رعب الفدرالي .. وثورة مدبولي ضد تجار السوق.. وقناة السويس في خطر
متابعينا الكرام في كل مكان أهلا وسهلا بكم على منصات بانكير وجولة جديدة لأهم الموضوعات الاقتصادية محليا ودوليا وقراءة جديده في أخبار الدولار والذهب والأسواق واللي قدمتها وحدة بانكير للأبحاث والتقارير على مدار اليوم الثلاثاء 12 ديسمبر 202
البداية مع الحدث الأهم المنتظر في الأسواق المالية العالمية والمصرية كمان .. وهو طبقا قرار البنك المركزي الأمريكي أو الفدرالي العالم ..
لو متابعين النهاردة هينطلق اخر اجتماع لبنك الاحتياط الفيدرالي الأميركي فى 2023 للنظرفى اسعار الفايدة على العملة المريكية وحسم المستقبل الغامض فيما يتعلق بالسياسة اللى هتبعها الفيدرالي فى 2024 وهنعرف خلال ساعات قليلة القرار المنتظر وسط توقعات قوية ببقاء الفائدة دون تغيير عند أعلى مستوياتها في آخر 20 سنة..
مفيش كلام حاليا داخل البنوك الأمريكية ومؤسسات المال والأعمال غير عن مصير أسعار الفايدة خلال الفترة الجاية وقرار الفدرالي.. والمفروض خلال اقل من 24 ساعة هنكون عرفنا قرار الفيدرالى المنتظر فى وقت شهدت فيه توقعات المستثمرين بشأن مستقبل أسعار الفائدة الأمريكية تغيرات ملحوظة بعد ما أظهرت بيانات تم الافصاح عنها مؤخرا تباطؤ نمو الوظائف في الولايات المتحدة فى الوقت اللى كانت فيه الزيادة في الأجور السنوية هي الأقل خلال آخر سنتين وده بيشير إلى انحسار ظروف سوق العمل.
وفى الساعات الأخيرة بيتوقع المتداولين احتمال بنسبة 95% أن البنك المركزي الأمريكي يسيب أسعار الفائدة دون تغيير في اجتماع ديسمبر وانه هيبدا التخفيض في السنة الجديدة.
التقرير التالي اللي قدمته منصات بانكير كان بخصوص الإعلان عن إنشاء أكبر مصنع في العالم لانتاج الضفائر الكهربائية في مصر.
وكشف التقرير إن الدكتور مصطفى مدبولي، رئيس مجلس الوزراء عمل اجتماع مهم جدا النهاردة في مقر الحكومة بالعاصمة الإدارية الجديدة مع الرئيس التنفيذي لشركة " سوميتومو وايرنج سيستمز" اليابانية لاستعراض موقف إنشاء أكبر مصنع على مستوى العالم لإنتاج وتصنيع الضفائر الكهربائية والأسلاك للسيارات والمركبات في في مدينة العاشر من رمضان وده واحد من ضمن المصانع اللى بتمتلكهم المجموعة اليابانية في مصر واللى ليها شغل ومصانع في بورسعيد والعاشر من رمضان والسادس من أكتوبر
وكشف مسئولى الشركة اليابانية أهمية مصانع الشركة في مصر اللي بتعد مورد هام لمنتجات الشركة خاصة للسوق الأوروبية .. وقال كمان إن المصنع الجديد اللي تم وضع حجر الأساس ليه كان من أوائل المشروعات اللي تم منحها الرخصة الذهبية من قبل الهيئة العامة للاستثمار.
الشركة اليابانية ليها 8 مصانع لإنتاج ضفائر السيارات في محافظة بورسعيد ومدينة العاشر من رمضان ومدينة السادس من أكتوبر باستثمارات 100 مليون دولار وبتوفر أكثر من 12 ألف فرصة عمل مباشرة وتقوم بتصدير 100% من إنتاجها وبلغ حجم مبيعات الشركة ما يزيد على مليار يورو خلال السنوات الخمس سنين اللى فاتت.
