أوروبا تعفي مصر من الديون.. و2024 وش السعد

متابعينا الكرام على منصات بانكير أهلا وسهلا بكم ولايف جديد وأهم التقارير اللي قدمتها وحدة أبحاث بانكير على مدار الساعة النهاردة الأربعاء 29 نوفمبر 2023..

والحقيقة عندنا أكتر من قراءة وتحليل مهم عن الوضع الاقتصادي والجديد في الأسواق والبداية مع تقرير عن خريف الدولار أو موسم سقوط العملة الأمريكية بعد شهور من التوحش أمام الجنيه.

والتقرير تناول مستقبل العملة الأمريكية في المنطقة وإنها كلها شهور قليلة والدولار هيفقد هيمنته وسيطرته على التعاملات التجارية في كتير من الدول العربية وكمان بعض دول قارة أفريقيا.. وكمان الاعتماد على الدولار هيتراجع بصورة ملحوظة خلال الفترة الجاية سواء في تنفيذ عمليات البيع والشراء أو حتى في حجم الاحتياطات النقدية في كتير من الدول..

اللي حصل إن بعد العقوبات المالية على روسيا واستخدام الدولار كسلاح في الحرب الباردة واستبعاد موسكو من نظام سويفت العالمي اللى بيربط البنوك المركزية في العالم ببعض والخروج منه يعنى انك ما تقدرش كدولة تدفع ولا تستقبل اى فلوس يعنى شلل مالى تام.

وده اللى خلى قوى عالمية كبرى زي الصين وروسيا يقودوا رأي عام عالمي للتخلي عن التعامل بالدولار في المعاملات التجارية مع تقليل الاعتماد على العملة الأمريكية بصورة واضحة في الاحتياطي التنقدي للبنوك المركزية وشوفنا وسمعنا طول السنة اللى فاتت عن اتفاقيات مهمة وكبيرة لتبادل العملات المحلية.

واللي يهمنا إن فيه دول عربية زي مصر والسعودية والامارات دخلوا في اللعبة دي ووقعوا اتفاقيات مبادلة عملات سواء مع بعضهم او حتى مع دول تانية.. زي ما حصل بين الإمارات والصين وبين السعودية والصين بردوا.

ومن فترة قريبة وقع المركزي المصري ونظيره الاماراتي اتفاقية ثنائية لمبادلة العملة هتتيح للطرفين مقايضة الجنيه المصري والدرهم الإماراتي بقيمة اسمية تصل إلى 42 مليار جنيه مصري و5 مليار درهم إماراتي. وكمان السعودية وافقت على  سداد جزء من عمليات التبادل التجاري مع مصر  بالعملات المحلية.

التقرير التالي النهاردة على منصات بانكير بخصوص بديل التعويم والحكومة هتوفر الدولار أزاي.  

رسميا وعلى لسان رئيس لجنة الموازنة في مجلس النواب مفيش تعويم زي ماقلنا كده في بانكير وهنا فيه سؤال مهم جدا بيطرح نفسه وهو إيه البديل وهنعمل إيه مع صندوق النقد الدولي واللي شرطه الأساسي عشان يصرف بقية القرض تحرير سعر الجنيه..

طبعا الحكومة بتدير أزمة الدولار من خلال المؤشرات واللي بتقول إن خطوة التعويم مابقتش ضرورية ومفيش تحرير الجنيه تاني حتى بعد الانتخابات الرئاسية.. ودا لأن التعويم كان مرتبط اساسا بشروط صندوق النقد الدولي عشان يصرف القرض والحكومة كانت محتاجة القرض عشان تسد جزء من الفجوة الدولارية لانه كانت مصر هتستقبل مبالغ تانية من مؤسسات تمويل دولية لو تم الاتفاق مع صندوق النقد ودخلت الحكومة في مفاوضات شاقة مع الصندوق لكن بدون نتيجة .. اللي اتغير أن الدولة قدرت تفرمل الدولار على المستوى الرسمي ووفرته في البنوك والمستوردين ورجال الأعمال ولفاتورة الاستيراد واحتياجات الدولة وسابت السوق السودا للدولار تطحن مع نفسها وترفع في أسعار الدولار والطمع كان بيحركها.

