يوم تاريخي وقرارات وحاسمة.. ليلة السيسي الكبيرة
النهاردة مصر قالت كلمتها واختارت الرئيس السيسي بولاية جديدة .. ليه النهاردة يوم مش عادي في تاريخ مصر وايه القرارات الحاسمة اللي السيسي هيصدرها بعد إعلان فوزه في الانتخابات وازاي هتكون قرارات حاسمة في ملفات كتير
ج
طبعا زي ماقلنا نهاردة يوم مهم جدا ودا بسبب الإعلان عن نتيجة الانتخابات الرئاسية في مصر واللي زاد من أهميتها الظروف الصعبة والخطرة اللي حوالينا واللي يتهدد بشكل مباشر الأمن القومي المصري سواء داخلياً واقتصاديا زي الدولار والسوق السوداء والمحتكرين في الأسواق وصناعة الأزمات أو عن طريق الخطر اللي على الحدود من كل الجهات غرب وجنوب وشرق وكلها صراعات مسلحة ضاعفت الخطر الاقتصادي بشدة وخلت حدودك مع الدول دي رخوة وممكن تصدر الخطر في أي لحظة ودا ضاعف من مسؤولية القيادة في زيادة تأمين الحدود وعندنا خطر تاني وهو اللي بيحصل في غزة وتحشيد الفلسطينيين في جنوب مدينة رفح عشان يجبروهم على دخول سيناء وتصدير الحرب للداخل المصري.
ليه اعلان النتيجة طوق نجاة لمصر من مؤامرات كتير كانت حولين مصر جوه وبره عشان مكانش فيه بديل للسيسي يقدر يقاوم ويواجه كل اللي بيحصل ده وهو اكتر واحد بيتعامل مع المؤامرات الكبيرة وبيقدر ينسفها بحكم شغله القديم وعقليته المخابراتية وخبرته مع افاعي الخراب وتعالب الفوضى ومن غيره كانت مصر حرفيا هتعاني ومتوقع بسبب كل الملفات المفتوحة واللي عاوزة قيادة من نوع السيسي عارف مين بيعمل ايه وازاي وبيواجه كل أزمة بثقة وهدوء غريب دليل على ثقته في بلده وقوتها .. السيسي مبقيش ضهر بس للمصريين لكن كمان بقى ضهر لكل العرب وكبير المنطقة والعرب عرفوا إنه راجل بتاع شغل وبس ومش بيقضيها تصريحات وزيارات لكن عمل انجازات غير مسبوقة والاهم من دا كله إنه عنده كاريزما وقدرة وجرأة على تغيير الواقع من غير اي تردد ودي صفة نادرة في القيادات.
بمجرد إعلان نتيجة الانتخابات مصر هتكون دخلت على. مفترق طرق جديد في الملف الاقتصادي بكل اللي فيه من اسعار دولار وقروض واستثمار وفرص عمل وتطوير وصناعة وزراعة وتصدير وموانئ وبريكس ومبادلة عملة وليلة كبيرة جدا محتاجه تنسيق وفكر جديد عشان الناس ترجع تعيش حياتها بشكل طبيعي وعشان كمان البلد تكمل في طريق التنمية والتقدم وترجع تفوق بقي.. واكيد القرارات الجاية بعز تشكيل الحكومة الجديدة هتكون عامل مهم جدا في تصحيح الخلل في الأسواق والأسعار والاستغلال وكمان هتكون فاصل. في أزمة الدولار والسوق السوداء والتجار اللي معندهمش ضمير وكمان هتكون مرحلة مختلفة في التعامل مع كل التحديات وهنشوف تغير واضح وكبير.
