مفاجآت صادمة في فضيحة فساد التموين.. سقوط متهمين جدد من الحجم الكبير في الجيزة والمحافظات وشركات السكر

 
افرم ياسيسي .. دا شعار المصريين دلوقتي بعد سقوط شبكة فساد وزارة التموين واللي كشفته التحقيقات والقبض على مستشار الوزير ومعاه 8 متهمين من أصحاب المصالح والمصانع والمفاجأة سقوط متهمين جدد النهاردة من الأسماء التقيلة.. مين الناس دي وايه اخر تطورات القضية وايه اللي هتكشفه الأيام الجاية في التحقيقات واللي بقت في ايدين نيابة أمن الدولة وتأثيرها على الأسواق والاسعار في الفترة الجاية
 

مفيش حديث في مصر دلوقتي غير على سقوك حيتان الفساد في عزبة وزارة التموين وهي الجهة المسؤولة عن تموين الغلابة وعن الأسواق والأسعار وتوفير السلع للناس ودا بعد القبض على مستشار الوزير للرقابة والتوزيع ومتهمين كتير معاه واللي كونوا مع نفسهم شبكة مصالح للمتاجرة في السلع وحجبها عن الأسواق وبيعها بأسعار خيالية طول الفترة اللي فاتت وحققوا طبعا ثروات بالملايين.

الجديد في القضية المتهم فيها مستشار الوزير وهو كان قائد التشكيل العصابي بحكم منصبه ونفوذه ومعاه أصحاب المصانع اللي بتتعامل مع الوزارة إن فيه مسؤولين ومتهمين جدد سقطوا في يد الأمن في الساعات الأخيرة بعد مداهمة مكتب مستشار وزير التموين وحسب المعلومات تم القبض على مسؤولين في تموين الجيزة والمنيا وبعض المحافظات التانية وكمان مسؤول كبير في شركة الدلتا للسكر  وكشفت التحقيقات أن المتهمين كلهم كانوا ضمن شبكة للتلاعب في الأسواق وحجب السلع عن المواطنين ورفع اسعارها وعن طريق تقديم رشاوى ضخمة للمسؤولين في الوزارة.

وحسب المعلومات بردوا لسه عمليات التحري والتحقيق شغالة للوصول لمتهمين جدد من خلال اعترافات المقبوض عليهم والظاهر كده القضية هتكون قضية الموسم واكبر قضية فساد في السنين الأخيرة وإن الدولة مش هتسيب اي حد استغل منصبه أو شارك في التربح من قوت الغلابة وواضح كده فيه تعليمات من أكبر قيادة في البلد بالقبض على اي مسؤول مهما كان اسمه وتقديمه للعدالة ومفيش حد فوق القانون والمحاسبة وكله هيجي قدام أمن الدولة.

مفيش شك أن التطورات الأخيرة هتنعكس بالايجاب على الأسواق والأسعار الفترة الجاية بعد سقوط عصابات التموين والتجارة الكبار اللي كانوا مانعين السلع توصل للناس وغيرهم هيخاف يخزن كيلو سكر واحد بعد كشف  المستور وسقوط الكبار ودي رسالة إن الدولة عمرها ما هتتستر على فساد مهما كان حجمه وكله هيتحاسب من أول الوزير حتى لو مكانش متورط لكن عليه مسؤولية رقابية هو قصر فيها.