ايه حكاية صفقة المليار دولار ومين هي "ايكون" ومصير فنادق مصر التاريخية

ايه حكاية صفقة المليار و300 مليون دولار وايه قصة ايكون وهشام طلعت جاب الفلوس دي كلها منين وايه مصير فنادق مصر التاريخية وازاي تمت أكبر صفقة في تاريخ القطاع الخاص وايه كمان تاثير دا على الدولار..
 

من ساعات اتسربت اخبار كتير عن صفقة من العيار التقيل بين الحكومة ممثلة في صندوق مصر السيادي وبين مجموعة شركة رجل الأعمال الشهير طلعت مصطفى وعشان تعرف قد ايه الصفقة ضخمة كفاية تعرف إن قيمتها هتعدي المليار دولار.. لكن ايه هي الحكاية.
شوف ياسيدي الاخبار بتقول إن مجلس الوزراء برئاسة الدكتور مصطفى مدبولي هيوقع النهاردة الأربعاء 20 ديسمبر عقود صفقة بيع 7 فنادق تاريخية لصالح شركات تابعة لمجموعة طلعت مصطفي «الشركة العربية للاستثمارات الفندقية والسياحية- ICON». زي ما احنا عارفين إن من بين اهداف انشاء الصندوق هو تطوير اصول مصر وإعادة تأهيل الثروات المهملة وتنميتها بمعني إن الصندوق بيشوف اي اصل من اصول الدولة بيكون محتاج تطوير زي فندق قديم مثلا بس تاريخي أو مبني وزارة في منطقة مهمة جدا فبتكون مهمته إنه ياخد الأصل أو المبني دا ويطوره بس حقيقي وبعدين يطرحه للبيع في السوق المصري وبكده الدولة تكسب والصندوق يكبر موارده والأصل نفسه أو المبني بترجعله الحياة وبيضاف للثروة العقارية المصرية ودا مثال بسيط على وظيفة واحدة من وظايف الصندوق عشان هتسمع كتير الفترة الجاية إن الصندوق بيهدر الثروات وإنه مغارة على بابا والكلام المعروف ده وخليك عارف كل قرش أو دولار بيدخل الصندوق بيكون متراقب من جهات الدولة وتحت إشرافها وفيه مندوبين من المركزي للمحاسبات والرقابة المالية.
نرجع للصفقة الضخمة واللي بتقول إن الشركة العربية للاستثمارات الفندقية والسياحية «إيكون» التابعة لمجموعة طلعت مصطفى القابضة، بتقود تحالف كبير لإتمام صفقة الاستحواذ على حصة إضافية في شركة الفنادق التاريخية المصرية لترفع حصتها في الشركة إلى 51%.
وحسب المعلومات المتاحة قائمة الفنادق في الصفقة بتتضم، سوفيتيل أولد كتراكت أسوان، منتجع موفينبيك أسوان، سوفيتيل وينتر بالاس الأقصر، فندق شتايجنبرجر التحرير، وشتايجنبرجر سيسيل الإسكندرية، وفندق ماريوت مينا هاوس وفندق ماريوت القاهرة.
وقالت مصادر قريبة من الصفقة إن شركة ايكون  سددت قيمة زيادة رأس المالي للفنادق الـ 7 بقيمة 1.3 مليار دولار بعد ما كانت قدمت في وقت سابق بعرض للأستحواذ علي النسبة الأكبر بالشركة الحكومية المالكة.
وتضمنت الصفقات بيع حصة 37% من الشركة القابضة للسياحة والفنادق المالكة للفنادق عن طريق زيادة رأس المال لتحالف يضم شركة تابعة لمجموعة طلعت مصطفى بقيمة 1.3 مليار دولار.
والمفروض الدكتور مصطفى مدبولى، رئيس مجلس الوزراء، هيحضر النهاردة مراسم التوقيع الرسمي على عقود إحدى أهم الصفقات المهمة، بين الحكومة والقطاع الخاص، ضمن برنامج الطروحات، تنفيذا لوثيقة سياسة ملكية الدولة، التى سبق إقرارها واكيد طبعا هيتم كشف كل التفاصيل عن الصفقة ومصير الفنادق التاريخية وخلي بالك الصفقة بتكون مشروطة وفيها المشتري بيتعهد بالحفاظ على الشكل والقيمة التاريخية للفنادق أو الأصول دي لأن دي تاريخ وملك البلد كله يعني الشركة مش هاخد النهاردة فندق مينا هاوس التاريخي وبكل عظمته وتروح تهده .. لأ الفنادق التاريخية بتتعامل معاملة البيوت الأثرية ممنوع تغير معالمها لكن ممكن تستفاد من تاريخها.
كمان بعد التوقيع، على الصفقة مدبولي زي ما قلنا هيعمل  مؤتمر صحفى عالمى، هيشرح خلاله اخر ما وصل ليه برنامج الطروحات خلال الفترة اللي فاتت وخطة الطرح فى الفترة الجاية.