شهادات هاتخليك غني.. أعلى سعر فايدة على الشهادات في البنوك

في 21 من ديسمبر الجاي.. هايُعقد آخر اجتماع للبنك المركزي .. ودا يعتبر الاجتماع التامن والأخير في 2023.. وغرضه هو حسم مسألة سعر الفايدة سواء على الإيداع أو الإقراض.. خاصة بعد لما المركزي رفعها اكتر من مرة خلال الشهور اللي فاتت ووصلت لـ 11% على مدار آخر 21 شهر.

النهادرة بقى هانتكلم عن أعلى الشهادات الاستثمارية اللي ممكن تشتريها وتاخد عائد كبير من وراها.

شهادات الاستثمار زي ما قولنا قبل كدا.. فلوس مضمونة جايلك كل شهر بشكل منتظم وآمن.. وهي وفقًا لآراء خبراء اقتصاد.. من أفضل وأحسن أنواع الاستثمار في الوقت الحالي.. لأنها تقدر تحمي فلوسك من أي تقلبات أو متغيرات.

نسمي الله.. ونبدأ بأول شهادة مرتفعة العائد.. واللي بيقدمها بنك التعمير والإسكان.. ودي شهادة ثلاثية يعني مدتها 3 سنين.. وسعر العائد عليها بيبلغ 19.75% سنويًا.. والعائد بتاعها بيتم صرفه شهريًا.. بشرط أن الحد الأدنى علشان تشتري الشهادة دي هو 3 مليون جنيه.

إنما تاني شهادة من حيث العائد المرتفع للصرف الشهري.. هي الشهادة اللي بيقدمها البنك الأهلي الكويتي واللي العائد عليها بيبلغ 18% سنويا وبيتم صرف العائد شهريا، أو تاخد العائد بنسبة 19.25% وبيتم صرف العائد بنظام الربع سنوي.. ودي شهادة سهل تشتريها لأن الحد الأدنى لشرائها هو ألف جنيه ومضاعفاتها.

كمان عندك .. الشهادة الثلاثية اللي بيقدمها نفس البنك.. واللي بيصرف العائد بنظام شهري على أن تكون الفائدة سنوية بمقدار 19% .. لكن بيتم بيعها من أول 500 ألف جنيه.

في المنافسة برضوا.. بنك المشرق.. واللي بيقدم شهادة ثلاثية مدتها 3 سنين.. ودي  سعر الفائدة السنوي عليها بيبلغ 19.5% .. وبيتم صرف العائد شهريا، وتقدر تشتريها من أول ألف جنيه ومضاعفاته، ودي الشهادة ضمن أعلى الشهادات اللي بتقدم عوائد في البنوك.

وأخيرًا.. الشهادة البلاتينية اللي بيقدمها البنك الأهلي المصري.. واللي بتقدم برضوا عائد ثابت على مدار 3 سنين.. بسعر فايدة سنوي يبلغ 19% وبيتم صرفه شهرياً، والحد الأدنى لشراء الشهادة دي برضوا أول ألف جنيه ومضاعفاته.

الشهادات استثمار آمن لأقصى درجة.. ببساطة كدا فلوس بتجيب فلوس.. فكر وشوف مقدرتك المالية تقدر تشتري أي شهادة من دول