ازاي تاخد «قروض» من البنوك بدون تحويل للراتب.. التفاصيل في الفيديو دا
أكيد القرض بتحتاجه علشان عايز تشتري عربية عايز تشتري بيت.. عفش.. حاجة من الاحتياجات الأساسية اللي مافيش غنى عنها.
وعلشان القرض ضرورة ملحة عند البعض.. النهاردة هانقول لحضراتكم على قروض بتقدمها البنوك بدون تحويل الراتب.
وطبعا في عملاء كتير يهمهم بالدرجة الأولى، يعرفوا أبرز البنوك اللي بتقدم قروض واللي بتكون من غير تحويل الراتب، بحيث يقدروا يجدولوا الأقساط بشكل مريح وحسب قدراتهم المالية وبرضوا وفقا للي بيحدده البنك.
والنهاردة هانتكلم، عن أبرز البنوك اللي بتقدم قروض شخصية للموظفين وأصحاب المهن الحرة بدون تحويل الراتب، وكمان بإجراءات وشروط ميسرة للغاية، وفترات سداد مريحة جدا.
وأول بنك معانا، هو البنك الأهلي المصري، واللي بيقدم باقة متنوعة من القروض لأصحاب المعاشات والمهن الحرة، واللي بيقدم قرض شخصي بقيمة ٧٠٠ ألف جنيه، وبفايدة متناقصة سنوية بتبدأ من ١٦.٥٪، وفترة سداد طويلة بتوصل ل ٤ سنين، وكل دا من غير أى ضامن، وبرضوا من غير تحول المرتب على البنك.
ومن خلال أي فرع للبنك الأهلي المصري، فتقدر تقدم دلوقتي على القرض الشخصي من البنك، بشرط أن الحد الأدنى لمرتبك مايقلش عن ألف جنيه، ومدة العمل بالوظيفة ماتقلش عن ٦ شهور.
ومن غير تحويل الراتب برضوا، تقدر تستلم دلوقتي
قرض شخصي من بنك التعمير والاسكان واللي بيبدأ من ١٥ ألف جنيه وحتى ٥٠٠ ألف جنيه، واللي الفايدة عليه بتكون ١٥٪ متناقصة وفترة سداد بتوصل ل ٥ سنين، وكمان هاتاخد تأمين على الحياة وبدون ضامن تقدر تستلم القرض.
وبنك التعمير والاسكان حدد عدد من الشروط، علشان تقدر تستلم دلوقتي قرض شخصي من البنك، وهي أن الحد الادني لدخل المقترض مايقلش عن ١٥٠٠ جنيه، وعمره مايزيدش عن ٦١ سنة.
وبفايدة متناقصة، و ٥ سنين فترة سداد، تقدر تستلم قرض من بنك القاهرة واللي بيوصل ل مليون ونص، والشروط اللي حددها البنك هي أن السن مايزيدش عن ٦٠ سنة، والدخل الشهري مايقلش عن ألف جنيه في حالة كنت موظف حكومي، وألفين جنيه لو كنت من موظفي القطاع الخاص.
وبتمويل بيوصل ل ٧٥٠ ألف جنيه، و ب١٧٪ نسبة فايدة متناقصة، تقدر تستلم دلوقتي قرض من بنك قطر الوطني الأهلي، واللي تقدر من أى فرع للبنك تستلم المبلغ، بس لازم الحد الأدنى للمرتب مايقلش عن ٣ آلاف جنيه، وبضمان إثبات الدخل، وصورة بطاقة الرقم القومي، وخطاب تعهد من جهة العمل تستلم المبلغ.
