المرتبات هاتزيد ٥٠٪.. مصر هاتطبع فلوس.. يا ترى دا حقيقة
كل موظف كان بياخد ٥ آلاف هاياخد ١٠ آلاف.. الناس هاتغتني والبلية هاتلعب مع الكل.. وأزمة العملة هاتروح.. ودا علشان المركزي هايطبع ملايين النقود
الكلام اللي قولناه في الأول دا يبدوا مغري الحقيقة.. وبيخلي الناس بسرعة ومن غير معرفة تطرحه.. هو لية مصر ماتطبعش فلوس وتدي الموظفين الضعف وكل واحد يعيش مبسوط.
والحقيقة أن الكلام دا بيكتر وقت الأزمات.. خاصة لما يكون التضخم مرتفع.. وغالبا بيصدر من ناس مش فاهمة أ ب اقتصاد.
لازم تعرف أن الاجور مبتترفعش اثناء التضخم الجامح، بص صلي ع النبي وركز معايا:
أولا.. لازم تعالج مشاكل تكلفة الانتاج، اللي هي عملت نقص في المعروض من السلع والخدمات، واول حاجة في القصة دي هي سعر الصرف وتكلفة الاقتراض.. ودول حاجات اتكلمنا عليهم كتير قبل كدا.
٢. بعد ما تظبط الصرف وتكلفة الاقتراض تخش على تظبيط منحنى الطلب اللي هو جزء اساسي فيه: الرواتب ومستوى الدخل الحقيقي للناس عشان نزود الانفاق والاستهلاك فيزيد النمو، عايز تراضي الناس وتبسطهم؟ دة شئ جميل بس التوقيت امتى؟ بعد ما تحل مشاكل العرض مش قبلها، بعد ما تعالج التضخم مش قبله.
ليه الترتيب الزمني للخطوات مهم؟
لان لو خطوة جت قبل خطوة هتغذي التضخم بدل ما تعطشه، يعني تحط بنزين وزيت ع الحريق بدل مية ورملة.
ببساطة كدا زيادة الرواتب اثناء الازمة هو اسهل واسرع حل يلجأ له اي حكومة ضعيفة عشان يلتف حوالين الازمة بدل ما يواجهها.
طيب ولية مانطبعش فلوس بالعملة المحلية؟
هتروح تطبع فلوس بالعملة المحلية عشان تزود المرتبات
واصلا فيه عجز في الموازنة وبتكمله بالديون
ومفيش غطا كفاية من الدولار ولا الدهب.. وفيه تضخم بالفعل مرتفع فالناس هتاخد مرتبات اكتر وفلوس اكتر في ايديها.. فالناس هاتستخدم الفلوس دي في الاستهلاك
وتروح الاسواق تتكالب على سلع كميتها قليلة اصلا لان الانتاج فيه مشاكل بسبب تقلبات سعر الصرف والجهاز المصرفي فترتفع الاسعار اكتر واكتر.
وعلشان عندنا ناس فعلا فاهمة اقتصاد وإدارة فهي ماعملتش كدا.. والكلام عن طبع فلوس بدون سند دولار أو ذهب مالوش أساس من الصحة.
