ايه آخرة سوق الدهب.. أصعب يوم في تاريخ الصاغة
ايه اللي بيحصل في سوق الدهب وليه الصاغة مقلوبة والأسعار رايحة على فين وامتي الدهب بقي يستقر ويبطل قفزاته وجنونه وهل دلوقتي هو وقت البيع ولا لسه الدهب هيرفع تاني
شفنا طبعا كلنا اللي بيحصل في سوق الدهب وازاي قفز امبارح الاربعاء في اخر التعاملات ووصل 3 آلاف جنيه لعيار 21 ووصل الجنيه الدهب لـ24 ألف جنيه والغريبة إن لسه فيه توقعات أن الدهب هيوصل ل3500 جنيه العيار الأشهر في مصر في الأيام الجاية..
عشان ماتحيرش نفسك كل ما تلاقي الدهب بيزيد اكتر من مرة في اليوم الواحد يبقي تفهم على طول إن فيه أزمة أو أخبار أو إشاعات أو إجراءات اقتصادية تمت، وحصل هجوم على الدهب في محلات الصاغة عشان الناس تشتري بشكل كبير.. المصريين يافندم عندهم احساس نفسي بالأمان ناحية الدهب وإنه هو اكتر ملاذ بيلجأو ليه وقت الأزمات أو لما يحسوا إن فيه حاجة ممكن تحصل قريب... طيب المصريين خايفين من ايه خلاهم يشتروا دهب ويحصل طلب كتير عليه.. طبعا مفيش غير الكلام عن التعويم وتحرير سعر الجنيه وقيمته اللي هتنزل رغم إن الملف دا لسه قدامه شوية.
وطبعا بجانب إحساس المصريين وخوفهم على فلوسهم فيه أسباب تانية اقتصادية زي سعر الدولار واللي الدهب بيكون ليه سعر خاص بيه في السوق السوداء غير السعر اللي في البنوك ودا سبب رئيسي في الزيادات الكبير الأخيرة وكمان فيه اسعار الدهب العالمية والمشاكل اللي في المنطقة وارتفاع أسعار السلع في الأسواق وهتلاقي فيه اسباب كتير بتخلي فيه حالة قلق عام في الأسواق والناس خايفة من اللي جاي وعشان كده بتشتري دهب على طول .
خبراء الصاغة شايفين إن طول ما فيه أزمات وكلام كتير عن التعويم هيستمر الطلب على الدهب وطول مافيه طلب زيادة يبقي الأسعار هترفع كل شوية لأن الطلب اكتر من المعروض بالإضافة طبعا لأسعار الدولار والدهب بره مصر وغير إن بيحصل تلاعب بردو في سوق الدهب عشان بعض التجار الكبار يستفادوا من سعره العالي وهو تعطيش السوق شوية وتقليل المعروض عشان يضمنوا من ناحية يكسبوا كتير وفي نفس الوقت يبقي عندهم كميات دهب يقدروا يلاعبو بيها السوق..
اكيد الأسعار مش هتهدى في الصاغة غير لما اسباب ارتفاعها تتتغير والجميع يعرف مصيره والمركزي يحسم سعر الفايدة النهاردة ويكون فيه رد واضح عن التعويم وتنتهي أزمة الدولار وغير كده كل شوية هتلاقي فيه أزمة بتحصل في أسعار الدهب والنهاردة اجتماع المركزي لحسم مصير الفايدة وهيجاوب على أسئلة كتيرة في السوق ويكون يوم صعب.
