أول هدية من السيسي للمصريين بعد الفوز.. وتقرير بريطاني يتحدى الرئيس

 
من ساعات أعلنت الهيئة الوطنية المصرية للانتخابات فوز الرئيس  عبد الفتاح السيسي بفترة رئاسية جديدة في وقت المخاطر بتحاصر البلد من كل اتجاه.. وكله مستني الرئيس السيسي يعمل ايه.. ياترى الانجليز قالوا إيه عن المخاطر والملفات شديدة الخطورة اللي مستنية السيسي في الولاية الجديدة وايه هو أول قرار للرئيس السيسي وهيعمل ايه في اللي جاي.
 

 
الرئيس السيسي خد أول قرار في ولايته الجديدة بعد ساعات من إعلان فوزه وكان بخصوص ملف قعد سنين مستني يخلص وكانت الناس مستنياه بفارغ الصبر عشان يعرفوا راسهم من رجليهم وهو المصادقة على قانون التصالح في مخالفات البناء وهو القانون اللي قعد فترة كبيرة عشان يخلص وطبعا دخوله حيز التنفيذ هيحل أزمة كبيرة عند ناس كتير جدا مستنية تبني شقة ولا بيت ودي كانت هدية السيسي الاولى بعد الفوز للمصريين.

شبكة بي بي سي البريطانية وهي مقربة من دوائر صنع القرار في بريطانيا نشرت تقرير بتحذر فيه من حجم التحديات اللي بتواجه السيسي في فترة رئاسته الجديدة وقالت إن مصر بتمر بظروف صعبة جدا بتهديد أمنها القومي أولها الوضع في غزة وفي السودان وليبيا وهي كلها ملفات خطر على الأمن القومي المصري في الصميم لانها كلها دول جوار وسببت الصراعات فيها إن مصر اتحملت فاتورة اقتصادية كبيرة جدا من أول استقبال اللاجئين من كل الدول اللي حوالينا وتكلفة معيشيتهم وزيادة تكلفة تأمين الحدود وغير إن دول الجوار بقت عامل سلبي بالنسبة لمصر بمعني أنها دولة بتعاني من الفوضى الاقتصادية ولو كانت دول مستقرة كان حصل تعاون اقتصادي إيجابي معاها لكن مصر اضطرت تدور على دول تانية بعيدة في دايرة ابعد عشان تتعاون معاها ومعروف إن دول الجوار لاي دولة هي اللي بيكون بينهم تعاون وتكامل اقتصادي كبير لكن مصر حظها كده حتي في جيرانها.

كمان سلط التقرير الضوء عن أبرز التحديات التي بتواجه الرئيس السيسي في الولاية الجديدة وهي الوضع الاقتصادي المُتأزم بعد وصول الدين الخارجي لمصر 164.7 مليار دولار بنهاية يونيو 2023، وفقا للبنك المركزي المصري وارتفاع  معدل التضخم السنوي، في أكتوبر الماضي في مصر لرقم قياسي  بعدما قفز إلى 40.3 في المئة في سبتمبر الماضي.

وصاحب  التضخم ارتفاع في أسعار الطعام والمشروبات والسلع الأساسية، ومن ضمنها الأرز والزيت والدقيق وأشار التقرير إن أزمات مصر الاقتصادية بدأت ضمن سلسلة أحداث عالمية بدأت بالصراع الروسي الأوكراني وأزمة الحبوب والصراع في ليبيا، والحرب في السودان، بالإضافة إلى جائحة كورونا.
طبعا التقرير البريطاني كان عميق وبيحلل أزمات الدولة المصرية والتحديات الكبيرة قدام السيسي واللي من بينها مصير الجنيه والتعويم وقرض صندوق النقد الدولي والاستثمار وتوحيد سعر الصرف مطلب أساسي للصندوق سواء آجلا أو عاجلا ولفت التقرير الي الخطر الجديد اللي ظهر في البحر الاحمر وباب المندب واستهداف جماعة الحوثي للسفن وناقلات النفط في المضيق المؤدي لقناة السويس واللي اتسبب في توقف بعض شركات الشحن عن مرور سفنها في البحر الاحمر وتأثير دا على قناه السويس في وقت مصر بتعاني من أزمة دولار.
طبعا كل التحديات دي وغيرها مصر قادرة أنها تواجهها زي ما واجهت اصعب منها رغم إن المرة دي الأزمات جت كلها مع بعضها والسيسي قادر  يحل كل الأزمات دي وتفكيكها.