الدولار رايح في حته صعبة.. تقرير صادم عن مستقبل الجنيه

 
من بعد نهاية الانتخابات الرئاسية وكل مؤسسات التمويل الدولية بدأت تتكلم عن مستقبل الجنيه ومصير التعويم المنتظر في سعر العملة وطلع أكتر من تقرير أكد ان التعويم جاي جاي لكن الخلاف حوالين السعر المتوقع اللى هيوصل ليه سعر الدولار في البنوك وما اذا كان الخفض المحتمل للعملة المصرية ممكن أنه يقضي على السوق السودا للعملة ولا هنفضل نلف في دايرة مفرغة وكل شوية هنكون مضطرين لخفض قيمة الجنيه المصري.. واخر تقرير صدر عن وكالة موديز فجر مفاجأة قوية عن السعر المتوقع للجنيه في حال اجراء التعويم.. فيا ترى التقرير قال ايه عن مصير الجنيه ؟ وايه توقعات سعر الدولار ؟ 
 

 
مؤسسة "موديز" ودي واحدة من المؤسسات المالية الكبيرة طلعت تقرير مؤخرا اتوقعت فيه خفض جديدا لقيمة الجنيه المصري مع اتجاه الحكومة إلى تطبيق نظام مرن لسعر الصرف بأسلوب تدريجي وقالت ان ده هيؤدي إلى بقاء متوسط التضخم فوق 24% في السنة الجاية وأسعار فائدة مرتفعة.
التقرير أكد أن مشاكل مصر الاقتصادية ناجمة عن تحديات هيكلية مستمرة من فترة طويلة زي الأمن الغذائي والزيادة السكانية الكبيرة والاختلالات المالية والخارجية.
الغريبة انه على الرغم من استقرار أسعار صرف الدولار في السوق الرسمية في مصر لكن تقرير موديز رجح تسجيل  سعر صرف الدولار مستوى 45 جنيهً خلال الربع الأول من 2024.
في وقت بتشير فيه تقديرات بنك "HSBC"، إلى خفض سعر صرف الجنيه إلى مستوى بين 40 و45 جنيه للدولار خلال الربع الأول من 2024، مقابل توقعات قبل كده كانت بتتراوح بين 35 إلى 40 جنيه
التقرير شاور على  أن سعر صرف الجنيه في مصر مستقر من أشهر في التعاملات الرسمية عند مستوى 31 جنيه بعد خفض قيمة العملة 3مرات من مارس 2022 ولحد دلوقتي في حين سعره في السوق السوداء سجل مستوى 50 جنيه للدولار.
وأكد أن تعديل سعر صرف الجنيه المصري يأتي كجزء من التحول نحو نظام صرف أكثر مرونة وهيسهل إنجاز المراجعة الأولى لبرنامج الإصلاح المدعوم من صندوق النقد الدولي.

طب ده لو حصل ايه تأثيره على الأسعار وهل الأسواق ممكن تتحمل الزيارات المتوقعة؟ 
طبعا لو سعر الدولار وصل ل 45 جنيه في البنوك زى ما التقارير دي بتقول أسعار السلع هتقفز قفزات جنونية صحيح السلع حاليا مسعره على سعر 5 جنيه للدولار أصلا لكن خد بالك لما سعر الدولار رسميا يوصل الى 45 جنيه فده معناه ان ممكن السوق السودا تسجل هي كمان قفزات مدوية ووقتها هندخل في دايرة مفرغة الله أعلم ممكن نخرج منها ازاى 
وعشان كده البنك المركزي بالتنسيق مع الحكومة شغال دلوقتى على جمع أكبر قدر من السيولة الدولارية لتغطية اى خفض محتمل في قيمة العملة وعشان يكون هو المتحكم في السوق ويضخ دولار في الوقت المناسب لمنع اى قفزات غير متوقعة لسعر الدولار امام الجنيه.