ازاي الاحتياطي بيزيد وعندنا أزمة دولار.. مفاجأة سارة من البنك المركزي

 
صحيح ازاي الاحتياطي بيزيد وعندنا أزمة دولار في البلد وازاي المركزي ليوفر فلوس الاحتياطي وايه المفاجأة اللي أعلنها النهاردة البنك المركزي للمصريين وليه البنك مش بيضخ فلوس الاحتياطي في السوق المحلية ويضرب بيها السوق السوداء للعملة 
 

 
الاحتياطي النقدي لاي دولة هو أحد عوامل الأمان المالي ومظهر من مظاهر قوتها الاقتصادية ووظيفة الاحتياطي إنقاذ البلد وقت الازمات والجوائح والكوارث الطبيعية والأزمات العالمية وفي مصر ليه وظيفة تاني أساسية وهي ضمان وجود احتياطي كبير لتغطية واردات مصر من السلع الأساسية لو حصلت حاجة خارجة عن السيطرة زي أن الحكومة مقدرتش توفر السيولة الدولارية للاستيراد مثلا وفي نفس الوقت بيستخدم كغطاء لتسديد الديون لو الأمور تأزمت جدا مع الحكومة وهو عامل بالظبط زي الفلوس اللي بيشيلها المواطن على جمب للأزمات والطوارئ وهو مهم جدا ومن غيره تبقي الدولة مكشوفة ماليا وكل دول العالم عندها احتياطي لأسباب مختلفة.
والاحتياطي مش دولارات وبس على فكرة لانه بيدخل تحته الدهب والعملات الرىئيسة التانية والحقيقة البنك المركزي عامل معجزة في قصة الاحتياطي النقدي لانه بيزيد على التوالي من شهر يناير اللي فات ولغاية دلوقتي حتى لو بنسب قليلة رغم الأزمة الطاحنة اللي بتمر بيها البلاد وشح الدولار والمضاربات والسوق السوداء وفي نفس الوقت اللي المركزي بيوفر فيه احتياجات الدولة من العملة الأمريكية للاستيراد وللمستوردين وبيسدد الديون بفوايدها واحتياجات ومستحقات الشركات الأجنبية العاملة في مصر ونجح إنه يهزم السوق السوداء  ويوفره في البنوك كمان ودي شهادة نجاح كبيرة لحسن عبد الله ورجالته في المركزي.
الجديد والمفاجأة السارة للمصريين أن البنك المركزى المصرى، اعلن النهاردة الخميس، ارتفاع صافى الاحتياطيات الأجنبية من جديد إلى 35.173 مليار دولار فى نهاية شهر نوفمبر 2023 مقارنة ب 35.102 مليار دولار فى نهاية أكتوبر 2023، بارتفاع قدره 71 مليون دولار.
وطبعا الزيادة الجديدة بتعزز قدرة الدولة المالية زي ماقلنا وبتدي رسالة طمأنة للمصريين ورسالة ثقة للخارج والمستثمرين في الاقتصاد المصري وفي نفس الوقت رسالة سلبية وصدمة للسوق السودا أن الدولة عندها دولارات.

طيب ليه الدولة أو البنك المركزي مش بيضخ دولارات الاحتياطي في السوق عشان يوفر المعروض ويضرب السوق الموازية.. شوف حضرتك زي ما قلنا في الأول الاحتياطي دا ليه وظيفة تانية خالص وهي تغطية الواردات وللازمات الكبيرة والطارئة ومش منطقي يضحي بيه ويضخه في السوق المالي، أما بخصوص ازاي الاحتياطي بيزيد وعندنا أزمة عملة فالحقيقة أزمة الدولار في مصر بتتمثل في السوق الموازية والمضاربة عليه لكن مفيش مشكلة في السوق المصرفي بدليل إعلان البنك المركزي قبل كده توافر الدولار في البنوك ودا قالته بردوا تقارير عالمية والمركزي بيوفر الزيادة في الاحتياطي من موارد الدولة الدولارية ومن حسن إدارة المورد الدولاري بعد توفير احتياجات الدولة الأساسية من الدولار للاستيراد وخلافه.
وعلى فكرة مصر بتستورد بما يعادل متوسط 7 مليار دولار شهريًا من السلع والمنتجات من الخارج، بإجمالى سنوى يقدر بأكتر من 70 مليار دولار، وبالتالى فإن المتوسط الحالى للاحتياطى من النقد الأجنبى يغطى نحو 5 أشهر من الواردات السلعية لمصر، وهى أعلى من المتوسط العالمى البالغ نحو 3 أشهر من الورادات السلعية لمصر، بما يؤمن احتياجات مصر من السلع الأساسية والاستراتيجية ودي شهادة للبنك المركزي المصري.

وزي ماقلنا الاحتياطي بيتكون من العملات الأجنبية  من سلة من العملات الدولية الرئيسية، هى الدولار الأمريكى والعملة الأوروبية الموحدة "اليورو"، والجنيه الإسترلينى والين اليابانى واليوان الصينى، وهى نسبة توزع حيازات مصر منها على أساس أسعار الصرف لتلك العملات ومدى استقرارها فى الأسواق الدولية، وهى تتغير حسب خطة موضوعة من قبل مسئولى البنك المركزى المصرى. وخلي بالك لولا فاتورة الاستيراد الضخمة كان زمان الاحتياطي المصري من أكبر احتياطيات النقد في العالم وتخيل كده لو بتستورد بنص المبلغ المعلن كانت مصر حطت في الاحتياطي  35 مليار دولار كل سنة

.