اسم تقيل ويحظى بثقة السيسي شخصيا.. بديل مدبولي المنتظر؟
الدستور نظم في مادته ١٤٦ ضوابط تشكيل الحكومة الجديدة من غير النص علي إلزام أن يتم ذلك عقب الانتخابات الرئاسية.. ولكن جرى العرف في مصر على قيام رئيس الجمهورية بتشكيل حكومة جديدة بعد الانتخابات الرئاسية مباشرة وعرض برنامجها على مجلس النواب للحصول على الثقة.. فيا ترى مين رئيس الحكومة الجديد اللى هيحل محل الدكتور مصطفى مدبولي ؟ ومين الوزراء الجدد الى هيتم الاستعانة بيهم في التشكيل الوزاري؟ وهل فعلا ممكن فيه وزرا من الناس القديمة يستمروا مع رئيس الحكومة الجديد؟
دستوريا الرئيس السيسي هيبدأ مهام عمله رئيسا للبلاد في الولاية الجديدة اعتبارا من اول شهر ابريل لكن وفقا لمصادر بانكير الرئيس مش هيستنى الوقت ده كله وبدأ فعليا ترتيب الأوراق فيما يتعلق بتشكيل الحكومة الجديد واختيار وجوه جديدة قادرة على تحقيق طموح الشعب والقضاء على الازمات والمشاكل اللى بتواجه المصريين في الفترة الأخيرة وفور الانتهاء من المشاروات مع الشخصيات المختارة هيتم عرض التشكيل الجديد للحكومة على البرلمان لمنحها الثقة.
طب مين بقا رئيس الحكومة الجديد اللى هيحل محل الدكتور مدبولي؟
بص لحد اللحظة اللى بنتكلم فيها مع حضراتكم دلوقتى اللى يقولك اسم معين يبقا بيقول اى كلام وده لأن الرئيس ومؤسسة الرئاسة مكتمين جدا على اسم رئيس الحكومة الجديد رغم ان الرئيس استقر عليه بالفعل واللى نقدر نقولكم عليه هو شوية معلومات حصلنا عليها من مصادرنا بتقول ان رئيس مجلس الوزراء الجديد هيكون شخصية اقتصادية من المستوى الرفيع و علاقاته بالمؤسسات المالية العالمية على أعلي مستوي ومؤثر وليه صوت مسموع جدا بره مصر في دوائر المال والأعمال
والرئيس كان واضح من أول لحظة ومقرر ان الفترة الحالية والجاية محتاجة رئيس وزراء ليه خلفية اقتصادية مش سياسية لأن الأوضاع والمشاكل اللى بتعانى منها مصر هي مشاكل اقتصادية بالأساس
يعنى مش ممكن يجدد الثقة في الدكتور مصطفى مدبولي؟
الدكتور مصطفى شخص وطنى ورئيس وزراء شاطر جدا أدى الدور المطلوب منه على أكمل وجه لكن التغيير سنة الحياة والمرحلة الجديدة محتاجة أفكار مختلفة ودماء جديدة وقيادات شابة تقدر تواكب التطور اللى بيحصل في العالم كله .. وفيه اهتمام كبير باختيار كفاءات على أعلى مستوى خصوصا في المجموعة الاقتصادية والوزرات المعنية بخطط الدولة الاقتصادية سواء في الاستثمار او الصناعة او التجارة والتعاون الدولي
طب هل فيه وزراء ممكن يستمروا في الحكومة الجديدة؟
بنسبة كبيرة الحكومة الجديدة هتيجي بتشكيل مختلف تماما وكل وجوه جديدة لأن زي ما قولنا لحضراتكم الرئيس السيسي عاوز أفكار مختلفة ورؤى جديدة تقدر تساهم في الخروج من مرحلة عنق الزجاجة اللى مصر بتعانى منها من فترة طويلة فطبيعى اختيار وجوه جديدة لكن عندها رصيد من النجاحات على المستوى المهنى
وامتى ممكن يتم الإعلان عن الحكومة الجديدة ؟
خلال أيام قليلة هيكون تشكيل الحكومة اكتمل والسيسي هيعرضها على البرلمان اللى هيعقد جلسة خاصة لمنح الحكومة الثقة وبعدها هتؤدي اليمين الدستورية وتبدأ ممارسة مهام عملها على طول
