الدهب ولع والحديد زاد.. تستثمر فلوسك في ايه ياتري

ناس كتير محتارة تشغل مدخراتها سواء في البنوك أو السيولة الزايدة معاها في ايه بعد ما الدهب سعره ولع وبعد ارتفاع أسعار العقارات نتيجة ارتفاع أسعار مواد البناء.. في بانكير هنقواك تشغل فلوسك في ايه.
 

في الطبيعي الناس بتستثمر فلوسها ومدخراتها في 4 حاجات وهي الدهب والعقارات والوحدات السكنية والتجارية وفي شهادات الادخار أو عمل مشروعات خاصة وبعد ارتفاع أسعار الدهب والعقار ناس كتير بقت مترددة تحط فلوسها فين.. شوف حضرتك لو معاك قرشين زيادة طبيعي تشوف اكتر حاجة بتكسب وتحطها فيها وخلينا نقولك مفاجأة أنك ممكن تستثمر دلوقتي في الدهب رغم سعره الغالي لانه استثمار مش بيخسر ابدا وبيحتفظ بالفلوس وبيكسب لكن على المدى البعيد وكل التوقعات بتقول إن الأسعار لسه هتزيد طالما فيه أزمات دولية وارتفاع في السعر العالمي وارتفاع أسعار الدولار يعني حتي لو اشتريت دهب دلوقتي وصبرا عليه انت هتكسب ونفس الأمر للعقارات لأن اسعار مواد البناء وهي السبب الرئيسي في ارتفاع أسعار العقارات مرتبطة بردوا بالدولار ولسه هتزيد .
لكن تفضل الخيارات الافضل للاستثمار دلوقتي هي شهادات الادخار اللي بتطرحها البنوك بعوايد عالية ودي لأنها استثمار مضمون وآمن ومفيهوش مخاطرة ومفيهوش تعب بتودي فلوسك وتشتري شهادات وتقبض عوائدها من غير اي مجهود أو تشغل وقتك لكن خبراء الاقتصاد بيفضلوا دلوقتي الاستثمار في المشروعات الخاصة لأنها أسرع وسيلة تحافظ على الفلوس وتجيب عايد يومي أو شهري او حتي سنوي لكن مشكلة الاستثمار في المشروعات بيتطلب وقت فراغ عشان تتابع مشروعك.
وفيه اكتر من حل تاني تقدر تستثمر فيه فلوسك الزيادة غير الحاجات اللي قلنا عليها زي مثلا تشتري أسهم في شركات ناجحة في البورصة ودي مكسب بيكون كبير لكن محتاج متابعة دقيقة للأسهم اللي هتشتريها وفي الاستثمار دا بالذات انت محتاج مستشار مالي شاطر سواء شركة أو أفراد عشان تختار الاسهم الصحيحة وتابعها والبورصة عالم كبير جدا ومحتاجة خبرة ومتابعة ، وفيه كمان استثمار تاني لفلوسك وهي انك تدخلها في نشاط مضمون عن طريق الغير يعني لو فيه تاجر كبير في أي نشاط وفاهم في شغلانته فأنت تقدر تعرض عليه يوسع نشاطه بفلوسك وتستفادو انتوا الاتنين.
في كل الأحوال لازم تشغل فلوسك في الزمن الصعب دا لانك لتضمن إن قيمتها ما تنزلش وفي نفس الوقت قيمتها تزيد وتحسن دخلك وفيه اكتر من طريقة زي ما شرحنا لحضرتك.