لغز استمرار ارتفاع أسعار الدهب بعد قرار الفايدة.. وامتي السوق هيستقر
ليه سوق الدهب لسه مضطرب وليه الأسعار بتزيد رغم قرار البنك المركزي بتثبيت الفايدة وامتى الدولة توقف التعاملات وتقفل السوق
هي اسعار الدهب رايحة على فين.. دا السؤال اللي المصريين بيسألوه لنفسهم كل شوية بعد ما موجة الارتفاع الشديد في الأسعار وازاي عيار 21 وصل 3030 جنيه في بداية تداولات الخميس ودا غير المصنعية ،والشباب هيخطب ويتجوز ازاي.. شوف حضرتك كل حاجة بتحصل في السوق ليها سبب واللي بيحصل في سوق الدهب دا طبيعي للاسف نتيجة حالة القلق اللي العالم بيعشوا ونتيجة اللي بيحصل في المنطقة من صراع وأحداث يتهدد التجارة الدولية في العالم كله والقلق اللي في البحر الاحمر ودا غير الأزمة الروسية واللي بتزيد كل يوم بسبب العقوبات الامريكية والغربية على الروس اللي بتعتبر روسيا مخزن حبوب العالم.
ايوا الاضطرابات والحروب هي اللي بتخلي الدهب سعره يولع لأن البنوك المركزية في العالم بتتصرف زي الأفراد بالظبط لما يحصل أي توتر وبتشتري دهب بكميات كبيره جدا لانه ملاذ آمن ضد تقلبات الأسواق بسبب الأحداث السياسية والعسكرية وعشان كده الدهب سعره بيزيد جدا عالمياً في وقت الحروب والصراعات وطبعا سعره في مصر بيزيد اكتر بسبب قرب الصراع على حدودنا وبسبب كمان أزمة الدولار اللي البلد عايشة فيها من شهور وزي ما إحنا عارفين الدهب مسعر بسعر دولار السوق السوداء وكمان بيتسعر بالمزاج يعني التجار هما اللي بيحددوا سعر دولار الدهب وبناء عليه بيحطوا أسعار الدهب بالجنيه وعشان كده شفنا القفزات في الأسعار اليومين اللي فاتوا.
وفيه سبب تاني مهم جدا وهو مهما الأسعار رفعت في أي سلعة فدا راجع لحالة الطلب عليها وطول مافيه طلب على الدهب وفيه نقص في المعروض الأسعار هتزيد مع حالة الأسعار العالمية كمان واستمرار التوتر في العالم وهي بيئة خصبة لارتفاع الدهب زي ما قلنا بسبب حالة الإقبال الكبير عليه في الأزمات.
طيب ليه الدهب لسه بيزيد حتى بعد قرار المركزي بتثبيت الفايدة وكان المفروض يحصل استقرار وتراجع في سعر المعدن الأصفر.. شوف حضرتك دا كان ممكن يحصل في الأوقات العادية لكن مع الأوضاع اللي احنا عايشينها والحروب حولينا والتهديدات بتاعة التجارة وأزمة الدولار والطلب على الدهب خلقت اسباب تانية وجديدة وطارئة في سوق الدهب خلته مقصد وملاذ رقم واحد وحصل عليه هجوم من البنوك المركزية ومن الأفراد وطبيعي اسعار الدهب مش هتستقر غير لما كل الظروف اللي خلته يرفع تتحل والأسواق العالمية تستقر.
