حدودنا خط أحمر.. رسائل الدقائق الأخيرة من السيسي إلى الإدارة الأمريكية
ياترى وزير الخارجية المصري بيعمل إيه في أمريكا وايه هي المهمة الرسمية اللي كلفه بيها الرئيس السيسي وهل تحمل الزيادة رسالة بنفاد صبر القاهرة وإيه تداعيات الزيارة على الوضع في المنطقة.
كلنا شايفين تطورات الأوضاع الخطيرة في المنطقة وشراسة العدوان الإسرائيلي والوضع على الحدود طبعا وموقف مصر القاطع منها، لكن أخر التطورات إن إسرائيل مش عاوزة تجيبها لبر زي مابيقول المصريين وبتضغط على الفلسطينيين وبتجبرهم على النزوح لرفح الفلسطينية والباقي طبعا معروف.
مصر قالت كلمتها من البداية وإننا قادرين نحمي حدودنا وفي رسايل وصلت تل أبيب إن العبث في الملف دا معناه اللعب بالنار مع مصر وإنتوا مش حمل غضب السيسي لكن في النهاية نتيناهو عاوز يصدر مشاكل وخلاص عشان يهدي الوضع الداخلي.
امبارح وزير الخارجية المصرية سامح شكري طار في زيارة سريعة للولايات المتحدة، اليوم الثلاثاء، عشان يوضح الصورة على الأرض للإدارة الأمريكية وإن اللي بيحصل لازم يوقف وفيه حد للحروب.
.
حسب متحدث الخارجية شكري هيقابل مسئولين رفيعي المستوي من أعضاء مجلسي النواب والشيوخ، بما فيهم رؤساء وأعضاء اللجان المعنية بالسياسة الخارجية الأميركية في الكونجرس الأميركي، ودا بهدف دفع وتعزيز العلاقات الاستراتيجية بين البلدين وكمان يحطهم في صورة اللي بيحصل في غزة.
وزي ما احنا عارفين إن وزير الخارجية بتكون زيارته الرسمية للدول الكبيرة بالتنسيق مع مؤسسة الرئاسة، وشكري رايح في مهمة خاصة من الرئيس للوصول لطريقة لوقف الحرب في غزة وشرح الوضع على الأرض وطبعا مع التأكيد على إن أمن مصر القومي وحدودها خط أحمر، ودا سبق واتقال كتير وكمان الرئيس السيسي قاله بوضوح مع الرئيس بايدن واللي أكد إن مفيش حاجة اسمها تهجير.
مصر اتأثرت مفيش من الصراع في غزة سواء اقتصاديا أو ماديا لكن موقفها واضح وصريح ورفضت الابتزاز والترغيب والمليارات عشان تفرض في حق خواتها الفسطينين وإنها مش ممكن تسيب القضية الفلسطينية تنتهي ويتم تصفيتها وإن الفلسطنيين مش لوحدهم ودي الرسالة المصرية اللي وصلت لكل الأمريكان، ومعاها إن مصر جاهزة لكل الاحتمالات وعندها القدرة توقف إسرائيل عند حدها لأن امن مصر القومي ممنوع الاقتراب والتصوير منه ومن أي جهة واللي حفظت حدودها الغربية والجنوبية في وقت الشدة قادرة تحمي حدودها مع أي طرف.