منصات بانكير سلطت الضوء النهاردة عن موضوع بيهم ناس كتير وخاصة الشباب اللي بيدور على شقة ومقدمش في شقق الحكومة قبل كده.
والتقرير الخدمي لفت الانتباه إلى طرح وزارة الإسكان لوحدات سكنية في 14 مدينة ومن كل المستويات وبشروط ميسرة جدا وفيه كتير منها إسكان اجتماعي
الشقق الجديدة كشف النقاب عنها صندوق الإسكان الاجتماعى ودعم التمويل العقاري التابع للوزارة قال إنه هيتم طرحها خلال الأيام القليلة الجاية، ضمن مشروع سكن لكل المصريين الإعلان 18 لمحدودي الدخل.
وحدة بانكير سلطت الضوء كمان على القرارات العاجلة اللي أصدرتها الحكومة النهاردة لضبط الأسعار
والحقيقة النهاردة كان فيه اجتماع مهم فى الحكومة برئاسة الدكتور مصطفي مدبولي لبحث الوسائل الممكنة للسيطرة على ارتفاع الأسعار ووقف جنون السلع اللى بيحصل فى الساعات الأخيرة.
وفى الاجتماع ده شدد رئيس الحكومة على أهمية دور لجنة ضبط الأسواق وأسعار السلع والدراسات والأبحاث اللى بتعملها لدعم جهود الدولة فى السيطرة على الأسعار ومنع الممارسات الاحتكارية واتكلم عن أهمية التركيز على مجموعة الآليات اللي بتساهم في تطبيق قرارات ومخرجات اللجنة.
وبعد مناقشات مطولة أسفر اجتماع الحكومة الاسبوعي عن 10 قرارات مهمة هيكون ليها دور كبير فى خفض الأسعار والسيطرة على اى تلاعب ممكن يحصل
واتضمن القرارات الاستمرار فى ضخ المزيد من الكميات من السلع بالأسواق والمجمعات التجارية تحقيقًا للوفرة والإتاحة.. و استصدار قرار باستمرار منع تصدير محصول البصل حتى 30 مارس المقبل.. بالاضافة الى تعديل تشريعي لتغليظ العقوبة على كل من يحتكر أو يخفي السلع عن المواطنين
ومن بين القرارات المهمة استحداث نظام إلكتروني لمتابعة تداول السلع بشكل يسمح ب تتبعها من مكان توريدها الأصلى وصولا للمستهلك النهائي
التقرير الأخير معانا على منصات بانكير في لايف النهاردة بخصوص اللي بيحصل في مضيق باب المندب وتهديد الملاحة الدولية في قناة السويس.
بعد اندلاع الأحداث في قطاع غزة في أول أكتوبر اللي فات والعالم كله وجماعة الحوثي في اليمن استغلت الوضع وبدأت في استهداف السفن التابعة لدولة الاحتلال سواء اللي بتعود ملكيتها للكيان المحتل أو رايحة المواني بتاعته وكان آخرها استهداف ناقلة نفط نرويجية.
طبعا استهداف السفن في مضيق باب المندب ليه تأثير مباشر على قناة السويس وعلى النقل والممر البحري الأهم في العالم وفعلا ارتفعت تكاليف النقل على السفن المارة من باب المندب بعد خطف وتهديد وقصف السفن في المضيق المؤدي لقناة السويس ودا غير تأثيره على عدد السفن المارة بالمجري الملاحي وتأثر إيرادات قناة السويس واحنا ما صدقنا الإيرادات تقفز في ذروة أزمة الدولار.
طبعا العالم مش هيسمح بتهديد الممرات البحرية ومصر مش هتوقف ساكتة وهتتحرك في الوقت المناسب علشان تحافظ على مصالحها الاقتصادية وعلى سمعة قناة السويس وحماية التجارة الدولية.
