هل تتحقق نبوءة ساويرس عن الدهب؟... سعر الجرام هيوصل لمراحل صعبة

من حوالى 4 او 5 أيام كده رجل الأعمال نجيب ساويرس قال تصريح مهم جدا عن مستقبل الدهب محدش خد باله منه ولا ركز معاه رغم انه تصريح خطير وبيكشف مستقبل المعدن النفيس رايح على فين .. والتصريح ده أهميته انه بيرسم طريق لكل واحد بيفكر يستثمر في الدهب لأن ساويرس قال فيه توقعاته لسعر الدهب عالميا والأمور ممكن توصل لفين في السنة الجديدة .. فيا ترى ممكن تتحقق نبوءة ساويرس عن الدهب ؟ وهل سعر الجرام في مصر ممكن يوصل ل 4 الاف جنية على آخر 2024 ؟ وليه أسعار المعدن النفيس بتقفز القفزات المرعبة دي في الأيام الأخيرة ؟
 

في البداية كده لازم تعرف ان نجيب ساويرس هو اول واحد في مصر قال من ييجي 6 سنين ان المستقبل هو الاستثمار في الدهب وخصص محفظة مالية ضخمة للاستثمار في الذهب وكان شايف م بدرى الدنيا رايحة فين وعشان كده لما يتكلم عن مستقبل الدهب لازم تسمع وتفكر كويس جدا في كلامه
طب ساويرس تنبأ بايه لأسعار الدهب في 2024 ؟
لما سألوا نجيب ساويرس عن توقعاته لمستقبل قال ان الدهب يعتبر من أهم الملاذات الآمنة لتجنب مخاطر سعر الصرف وأكد انه بيتوقع وصول سعر أوقية الدهب عالميا إلى 2400 دولار خلال الفترة الجاية .. وأكد كمان أنه من المفترض ارتفاع احتياطي مصر من الذهب بنحو مليار إلى 2 مليار دولار نتيجة زيادة سعر الذهب
وتوقع ساويرس واستمرار ارتفاع أسعار الدهب  مدعومة بالطلب على الملاذ الآمن والتوقعات المتطورة لأسعار الفائدة الأمريكية.
يعنى ساويرس بيقولك اهو من دلوقتى ومن قبل ما 2024 تبدأ أصلا ان سعر الدهب خلال سنة هيزيد حوالى 350 دولار مرة واحدة في الاوقية  
ونشر مجلس الذهب العالمي تقرير حول أداء الدهب لعام 2024 أشار فيه الى ان الدهب ممكن يتحرك ضمن نطاق ولكنه هيشهد تقلبات واضحة بسبب تداخل العوامل المؤثرة عليه خلال السنة الجاية سواء أداء الاقتصاد الأمريكي وسياسة البنك الفيدرالي أو التطورات الجيوسياسية والطلب من قبل البنوك المركزية العالمية.
وبيرى مجلس الذهب العالمي أن الدعم هييجى للدهب من التطورات الجيوسياسية خصوصا ان أهم عاملين كانوا مؤثرين على أسعار الدهب في 2023 كان انهيار بنك سيليكون فالي في الولايات المتحدة وهجوم حركة حماس على الكيان الصهيوني، لتتسبب الأحداث الجيوسياسية في ارتفاع سعر الذهب ما بين 3% و6% على مدار السنة اللى فاتت .

و 2024 هيشهد إجراء انتخابات كبرى على مستوى العالم، بما فيها الولايات المتحدة والاتحاد الأوروبي والهند وتايوان ومن المرجح تزايد حاجة المستثمرين للتحوط في الدهب بشكل أعلى من المعتاد في محافظهم المالية في الفترات دي. .
كمان مشتريات البنوك المركزية للدهب من المتوقع أنها تكون عامل مهم لدعم الدهب خلال 2024 لأنها كانت مصدر رئيسي للطلب على الدهب في 2023 اللي من المتوقع يكون عام قياسي في مشتريات الدهب وده هيستمر كمان في 2024. 

ووفقا لمجلس الذهب العالمي ف الطلب من قبل البنوك المركزية ساعد على ارتفاع الدهب بنسبة 10% أو أكتر خلال 2023 وحتى لو  ما شهدتش 2024 مشتريات قياسية فمجرد  استمرار المشتريات في حد ذاته بوتيرة مرتفعة هيعمل على دعم الدهب.