هدية الرئيس وزلزال السوق السوداء

على مدر أسبوع كامل قدمت منصات بانكير تقارير مهمة جدا خاصة بالوضع الاقتصادي واللي شغلت بال المصريين على مدار الأيام اللي فاتت.

من بين التقارير كان هدية الرئيس السيسي للمصريين بعد ساعات من إعلان فوزه وكان بخصوص ملف قعد سنين مستني يخلص وكانت الناس مستنياه بفارغ الصبر عشان يعرفوا راسهم من رجليهم وهو المصادقة على قانون التصالح في مخالفات البناء وهو القانون اللي قعد فترة كبيرة عشان يخلص وطبعا دخوله حيز التنفيذ هيحل أزمة كبيرة عند ناس كتير جدا مستنية تبني شقة ولا بيت ودي كانت هدية السيسي الاولى بعد الفوز للمصريين.

ودا خدنا للكلام عن التحديات اللي بتواجه الرئيس السيسي في فترة رئاسته الجديدة وأولها الوضع في غزة وفي السودان وليبيا وهي كلها ملفات خطر على الأمن القومي المصري في الصميم لانها كلها دول جوار وسببت الصراعات فيها إن مصر اتحملت فاتورة اقتصادية كبيرة جدا من أول استقبال اللاجئين من كل الدول اللي حوالينا وتكلفة معيشيتهم وزيادة تكلفة تأمين الحدود وغير إن دول الجوار بقت عامل سلبي بالنسبة لمصر بمعني أنها دولة بتعاني من الفوضى الاقتصادية ولو كانت دول مستقرة كان حصل تعاون اقتصادي إيجابي معاها لكن مصر اضطرت تدور على دول تانية بعيدة في دايرة ابعد عشان تتعاون معاها ومعروف إن دول الجوار لاي دولة هي اللي بيكون بينهم تعاون وتكامل اقتصادي كبير لكن مصر حظها كده حتي في جيرانها... دا غير مشكلة الدولار والتضخم وارتفاع الاسعار

منصات بانكير قدمت كمان تقرير مهم عن قرار البنك المركزي امبارح الخميس وتأثيره على السوق السودا للدولار

زي ما بانكير أتوقع لجنة السياسة النقدية للبنك المركزي المصري ثبتت في اجتماعهـا، الخميس، أسعار الفايدة على الجنيه بمعدلاتها الحالية عند مستوي 19.25%، 20.25% و19.75% على الترتيب. كما تم الإبقاء على سعر الائتمان والخصم عند مستوي 19.75%.

طبعا قرار المركزي نزل زي الصاعقة على تجار العملة ودا لأنه أي اخبار حلوة أو إيجابية عن الاستقرار في الاقتصاد بتعتبر مصيبة في السوق السودا للدولار لأنها بتأكد إنه مفيش أزمة ولا فيه تحركات خطيرة في الاقتصاد وإن مفيش أي داعي للذعر بين الناس ولا التجار وبتقول كمان إن الاقتصاد المصري قوي جدا، وصامد وقادر يمتص أي أزمات في الطريق.

متوقع طبعا الأيام الجاية أسعار الدولار في السوق السودا هتنهار بعد قرار المركزي النهاردة وكمان بعد تصريحات الدكتور مصطفي مدبولي رئيس الوزاؤ الأخيرة بخصوص إن فيه اتفاق شامل وجديد مع صندوق النقد الدولي واللي أكد حسب كلام مدبولي دعمه للاقتصاد المصري بقوة يعني فيه تمويلات خارجية كبيرة جاية.. 
 

منصات بانكير عرضت كمان تقرير مهم بخصوص اللي بيحصل في سوق الدهب الفترة اللي فاتت.

وشفنا طبعا كلنا اللي بيحصل في سوق الدهب وازاي قفز امبارح الاربعاء في اخر التعاملات ووصل 3 آلاف جنيه لعيار 21 ووصل الجنيه الدهب لـ24 ألف جنيه والغريبة إن لسه فيه توقعات أن الدهب هيوصل ل3500 جنيه العيار الأشهر في مصر في الأيام الجاية..

الحقيقة المصريين لما يحسوا إن فيه حاجة ممكن تحصل قريب زي التعويم أو ارتفاع التضخم أو ارتفاع الدولار بيجروا على الصاغة ويشتروا بكميات كبيرة وحسب خبراء الصاغة طول ما فيه أزمات وكلام كتير عن التعويم هيستمر الطلب على الدهب وطول مافيه طلب زيادة يبقي الأسعار هترفع كل شوية لأن الطلب اكتر من المعروض بالإضافة طبعا لأسعار الدولار والدهب بره مصر وغير إن بيحصل تلاعب بردو في سوق الدهب عشان بعض التجار الكبار يستفادوا من سعره العالي وهو تعطيش السوق شوية وتقليل المعروض عشان يضمنوا من ناحية يكسبوا كتير وفي نفس الوقت يبقي عندهم كميات دهب يقدروا يلاعبو بيها السوق..