وقف بطاقات الائتمان بالخارج.. إيه اللي بيحصل في البنوك

إيه اللي بيحصل في البنوك في الساعات الأخيرة وإيه حكاية وقف بطاقات ائتمانية وإيه حكاية الطلب الزيادة على البطاقات في الفترة الأخيرة وعلاقتها بتجارة الدولار.

فاكرين طبعا قرار البنك المركزي المصري  من شهور لما قرر وقف التعامل ببطاقات الخصم خارج البلاد، وتحديد استخدام البطاقات الائتمانية داخل مصر وخارجها للمعاملات خارج مصر بنحو 250 دولار، لو فاكرين بردوا إن القرار دا كان بعد رصد المركزي استخدام البطاقات دي بشكل مريب واكتشاف إنه بيتم استغلال الحسابات الدولارية والسحب منها بارقام كبيرة والمتاجرة بيها في السوق السودا وبعد رجع المركزي وخفف الإجراءات دي.

المهم يظهر كدا إن المعاملات المريبة دي رجعت تاني بدليل إن مصادر مصرفية كشفت لبانكير إن فيه بنوك قررت في الساعات الأخيرة وقف الاستخدام الخارجي (خارج مصر) لبطاقات الائتمان الصادرة حديثا لمدة 6 أشهر من استخراجها.

وحسب المعلومات قرار الوقف بيسري على البطاقات اللي صدرت اعتبارًا من 20 ديسمبر الجاري بس واللي فيها شك إنها اتعملت لأهداف تانية ملهاش علاقة بالمعاملات البنكية بدليل إن البنوك سابت البطاقات قبل التاريخ دا مفعلة.

المهم المصادر كشفت إن قرار وقف البطاقات دي بعد رصد كثافة توجه المواطنين لاستصدار بطاقات ائتمان خلال فترة معينة ودا شكل ضغط اضافي على النقد الأجنبي في مصر، وتقريبا زي ما قلنا فيه شبهة في الموضوع.

المعلومات اللي وصلت بانكير بتقول إن إدارات بعض البنوك وجهت تعليمات لفروعها بخصوص تعديل قواعد الاستخدام الخارجي للبطاقات الائتمانية وبناء عليه تقرر عدم اتاحة الاستخدام الخارجي للبطاقات الائتمانية المصدرة بداية من تاريخ 20 ديسمبر 2023 ولمدة 6 شهور من تاريخ الإصدار سواء ( البطاقات الأساسية / الإضافية ) على أن يتم اتاحة الاستخدام للبطاقات بعد انتهاء تلك الفترة ( 6 أشهر ( طبقاً للحدود المقررة بالبنك.
يعني الموضوع كله شهور معينة واجراء وقائي لضمان عدم الاستغلال السيء للبطاقات وإلا كان تم تعميم الإجراء على كل البنوك وأصحاب البطاقات.