مين مسئول عن وقف ارتفاع الاسعار؟
النهاردة كلامنا في الصميم.. هانعرف مين المصدر الأول والأهم في مسألة ارتفاع الأسعار.. وأية علاقة رفع نسبة الفايدة بارتفاع الأسعار.. وامتى أسعار المنتجات هاتقل.
الأسعار في مصر زادت كتير الفترة اللي فاتت.. ودا كان ناتج من عدة عوامل هانشير ليها في كلامنا.
أولا ماتستبعدش تأثير ارتفاع نسب الفايدة بمسألة ارتفاع الأسعار والحكومة كانت بتضطر ل رفع أسعار الفايدة بسبب ارتفاع التضخم واللي بدوره نتاج ارتفاع الأسعار عالميا.
وبالمناسبة ارتفاع أسعار الفايدة مالوش علاقة بتخفيض قيمة الجنيه.. وحدوثهم بالتزامن مع بعض مرات عدة فاتت مش معناه انهم مرتبطين ببعض، اللى حصل هو تصحيح لسعر الجنيه عشان يبقي متواكب مع التغيرات الجديدة اللى حصلت في العالم، لكن مش كل مرة نرفع فيها الفايدة لازم الجنيه ينزل، مش ضروري، ولو هبط هيكون لسبب آخر زي إرتفاع مفاجئ في الإحتياجات الدولارية أو إنخفاض مفاجئ في الموارد الدولارية لفترة من الوقت، والعكس صحيح لو إرتفع.
السؤال هنا.. لية ما تمش رفع نسبة الفائدة في الاجتماع الأخير لاجتماع لجنة السياسات النقدية..
السبب يا فندم أن سعر الفايدة لوحده مش كفاية، والتضخم في مصر تضخم مستورد من الخارج وتضخم ناتج عن ارتفاع التكاليف، ودي تكاليف خارجة عن إرادتنا، يعني صعب جدا ان سعر الفايدة ينجح في كبحه.
السؤال الأهم.. مين مسئول عن كبح ارتفاع الاسعار؟
البنك المركزي لوحده ميقدرش ينجح في دة، الحكومة عليها دور كبير وكمان القطاع الخاص ومؤسسات العمل الخيري، وزارات التموين والتجارة والداخلية والزراعة والمالية.
وبشكل عام قرار المركزي في آخر اجتماع له بعدم رفع نسبة الفائدة لأن الدولة حريصة على عدم رفع الأسعار اكتر من كدا.
خاصة أن مع رفع نسبة الفائدة القروض بتبقي أغلى مما سبق، بالتالي المقترضين (أفراد وشركات) هيضايقوا... وبالتالي أسعار السلع تزيد.
