إيه هو انستاباي ؟ وتقدر تحول منه كام وهتدفع قد إيه رسوم؟.. هنجاوبلك على كل الأسئلة
ناس كتير بقت مهتمة بتطبيق انستاباي وعاوزة تعرف عنه كل حاجة من أول التطبيق ده تابع لمين وتقدر تحول منه كام فلوس وهتدفع قد ايه رسوم وهل هو آمن ومضمون ولا فيه خطورة على الفلوس بتاعتك فيه.. وفى الفيديو ده هنجاوبك على كل الأسئلة اللى شاغلة بالك وهنقولك ايه البنوك المشتركة فى التطبيق؟ وتقدر تحول فلوسك لحساب بنكي بس ولا كمان تقدر تحول لمحافظ وكمان بطاقات ائتمانية.. تابع الفيديو للآخر وهنجاوبك على كل الأسئلة
وخلينا نبدأ بأول سؤال هو ايه أصلا تطبيق انستاباي ده ؟
انستاباي هو أول تطبيق مرخص من البنك المركزي المصري لتقديم خدمة الدفع عبر شبكة المدفوعات اللحظية، وتولت شركة بنوك مصر الذراع التكنولوجية للبنك المركزي مهمة تطوير منظومة المدفوعات اللحظية وتطبيق إنستاباي وفقا لتوجيهات البنك المركزي المصري مع الاستعانة بكبرى الشركات الاستشارية العالمية المتخصصة في تأمين شبكات وتطبيقات الدفع الإلكتروني.. والتطبيق بيتيح لحضرتك الوصول المباشر إلى كل حساباتك البنكية وتحويل الأموال لحظياً طوال أيام الأسبوع على مدار 24 ساعة من خلال الهاتف المحمول.
طب ايه مميزات انستاباي؟
أهم مميزات برنامج انستاباي:
التطبيق زي ما قولنا لحضراتكم مرخص من قبل البنك المركزي المصري وتقدر من خلاله تدير حساباتك البنكية في أكثر من بنك من خلال برنامج واحد وكمان تقدر تحول فى نفس اللحظة من أي بنك مشترك في انستاباي إلى أي حساب أو بطاقة فيزا حتى لو المستفيد مش مشتركً في خدمة انستاباي او لو حتى معندوش حساب اصلا على التطبيق
كمان من مميزات انستاباي ان واجهة برنامج سهلة وبسيطة وفيه سهولة في إجراءات التحويل وسرعتها.
طب ايه حدود التحويل من انستاباي؟
حدود المعاملات المالية على انستاباي كالتالي:
الحد الأقصى شهريا هو: 400,000 جنيه
الحد الأقصى يوميا هو: 120,000 جنيه
الحد الأقصى للتحويل في المرة الواحدة: 70,000 جنيه
مع ملاحظة أن كل حساب له حدود سحب منفصلة يعني لو عندك حساب في بنك مصر وحساب في البنك الاهلي فانت كده ليك حد تحويل 400 الف شهريا من كل حساب فيهم وليك 120 الف حد تحويل يومي من كل حساب فيهم.
مثال:
لو عاوز تحول 90 الف ، هتقسمهم 70 ألف و بعدين 20 ألف.
وهل انستاباي آمن ومضمون ؟
برنامج انستاباي آمن تماما لانه تابع وخاضع لرقابة واشراف البنك المركزى المصري يعنى مفيش اكتر من كده أمان
وهل في رسوم ع التحويل من انستاباي؟
البرنامج مجاني تماما لحد اخر ٢٠٢٣ ، ومع بداية ٢٠٢٤ هيبدأ فرض رسوم على التحويلات لكن هيكون فيه اعفاء لعملية التحويل لحد 500 جنيه فأقل
طب ينفع أحول من حسابي البنكي لاى محفظه؟
أيوة ، لكن العكس لا.
طب ينفع احول من محفظة اليكترونية زي فودافون كاش لحساب بنكي؟
لأ ... تقدر تحول من حسابك البنكي للمحفظة ، وليس العكس حتى الان. وان كان على أمل أن تكون متاحة في اقرب وقت.
طب لو عاوز احول لحساب حد بره مصر من انستاباي؟
البرنامج بيحول بين البنوك المصرية فقط حتى الان وغير متاح التحويل الدولي.
