مصر لا بتصدر ولا بتنتج!! وبنقترض على الفاضي.. هل دا حقيقي؟

في أوقات الأزمات بتزداد الشائعات وحدتها وبيتم الترويج للأكاذيب بكثرة .. ولاكتر من يومين بيتم ترديد نغمة جديدة مفادها أن مصر لا بتصدر ولا بتنتج وبتقترض على الفاضي.

الحقيقة أن ترويج الأمور دي على أنها حقيقة بتعكس إما جهل قائلها أو تعمده الكذب لأن مصر بتصدر وبتنتج.

ومسألة "احنا لا بنصدر ولا بننتج" دي مش دقيقة، لاننا بنصدر فعلا كتير جدا وبنستورد بردو كتير، لكن فيه تحسن ملحوظ في انتاجنا ومساهمة الصادرات زادت في الناتج الفترة الاخيرة، وإرتفعت حصيلتها من 20 مليار في 2015 لـ 35 مليار دولار في 2020 وهو اعلى مستوى في تاريخنا على الإطلاق.

وماتنساش أننا في قطاع الزراعة مثلا كان الناتج الزراعي المصري  280 مليار جنيه سنة 2014 وأصبح 670 مليار جنيه سنة 2019.

ومن أكبر المشاريع الزراعية هو مشروع الصوب الزراعية – واللي تم خلاله زراعة 100 ألف فدان يعادل مليون فدان مستصلحة.

وكمان مشروع الدلتا الجديدة واللي تم خلاله زراعة  2.2 مليون فدان ودة تقريبا يعادل 25% من كل المساحة المزروعة في مصر من نشأتها لليوم.

والمشروع دا هيساعدنا نحقق الاكتفاء الذاتي من القمح والذرة وهيرفع صادراتنا من الخضر والفاكهة.

وفي قطاع الصناعة كان الناتج الصناعي المصري  360 مليار جنيه سنة 2013 وأصبح 942 مليار جنيه سنة 2019.

ومن أكبر المشاريع الصناعية. هو مدينة دمياط للأثاث بـ 5.5 مليار جنيه، ومدينة الجلود في الروبيكي بـ 5.6 مليار جنيه، ومشروع إنتاج السكر من البنجر ودة اللى هيساعدنا نحقق الاكتفاء الذاتي من السكر السنة الجاية، مصنع الألياف الضوئية في العين السخنة ودة تكلفته مليار جنيه، مجمع الأسمدة الفوسفاتية بـ 16 مليار جنيه.

ومصر عندها تاني أو تالت أكبر صناعات دواء وصناعات غذائية وبتروكيماويات في الشرق الاوسط.

و مينفعش تقارن مصر بفيتنام  اللى بدأت صناعة وتصدير سنة 1986 وبتصدر النهاردة بـ 300 مليار دولار، احنا دولة لا تزال تحبو أولى خطواتها وبدأت في 2016.

وكمان احنا بنقترض كتير عشان مفيش وقت نضيعه، وعشان احنا عددنا كبير وكل سنة بنزيد بمقدار دول كاملة.
بس بردو بنقترض والناتج المحلي بيزيد ويتوسع، 
وبنقترض ايوة بس لازلنا في نطاق آمن،

وبنقترض كتير عشان نبني بنية تحتية ضرورية لزيادة الانتاج والتصدير وجذب مزيد من الإستثمار وتحسين حياة الناس، عشان كمان 10 سنين نبقي زي فيتنام والبرازيل وغيرهم اللى انتو بتقارنونا بيهم النهاردة مقارنة غير منطقية، دولة بدأت في 2016 ودولة بدأت 86! شئ غريب فعلا.

ومصر بتطمح لأكتر من كدة وفيه دول اصغر مننا بتصدر باضعاف اضعافنا، صح، لكن ماينفعش نقول إننا لا بنصدر ولا بننتج وكلام غير منضبط