ده ؟ ومين أعضاؤه ؟ وايه حجم تأثيره على الاقتصاد والتجارة العالمية؟
 

 
بداية من بكره مصر هتنضم رسميا الى تحالف بريكس اللى بيعتبر واحد من أهم التجمعات الاقتصادية العالمية وبيسيطر على اكتر من 30% من حجم التجارة العالمي.. وبيضم دول عظمى زي الصين والهند وروسيا بجانب دول تانية مجموع سكانها تقريبا نص سكان كوكب الأرض
طب ايه اللي هيحصل لما مصر تنضم رسميا للبريكس وإيه اللي هتستفادو؟
انضمام مصر للبريكس فرصة عظيمة عشان تحرر اقتصاد مصر من تبعية الدولار ولو جزئيا ودا كان السبب الأكبر وراء طلب القاهرة عضوية بريكس لأنه على حسب النظام الداخلي للتجمع المعاملات البينية بين الدول الأعضاء بتتم بالعملات الوطنية ومصر هتوفر 32 مليار دولار تقريبا بمجرد دخولها البريكس لأن المبلغ دا هو حجم التبادل التجاري بين مصر دلوقتي وبين دول التحالف
كمان مصر هترفع من حجم التبادل دا مع دول البريكس وهتقلل التبادل مع دول تانية بتتعامل بالدولار ودا لتقليل أكبر قدر ممكن من الاعتماد على العملة الأمريكية
كمان مصر هتستفاد من عضوية بريكس بترويج فرصها الاستثمارية داخل دول التجمع لأن ساعتها هيكون ليها الأولوية حسب نظام المجموعة يعني دول بريكس ملزمة تستثمر في أسواق الدول الأعضاء قبل الأسواق التانية 
وكلنا عارفين حجم الفرص الاستثمارية الضخمة في مصر واللي تستوعب مئات المليارات من الدولارات سواء في المدن الاقتصادية أوالصناعية أو اللوجستيات وخدمات النقل بجانب السياحة والزراعة والتعدين.
مصر هتستفاد كمان من دخول البريكس من خلال تلقي تمويلات كبيرة من بنك التنمية الجديد التابع لبريكس واللي بيدي قروض بفايدة أقل من باقي المؤسسات المالية الدولية زي البنك الدولي وصندوق النقد وكمان بمدة سداد طويلة ودا غير برامج مالية تانية كبيرة هتحصل عليها مصر.

طب هل ده ليه علاقة بأزمة الدولار .. يعنى هل انضمام مصر لبريكس ممكن يساعد فى حل أزمة نقص العملة؟ 
انضمام مصر لبريكس وتوقيعها على اتفاقيات مبادلة عملات محلية مع بعض الدول الأعضاء فى التجمع هيساهم فى تقليل الاعتماد على الدولار واللي سعره هينزل طبعا في سوق الصرف نتيجة قلة الطلب عليه وبالتالي الأسعار هتنزل بشكل كبير جدا وقيمة الجنيه هترفع كمان بسبب الطلب عليه في دول بريكس وقدام الدولار لأول مرة حسب قانون العرض والطلب.
طب هل فيه مكاسب تانية هتعود على مصر من الانضمام لبريكس؟ 
فيه مكاسب تانية طبعا زي زيادة عدد السياح القادمين إلى مصر بالتزامن مع تطلع الدولة المصرية لجذب 30 مليون سائح خلال ال 5 سنين الجايين ، وخاصة أن دول البريكس بتمتلك قدرات اقتصادية كبيرة، وكمان خلق فرصة لتنشيط الصادرات المصرية، بشكل  يخفف الضغط على النقد الأجنبى وتعزيز حركة التبادل التجارى مع دول المجموعة، فضلًا عن الحصول على منتجات ومواد خام بأسعار منخفضة.
كمان هيكون فيه استفادة من خبرات الدول المشاركة في زيادة معدلات التصنيع والإنتاج، وخلق سوق مشتركة لترويج السلع والمنتجات المصرية في ظل التوازنات المرتقبة اللى  بتُصنع على المستوى الدولي والإقليمي