عندي حساب شركة ومش عارف اسجل في التطبيق؟
البرنامج بيدعم حسابات الأفراد فقط ولا يدعم حساب الشركات حتى الان وان كان متوقع قريب ان ينزل نسخة خاصة للشركات.
ممكن اضيف فيزا البريد على انستاباى؟
حتى الان لا.
وهل انستاباي بيقبل إضافة كارت المشتريات credit card؟ او الكارت المدفوع مقدماً prepaid card؟
حتى الآن لا.. مش متاح اضافة كارت المشتريات او الكارت المدفوع مقدماً الى البرنامج ، لانه خاص باضافة الحسابات البنكية فقط بس ممكن تحولها عشان تسدد المديونية مثلا
طب ازاي احول فلوس على الفيزا؟
لو عندك فيزا وعاوز تسدد فلوس للبنك بتاعها
اضغط علي ارسال نقود Send Money
ثم اضغط بطاقه الكترونيه Card
ادخل رقم البطاقه ((( ال ١٦ رقم)))
طب لو عندي أكتر من حساب بنكي ، سواء في نفس البنك او بنوك مختلفة ينفع اضيفهم؟
أيوة عادي ، وهيشتغلوا كلهم عادى وتحول من اى واحد منهم عادى جدا.
وينفع أعمل انستاباي بنفس الرقم اللي عامل عليه فودافون كاش؟
ينفع عادي ، انستاباي برنامج لإدارة حساباتك البنكية وليس محفظة اليكترونية فمفيش مشكلة انك تربط رقمك بانستاباي حتى لو مربوط بمحفظة اليكترونية في نفس الوقت.
لو هحول لحد معندوش حساب على انستاباي ينفع؟ وازاي؟
أيوة عادي ينفع ، لو معندوش انستا بتبعتله عادى على حساب البنك بتاعه عن طريق اختيار البنك وكتابة رقم الحساب الخاص بيه.
زازاي اعمل اسكرين للمعاملة عشان أأكد التحويل للطرف الثاني؟
التطبيق مبيسمحش بعمل لقطة شاشة - screen shot بسبب بعض النقاط الخاصة بالأمان ، بس فيه حاجة تقدر تستخدمها عشان تأكد التحويل هتضغط على المعاملة بتاعتك وبعدين تنزل لتحت خالص هتلاقي مكتوب "مشاركة إيصال" هتضغط عليها هيجيبلك كل التطبيقات اللي ممكن تعمل عليها شير للإيصال واتساب، ماسنجر وغيرهم من التطبيقات .... ابعت صورة الايصال للشخص اللى بعتلوا الفلوس
وعشان تتجنب أي أخطاء أثناء عمليات التحويل في برنامج انستاباي، يُفضل اتباع مجموعة من الإرشادات :
أولاً: راجع عنوان الدفع او رقم الحساب او رقم التيليفون والاسم اكتر من مرة، وتأكد من أنك تكتبهم بشكل صحيح.
بعدها قم بتحويل مبلغ صغير (جنيه واحد مثلا ).
وتتأكد من وصوله للمرسل اليه بنجاح.
بعدها ضيف بيانات حساب المستفيد إلى قائمة المفضلة (Favorite) في التطبيق من خلال الدخول الى سجل العمليات و الضغط على علامة النجمة.
وبعدها تقدر تنفذ التحويل بالمبلغ المراد تحويله كاملا على الحساب المحفوظ في قائمة المفضلة (Favorite). بس ما تعملش كده غير لما تتأكد تمامًا من صحة البيانات الخاصة بالحساب المستلم وبعد أن يتم استلام المبلغ الصغير بنجاح.
ويمكن التحويل باستعمال رقم الهاتف بدلا من رقم الحساب او اسم المستخدم وفي هذه الحالة يمكنك اختيار رقم هاتف صاحب الحساب المراد التحويل له من جهات الاتصال (Contacts) على هاتفك.
باتباع الخطوات دي هتتمكن من تنفيذ عمليات التحويل بأمان وبدون أي أخطاء غير مرغوب فيها وتجنب تنفيذ التحويلات الكبيرة حتى تتأكد تمامًا من صحة البيانات والمعلومات المطلوبة.
