السيناريو المرعب.. سر رسالة السيسي الغاضبة للأمريكان

كل اللي بيتابع الوضع في غزة واستمرار العدوان الإسرائيلي على القطاع هيعرف ان جيش الاحتلال بينفذ مخطط مدروس بعناية لاجبار أهالى غزة على النزوح وترك بيوتهم والفرار من الدمار والقتل الممنهج الى الحدود المصرية وطبعا كل اللى بيحصل هدفه تهجير الفلسطينين وتصفية القضية الفلسطينية وده اللى حذر منه قبل كده الرئيس السيسي وقال ان مصر مش هتسمح بيه أبدا.. فيا ترى ايه اللى هيحصل الأيام الجاية ؟ وايه المخطط المشبوه اللى بتحاول أمريكا وإسرائيل توريط مصر فه واحراجها قدام العالم؟ وايه التحركات اللى بتعملها مصر لكشف ألاعيب الصهاينة والأمريكان؟ وايه سر رسالة السيسي الغاضبة للرئيس الأمريكي؟ 
 
من يومين وزارة الخارجية الفلسطينية طلعت بيان خطير محدش ركز معاه ولا قرا اللى بين سطوره قالت فيه إن إسرائيل بتطلب من الأهالي في قطاع غزة المزيد من النزوح لحشرهم وتحديد حركتهم باتجاه واحدنحو معبر رفح الحدودي مع مصر.. في الوقت اللى حذرت فيه فصائل فلسطينية من الانسياق مع "مشروع التهجير" من غزة وثمنت الموقف الرافض ليه.

طب ايه هدف دفع اهالى غزة الى رفح قرب حدود مصر؟ 
خلاص العالم كله بقا عارف ان دولة الكيان الصهيوني عاوزة تتخلص من غزة وتسيطر على أرضها وتجبر أهلها على الخروج منها وكانت البداية باستهداف البنية التحتية في غزة مدارس ومستشفيات ومحطات مياه وكهربا ومن بعدها استهداف المدنيين العزل وقتل واصابة عشرات الالاف وكل ده لتحويل الحياة على أرض غزة الى جحيم لا يطاق وبعده بدأت إسرائيل المرحلة التانية وهى اجبار السكان على مغادرة بيوتهم واللافت انه بيتم دفع النازحين من غزة في اتجاه معبر رفح وفى الساعات الأخيرة وصل الى مدينة رفح من الجانب الفلسطيني مئات الالاف من سكان غزة اللى حاليا بيقيموا في مخيمات على بعد أمتار قليلة من الحدود مع مصر والخطوة الجاية وفقا للمخطط الإسرائيلي الخبيث دفع الفلسطينين الى الاقتراب أكتر من الشريط الحدودى مع مصر والدفع في اتجاه مواجهات مع القوات المصرية المسئولة عن تأمين الحدود وده السيناريو المرعب اللى حذر منه الرئيس السيسي لأن إسرائيل بمكر وخبث عاوزة تصور ان فيه مواجهة بين القوات المصرية على الحدود واخواتنا في غزة

طب موقف مصر ايه ؟ 
مصر موقفها واضح من اللحظة الأولى لعدوان إسرائيل على غزة وكانت عارفة ان الهدف هو تهجير الفلسطينين وتصفية القضية الفلسطينية والرئيس السيسي أعلن بوضوح وبشكل قاطع ان مصر مش هتسمح ان ده يحصل أبدا .. وكل الرؤساء والملوك والزعماء اللى زاروا مصر من بداية الأزمة لحد دلوقتى وصلهم بوضوح موقف مصر الثابت والرافض لكل الضغوط وكل الاغراءات.. ومصر في الأيام الأخيرة أبلغت الأمريكان ان اللى بتفكر فيه إسرائيل مش هيحصل وانها مستمرة في الدعم الإنساني لسكان قطاع غزة من خلال تقديم كافة المساعدات الطبية والغذائية 
ووفقا لتسريبات أمريكية وجهت مصر تحذيرات إلى الولايات المتحدة وإسرائيل من استمرار ضغط إسرائيل على الفلسطينين واجبارهم على النزوح الى سينناء ممكن يؤدي الى قطع العلاقات بين القاهرة وتل ابيب 
وحذرت مصر من خلال رئيس هيئة الاستعلامات ضياء رشوان من تهجير الفلسطينيين من غزة إلى سيناء، واللى اكد ان ده بيمثل "خطاً أحمر" بالنسبة لمصر ولن تسمح به مهما كانت التداعيات لمساسه بالأمن القومي والسيادة المصرية على كامل التراب الوطني، وقال ان ده هيؤدي الى من تصفية كاملة للقضية الفلسطينية وتفريغها من مضمونها".
ولغاية دلوقتي بتشير التقديرات إلى أن ما يقرب من 1.9 مليون شخص في غزة أو ما يقرب من 85% من السكان أصبحوا نازحين داخلياً، وفقا لوكالة الأمم المتحدة لإغاثة وتشغيل اللاجئين الفلسطينيين (الأونروا)
ولقي أكثر من 17 ألف فلسطيني في قطاع غزة مصرعهم معظمهم من النساء والأطفال بحسب وزارة الصحة الفلسطينية في غزة