يا ترى ضيعنا فلوس البلد في مشروع العاصمة الإدارية.. تهمة القرن

ناس مش متخصصة في الاقتصاد ولا تفقه عنه شئ بتردد كلام من نوعية أننا ضيعنا فلوس البلد   في مشاريع غير منتجة.. وطبعا في صدارة المشاريع اللي بنتهمها بالكلام دا هو مشروع العاصمة الإدارية الجديدة.

طيب يا ترى الكلام دا صحته اية.. وهل فعلا فلوس البلد ضاعت في مشروع العاصمة الإدارية الجديدة.

طيب ما تيجي نشوف.

الفترة الأخيرة مع توالي الأزمات العالمية.. وتخفيض قيمة الجنيه ورفع الفائدة، أصبح المناخ العام مناسب جدا لترديد ونشر أي كلام فاضي بغض النظر عن مدى صحته أو مصداقيته او منطقيته، من ضمن الكلام دة هو: كفاية نضيع فلوسنا في مشاريع غير منتجة.

ولما تحاول تفهم من الطرف الآخر هو يقصد ايه بمشاريع "غير منتجة" وايه مفهومه لكلمة "منتجة"، يقولك الخرسانة والطرق والعاصمة والمدن والإسكان والنقل، اي حاجة فيها طوب وخرسانة وحديد واسفلت واسمنت تبقي "غير منتجة".

تيجي تسأله طب هو ايه المشاريع المنتجة في نظرك؟

يقولك يعني لازم نغير أولوياتنا للصناعة والزراعة يعني نعمل مزارع ومصانع وكدة..

وطبعا مشروع العاصمة الإدارية في صدارة المشاريع المتهمة بأنها مالهاش لازمة.

طيب مشروع العاصمة لو جيب  بصيت في نتائجة ومكاسبه، هاتلاقي أن دة مشروع بيوفر فرص عمل بحجم سكان دولة زي لبنان، بيشتغل فيه 60 مطور عقاري، مبيعات الأراضي من المرحلة الأولى فقط كانت 300 مليار جنيه، ودة اللى سمح للمشروع أنه يصرف على نفسه بدون ما يكون عبء على الموازنة العامة وكمان يورد فائض للخزانة من دفع الضرايب على أرباحه، هل تعرف المعلومة دي: شركة العاصمة الادارية دخلت قائمة أكبر 20 ممول للضرائب آخر 4 سنين.

كمان حجم الإنشاءات الضخم اللى في المشروع زي الحي الحكومي وحي الأعمال والأحياء السكنية والطرق الداخلية وشبكة البنية التحتية بتجيب بضاعة ومواد خام حديد واسمنت وطوب وغيره من مصانعنا المحلية، المصانع دي بتخدم على الشركات اللى بتشتغل في المشروع، الشركات دي بتكسب وبتدفع ضرايب للبلد وبتشغل ناس وبتدفع مرتبات.

المشروع ضخم ومؤثر لدرجة أن وكالة "فيتش" وصفته في أحد تقاريرها أن "مشروع العاصمة الجديدة يمثل محرك جديد للنمو الإقتصادي لمصر".

كمان الكلام حولين خلو المشاريع من مشاريع منتتجة دا كلام مش صحيح.

لأن  الدولة كيان كبير، فيه وزارات وجهات متعددة التخصصات، وكلهم يقدروا يشتغلوا في نفس الوقت بالتوازي، يعني مثلا هيئة التنمية الصناعية بتطرح أراضي للمصنعين، في نفس الوقت جهاز الخدمة الوطنية بيعمل صوب زراعية بالشراكة مع وزارة الزراعة، في نفس الوقت مركز البحوث الزراعية بينجح انه يستنبط بذرة جديدة بتخلي محصول الفول يتضاعف 4 مرات، في نفس الوقت هيئة الأبنية التعليمية بتعلن عن الإنتهاء من 300 مدرسة...إلخ، فإذن الدولة قادرة أنها تشتغل في كل القطاعات في نفس الوقت ودة اللى بيحصل من 2014.

كمان لازم تعرف أن حكومات حسني مبارك كانت بطيئة ومتراخية وفاسدة لدرجة أوهمت الناس و زرعت في عقلهم الجمعي أن الحكومة مستحيل تكون لديها القدرة على انها تشتغل بالسرعة دي والكفاءة دي وكل القطاعات بالتوازي مع بعض، فالناس مش مصدقة.

كمان مشروعات النقل والإسكان+التشييد والبناء+البنية التحتية، مينفعش تقول عليها مشاريع غير منتجة، لو انت متخصص وبتقول كدة ف صدقني دي جريمة، اما لو انت مش فاهم فعادي حقك تفهم وتسأل وتبحث.

ياريت نفهم قبل ما نتكلم