هروب مرتد للدولار من السوق السوداء.. تفاصيل الساعات الصعبة لحيتان العملة
ياترى ايه اللي بيحصل في السوق السودا للدولار دلوقتي وإزاي مش هتعدي 2023 غير لما تكون السبوبة انتهت بشكل رسمي وايه حصل عشان دولار السوق السوداء ينهار بالشكل دا وايه حكاية الهروب الجماعي من التداولات الغير مشروعة وايه هي نبؤوة البنك العالمي اللي قال نهاية المضاربة على الدولار هتنتهي والاهم إيه اللي هيحصل لما تنتهي المضاربة على العملة الأمريكية.
شوف حضرتك البنك العالمي مورجان ستانلي لخص حكاية الدولار في السوق السوداء وهو نفس الكلام اللي قلناه في بانكير كتير جدا تعالوا الاول نشوف البنك قال ايه.. البنك العالمي أصدر تقرير طويل عن الوضع الاقتصادي في مصر وعن الدولار تحديدا وقال فيه نصا إنه بشكل عام الدولار، والعملات الأجنبية، في السوق السوداء بتتراجع كل ما كانت فيه أنباء وأخبار مطمئنة حول وضع الاقتصاد المصري، أو صدور توقعات من مؤسسات وبنوك دولية إيجابية بشأن مستقبل الجنيه، حيث يرتفع العرض ويقل الطلب في هذه الحالة. والعكس صحيح، يرتفع سعر الدولار والعملات الأجنبية ويزداد الطلب.
و كل ما كانت الأنباء سلبية وغير مطمئنة بشأن الاقتصاد ومستقبل الجنيه ودا اللي قلناه قبل كده كتير في بانكير وهو إن سوق الدولار السودا عايشة على الأزمات والأخبار السلبية ولدرجة إنها عملت كتائب إلكترونية كل شغلتها تصطاد الأخبار السلبية عن مصر في العالم كله وتنشرها في مصر على مواقع التواصل والسوشيال ميديا ودا بعد ما تحط الشطة والبهارات بتاعها وطبعا أعداء مصر كتير جدا وفيه ناس شغلتها تهاجم البلد ليل نهار ووصل الأمر بحيتان الدولار أنهم يفبركوا الاخبار عشان يحافظوا على مغارة على بابا والملايين اللي بتدخلهم كل صبح من فرق العملة .
طيب ايه اللي حصل في كام الساعة الأخيرة وخلى حيتان العملة تهرب من السوق الموازية.. سوف ياسيدي شبكة سي إن إن الأمريكية ودي مش هتجامل مصر طلعت تقرير قالت فيه على لسان مصادر مطلعة إن الحكومة المصرية وصلت لاتفاق مع صندوق النقد الدولي على إنهاء المراجعات لبرنامج القرض المصري المتعطل في خلال شهرين من دلوقتي وهيكون في أول الربع الأول من 2024 ومش كده وبس وكمان القرض هيزيد من 3 مليار دولار الى10او 12 مليار دولار ودا بشكل رسمي يعني الاتفاق تم وقال التقرير إن المبلغ دا كفيل يسد الفجوة الدولارية في السوق المصري واللي وصلت 17 مليار دولار والباقي البنك المركزي كفيل بيه وطبعا مفيش اخبار إيجابية اكتر من كده عشان سوق الدولار السودا تنهار بشكل رسمي.
مش اتفاق صندوق النقد الدولي بس اللي هيضرب السوق الموازية للدولار دا كمان فيه استثمارات ضخمة جاية في الطريق وهتضخ اكتر من 20 مليار دولار حسب كلام مسؤول كبير في الدولة يعني هيكون فيه فائض في الدولار ودا غير الاحتياطي اللي في البنك المركزي وغير تأجيل سداد الودايع العربية وغير الدعم الاوربي ابو 10 مليار دولار لمصر بعد موقفها من غزة وغير كمان ارتفاع ايرادات العملة الأمريكية من قطاعات الدولة الدولارية ودي كلها كفيلة تنهي وصمة السوق السوداء للدولار واللي بدأ فعلا التجار يهربوا منها حسب مصادر من جوه وحلاوة روح بتحاول الكتائب الالكترونيه تروج لأسعار وهمية عشان تلحق تبيع الدولار اللي التجار خزنوه ولو ملحقوش هتكون خسارة تقضم الوسط.
