أخطر 5 أسئلة عن الدولار المجمد.. بييجي منين؟ وتعرفوا إزاي؟ وإيه اللى لازم تاخد بالك منه؟

من كام يوم كنا أول ناس فى مصر بفضل الله طلعنا وحذرنا من خطورة انتشار الدولار المجمد فى سوق صرف وتداول العملات.. وقولنا ان فيه كتير من اللى بيلجأوا للسوق السودا ممكن يقعوا فريسة ويخسروا كل مدخراتهم.. وفى الساعات اللى فاتت انتشرت أخبار عن وجود كميات كبيرة من الدولار المجمد بين المتعاملين في السوق السودا.. وده عمل حالة من البلبلة في السوق وأثار العديد من التساؤلات، زي ايه هو الدولار المجمد؟ وبيجي منين؟ وليه تم تجميده؟ وايه مصير اللى يتعامل بيه؟ وأسئلة تانية كتيرة هنحاول نرد عليها فى الفيديو ده 
 

وخلينا نبدأ بايه هو الدولار المجمد؟
والدولار المجمد هو دولار سليم مش مزور، صادر عن الحكومة الأمريكية والبنك الفيدرالي الأمريكي، زيه زي أى دولار أمريكي تانى ليه سيريال نامبر ورموز ووسائل الحماية نفسها لكن تم تجميده من قبل الحكومة الأمريكية ممثلة في البنك الفيدرالي بمعنى أنه يمكن تداوله محليا فقط بين المواطنين الأمريكان لكن لا يمكن تداوله أو استخدامه في المعاملات الخارجية أو داخل البنوك المحلية والدولية.
لماذا يتم تجميده؟
عند حدوث حروب في دولة ما أو انهيار للحكومة وحدوث عمليات نهب للأموال وتهريبها بشكل كبير، أو وجود خلاف سياسي شديد بين الولايات المتحدة وأي دولة تانية، وقيام دولة بتمويل عمليات إرهابية من وجهة النظر الأمريكية، الحكومة الأمريكية ممثلة في البنك الفيدرالي الأمريكي بتقوم بإصدار نشرة تحدد فيها مثلا أن الدولارات من رقم كذا إلى رقم كذا مجمدة، أي أنها غير قابلة للتدوال في البنوك ولا الصرافات الرسمية في العالم كله.
طب وايه مصير الدولارات المجمدة عند الدول التانية (غير المستهدفة بقرارات الفيدرالي الأمريكي)؟
الدول اللى بيكون عندها كميات من الدولار وقامت الحكومة الأمريكية بتجميدها، بتقوم بتجميع الكميات دي  وإرسالها للبنك الفيدرالي الأمريكي لاستبدالها بدولارات سارية خلال مدة بيكون البنك الفيدرالي محددها في النشرة الدورية اللى بيعلن فيها تجميد عدد ما من الدولارات.
طب الدولار المجمد بييجي منين ؟
زي ما قولنا من شوية من دول فيها مشاكل زي الحروب أو تخضع لعقوبات من الحكومة الأمريكية، أو حصل فيها عمليات تهريب واسعة للأموال زي ما حصل فى ليبيا عقب انهيار نظام القذافي، والعراق عقب حرب العراق واحتلاله، ولبنان والسودان وغيرهم من الدول اللى ليها نفس الظروف المشابهة، وبالتالي خوفا من استغلال الأموال دي في تمويل عمليات إرهابية ورغبة في السيطرة عليها أو رغبة الحكومة الأمريكية في الضغط على دولة ما أو جماعة ما بتقوم الحكومة الأمريكية بتجميدها.
وازاى  الحكومة الأمريكية بتعرف أرقام الدولارات في دولة معينة؟
البنك المركزي الأمريكي بيلزم البنوك المركزية في العالم بإخطاره بالـ"سيريال نامبر" لكل الدولارات الموجودة لديها بشكل دورى، وده  بيسهل عليه معرفة مكان وعدد وأرقام الدولار المستهدف.
وهل ممكن يكون الدولار المجمد موجود فى مصر حاليا؟
بالنسبة لمصر وجود الدولار المجمد ليست بسبب حرب أو عقوبات أمريكية، ولكن بسبب وجود سعرين للدولار في السوق المصري أحدهما رسمي والآخر غير رسمي (سوق سوداء) وده بيفتح شهية البعض لتحويل الدولار إلى سلعة والمضاربة عليه واستغلال حاجة بعض المستوردين وغيرهم للدولار ورغبة كتير من المواطنين في تحويل مدخراتهم من الجنيه إلى الدولار تحوطا من تغير سعر الجنيه مع وجود أحاديث عن قرب عملية تعويم جديدة خصوصا أنه في بعض الحالات بيتم تداوله وعرضه بأسعار أقل حتى من السعر الرسمي حتى أنها وصلت إلى 25 جنيها للدولار المجمد.
وازاي  الدولار المجمد بيهدد المتعاملين في السوق السوداء بخسارة أموالهم وسجنهم؟
أغلب الدولار الموجود في السوق السوداء هو دولار مجهول المصدر، وبيتم تداوله بين مواطنين عاديين أغلبهم ميعرفش ومعندهوش  إمكانية يعرف أن الدولارات دي مجمدة أو غير مجمدة وسهل جدا يتورط في شراء كميات كبيرة من الدولار للأغراض اللى فاتت، لكنه لما  يحاول استخدامها في دفع قيمة بضائع في الخارج أو حتى شراء شهادات في البنوك المحلية بالدولار أو تحويلها إلى عملة تانية،البنوك وماكيناتها هتكتشفها بسهولة وهيتم اتخاذ الإجراءات القانونية ضده، بالتالي مش هيخسر فلوسه بس لكن كمان هيتعرض للمساءلة القانونية عن مصدر العملات دي وممكن يتعرض للسجن والغرامات الكبيرة ومصادرة الأموال المضبوطة.