مهمة سامانثا الخطيرة.. سر زيارة أمريكية للعريش في توقيت مريب

مصر استقبلت مسئولة أمريكية رفيعة المستوى الساعات اللي فاتت والمسئولة دي أصرت تزور سيناء تحديدا لهدف في نفس يعقوب.. ياترى الإدارة الأمريكية بعتتها ليه تروح سيناء وإيه سبب الزيارة وسر توقيتها.

الوكالة الأمريكية للتنمية الدولية أعلنت في خبر عاجل نشرته رويترز إن رئيسة الوكالة سامانثا باور وصلت إلى سيناء المصرية النهاردة التلات.. وعن سبب الزيارة قالت إنها جاية مصر عشان تعلن عن مساعدات إضافية تتجاوز قيمتها 21 مليون دولار للشعب الفلسطيني.

المسئولة الأمريكية وصلت إلى العريش ومعاها 36 ألف رطل من المساعدات الغذائية والإمدادات الطبية نقلتها وزارة الدفاع الأمريكية جوا من الأردن وتتجه إلى غزة. وإنها هتعلن عن مزيد من الإمدادات الصحية والمأوى والغذاء وغيرها من المساعدات لسكان غزة والضفة الغربية المتضررين من الصراع الإسرائيلي الفلسطيني.

كمان المنحة الأمريكية هتقدم الرعاية النفسية والاجتماعية والخدمات الصحية الحيوية إلى جانب إنشاء مستشفى ميداني تديره المنظمات غير الحكومية في غزة والذي سيوفر الرعاية للمرضى المقيمين.
لغاية هنا خلص الكلام الرسمي لكن أكيد فيه ابعاد تانية للزيارة خاصة لو كان الزاير أمريكي أو من الدول اللي بتدعم إسرائيل على دول الخط لأنها زيارة لمنطقة حساسة جدا بالنسبة للدولة المصرية ولكل المصريين وسيناء طول عمرها خط أحمر وكلنا عارفين باللي بيدور في الغرف المغلقة عن ملف التهجير الكلي أو الجزئي للفلسطنيين وطردهم لسيناء عشان تخلص من صداع حماس وتصدر لينا المشكلة عشان كده الدولة المصرية حساسة جدا ناحية زيارات الأجانب في مصر.
عامة الست الأمريكية جاية زيارة بتقول إنها إغاثية وأكيد معاها وفد كبير أو مساعد ومش مستبعد يكون فيهم حد جاي يعاين الموقف على الأرض عشان يعرضه على الجهات اللي شغال فيها، ودي فرصة بردو عشان تشوف الدولة المصرية بتحمي سيناء ازاي وتشوف حجم الاستعدادات لحماية أرض الفيروز وإزاي حدودنا جحيم على أي حد يفكر بس إنه يقرب وعلى عينك يا أمريكاني.

طبعا في الفترة الأخيرة مصر استقبلت مئات المسئولين من كل دول العالم وكتير منهم راحوا رفح وعملوا كمان مؤتمرات صحفية من قدام بوابة المعبر ودي رسالة إن مصر تقدر تحمي حدودها وأي ضيف يجي عندها حتى لو كان على خط النار.