علشان تحافظ على فلوسك وتقدر توفر لازم تشوف الفيديو دا
بعيدا عن طرق الاستثمار اللي اتكلمنا عليها بدل المرة ألف.. هانقولك النهاردة على طرق من خلالها تقدر تحمي فلوسك من أي اضطرابات.. ومن خلالها هايكون معاك حاجة تسندك وقت الأزمات
التبذير والفشخرة هم اسرع طريقين للديون والافلاس.. واحنا مانرضاش ليك الذل والهوان.. وعلشان كدا النهاردة هانقولكم على نصائح هامة للادخار وتوفير الأموال.
أولا لازم تعرف إن التوفير مابقاش رفاهية.. دا بقى أمر لابد منه.. ووسيلة لا غنى عنها، خاصة فى ظل ارتفاع أسعار الصرف فى الوقت الحالي والتقلبات الاقتصادية المتغيرة.
وطالما أنت عندك رغبة فى توفير الأموال والادخار فلازم تنتقل من المرحلة النظرية إلى التطبيق، وتبدأ فورًا فى التوفير.
وأول حل قدامك علشان توفر فلوس.. هو أنك تحتفظ بنسبة من فلوسك كل شهر، حتى لو كان مبلغ بسيط، ودا اللى تقدر تعمله لو قمت دلوقتي بجدولة نفقاتك على أساس أسبوعي
تاني حاجة هاتساعدك أنك توفر.. هو أنك تشتري بس الحاجات الضرورية يعني تشتري لبس علشان أنت محتاجة فعلا مش علشان أنه عاجبك لأن الحاجات الغير ضرورية اللى ممكن تشتريها اكتر من مرة هاتخليك بتعاني ماديًا وهاتبقى عبء اكتر منها فائض
فكر فى قدام وخطط لنفسك فى المستقبل لأنك لما تتقدم فى العمر هايبقى مجهودك فى العمل أقل بكتير من دلوقتي فاستغل فترة الطاقة والمجهود فى الادخار وابعد تمامًا عن التبذير والصرف الكتير
افتح حسابات توفير فى البنوك .. ايوه البنوك من أهم الأدوات اللي هاتساعدك على التوفير وتحسين دخلك فى المستقبل وكمان هاتستفيد من فوائدها اللى ممكن تستغلها بشكل شهري
اعمل اكلك فى البيت وقلل من استهلاك الكهربا والمايه.. من الأمور الهامة جدًا واللى لازم تعملها دلوقتي قبل بكرة هو أنك تخفض من نسبة الأكل فى المطاعم والقعدة على الكافيهات.. وكمان لازم تقلل من استخدامك من الكهربا والمايه وتجنب بقى الاسراف والاستهلاك
وأخيرًا .. لازم لازم تبطل تدخين لأنه من العادات الضارة جدًا والمكلفة.. وصدقنا لو بطلت تدخين هاتحافظ على صحتك وفلوسك.
