البنك بقي في جيبك .. مفاجآت جديدة من البنك المركزي على انستاباي

 
 
مين كان يصدق إن يجي الوقت اللي هنتخلص فيه من مشوار البنك التقليدي ومن الحجز والطوابير والرحمة ومعلش السيستم وقع .. ونقدر نخلص كل حاجة وخدمة بنكية في دقايق ومهما كانت ويعني ببساطة كده بقي معاك بنك كامل في ايدك أو في جيبك عبارة عن تطبيق سهل وآمن في موبايلك.. ايه هو انستاباي وايه الخدمات الجديدة اللي بيقدمها وازاي هيكون المستقبل
 

 
اكيد كلنا أو أغلبنا سمع عل. تطبيق إنستا باي  ولو أول مرة تسمع عنه فدا حضرتك عبارة عن بنك على موبايلك أو  تطبيق مرخص ومُعتمد م البنك المركزي المصري وآمن ووظيفته توفير خدمة المدفوعات اللحظية، من كل اتجاه سواء تحويل فلوسك من حساب لحساب تاني او  من حساب لمحافظة الكترونية أو دفع لحظي لاي حاجة وتطبيق انستاباي هو المستقبل لانه بيتطور ويتجهز بخدمات جديدة كل يوم عشان تخليك تعمل كل معاملاتك المالية وانت في البيت أو في الشارع أو في الكافيه أو الجامعة أو حتى وانت في السينما يعني في أي حتة وتطبيق انستاباي بيتم تطويره  من خلال شركة بنوك مصر.
كل اللي عليك انك تنزل تطبيق انستاباي من متجر الهاتف وبعدها تدخل تعمل حساب كانك بتعمل حساب جديد على فيسبوك وهتمشي في خطوات وفي دقيقتين هتكون عملت الحساب ومعاك الأرقام السرية للدخول في أي وقت على حسابك الخاص او الاكونت على انستاباي ومن اللحظة دي انت بقيت تقدر تعمل اي معاملات بنكية أو مالية كنت تروح تقف عشانها بالساعات في طابور البنك

وعشان نفكركم البنك المركزي اعتمد في وقت سابق من شهر مارس اللي فات تعديلات جديدة خاصة بزيادة الحدود القصوى لقيمة المعاملة اليومية والشهرية باستخدام خدمة تطبيق انستا باي وبدأ تطبيق القرار اعتبارًا من 15 مارس 2023.
وعشان كده فيه ناس كتير كتبت وسألتنا في التقرير اللي فات عن عالم الانستاباي أسئلة كتيرة عن التطبيق ومنها  حدود السحب من تطبيق إنستا باي.. شوف حضراتكم أي معاملة أو نظام تشغيل في التطبيق البنك المركزي هو اللي بيعتمده وهو تطبيق قابل للتطوير يعني ممكن كل شوية نلاقي خدمة جديدة أو تعديل على خدمة موجودة وهكذا وأما بخصوص حدود السحب فالبنك المركزي حدد قيمة الحد الأقصى للمعاملة الواحدة على تطبيق إنستا باي 70 ألف جنيهًا.
أما بخصوص الحد الأقصى لقيمة المعاملة في اليوم الواحد على تطبيق إنستا باي هو 120 ألف جنيه

اما الحد الأقصى لقيمة المعاملة خلال الشهر على تطبيق انستا باي هو مبلغ 400 ألف جنيه.. يعني مش هتقدر تحول فلوس أو تستقبل لو معاملاتك على التطبيق عدت المبلغ دا.. وعلى فكرة دي في البداية الأول وعشان لسه بيتم تقييم الانستاباي والمركزي بيحكم الموضوع بجد أقصى لغاية ما يتم تأهيل كل المنظومة الالكترونية أنها تتحمل توسيع الخدمات المالية وفي نفس الوقت المركزي والشركة اللي مصممة سيستم انستاباي تقدر تقيم الاداء وتضيف اي تعديلات.

وعلى فكرة المركزي عدل الحدود القصوى للمعاملات المالية على انستاباي لأنها كانت اقل من كده في بداية تشغيل التطبيق وزيادة المعاملات جت بعد الاقبال الكبير جدا على استعمال انستاباي وعشان كده بنقولك لسه هيكون فيه تطوير وتعديلات تانية كتير هتخلي انستاباي دا بنك متكامل في جيبك.