طيب الحكومة والمركزي جابوا الدولار منين.. من حسن الحظ أن موارد الدولار الطبيعية قفزت وحققت ارقام لاول مرة ومثلا حققت قناة السويس 10 مليار و350 مليون دولار لاول مرة في تاريخها وقفزت إيرادات السياحة لـ 14 مليار دولار بزيادة 4 مليار دولار عن السنة اللي قبلها وغيرها من الموارد وبلغ إجمالي إيرادات مصر من النقد الأجنبي 99.0 مليار دولار ولسه الأرقام بتزيد وقدام كده صندوق النقد مش قدامه حل غير يصرف القرض ويتنازل عن شرط التعويم

التقرير التالي معانا وهو مهم جدا وناس كتير بتبعت تسأل عن ماكينة ال ATM اللي بتطلع دهب وعن تفاصيل أول تجربة لبيع الذهب إلكترونيا

ببساطة ماكينة ال ATM زيها زي أي مكنة بنك بتطلع فلوس في الشارع وكل الفرق إنها هتطلعلك دهب بدل الفلوس.. يعني تقدر تشتري سبيكة وأنت واقف مكانك.

أخيرا مصر أطلقت أول ماكينة ATM لبيع سبايك الدهب، واللي تم على هامش معرض نبيو الثالث للدهب والمجوهرات، ودا بعد ما شهد وزير التموين والتجارة الداخلية، الدكتور علي مصيلحي، إطلاق تلك الماكينة، في خطوة داعمة للتحول الرقمي بالبلاد.

وبالمناسبة المعرض الدولى للدهب والمجوهرات «نبيو»، يقام في مصر في نسخته الثالثة، في أرض المعارض بالتجمع الخامس واللي بيتم خلالها عرض تصميمات المجوهرات للمحليين بغرض ضخ دماء جديدة من المصممين المصريين في الأسواق.

المهم أن تجربة ماكينة ال ATM اللي هاتبيع الدهب دي تعتبر تجربة مختلفة للعملاء، لأنها بتيح للمواطنين حصولهم على سبايك جهبية من خلال إيداع قيمة السبيكة.

وكمان في الماكينة تقدر تختار أحجام مختلفة بدءًا من جرام واحد كحد أدنى، ويتم تحديث الأسعار فيها على مدار الساعة.

ووفقا لتصريحات وزير التموين فالتجربة دي من المقرر أن يتم تعميمها في مناطق أخرى، وطبعا هتكون تحت الحراسة المشددة.

بالمناسبة التكنولوجيا دي موجودة في عدد من دول حول العالم واللي بدأت من حوالي 10 سنين و تطبيقها هيساهم في  تعزيز وتطوير القطاع.. واهم ميزة فيها إنك هتشتري دهب مضمون ومن غير مخاطرة ولا غش.
منصات بانكير عرضت تقرير مهم بخصوص خبر سار جدا للمصريين وهو خاص بديون مصر المستحقة لدول الاتحاد الأوربي..

طبعا العالم كله عرف قيمة ومكانة مصر من بعد يوم 7 اكتوبر والكل أدرك أهمية الدور اللى بتلعبوا القاهرة فى حفظ الأمن والآمان فى منطقة الشرق الأوسط ومن بعد العدوان الاسرائيلي على غزة زار مصر فى الشهر والنص الأخير عدد كبير جدا من القادة السياسيين فى اوروبا واسيا وامريكا وكلهم عرفوا مدى الثقل اللى بتتمتع بيه مصر وأعلن الاتحاد الاوربي عن برامج تمويل للحكومة المصرية بقيمة 10 مليار دولار.

وامبارح كريستيان برجر سفير الاتحاد الأوروبي لدى مصر زف بشرى سارة للمصريين وأكد ان فيه مناقشات بتتم بشأن جدولة ديون مصر وإعادة النظر في أعباء ديون الاتحاد الأوروبي لدى مصر وان المناقشات دي ممكن تنتهى قريب جدا بشكل يحقق الاستفادة لمصر ويرفع عن كاهل الحكومة عبء الديون المتراكمة بقالها سنين طويلة 
سفير الاتحاد الأوروبي قال ان قابل الرئيس السيسي وكان فيه مناقشات حول الاتفاق بشأن الخطوات اللازمة لفتح ملف ديون مصر لدول اوربا وازاى ممكن يتم حل الملف ده بشكل يساعد الحكومة المصرية على حل أزمة الفجوة التمويلية.. وأكد ان الاتحاد الاوروبي عارف كويس جدا العبء اللي بيثقل كاهل مصر بسبب الديون وان فيه أفكار كتيرة  لتقليل آثارها وتداعياتها وهيكون للاتحاد الأوروبي طرق فعالة لتقليل أضرار الديون علي مصر.

وحدة أبحاث بانكير قدمت تقرير مهم جدا عن توقعات مؤسسة دولية لدور مصر واقتصادها في 2024 وإزاي الرئيس السيسي هيستمر في قيادة مصر للتخلص من أزمة الدولار وزيادة معدل النمو..

صندوق النقد العربي.. ودي منظمة عربية إقليمية، عريقة وبتعمل تحت مظلة جامعة الدول العربية ومقره في أبو ظبي، المهم الصندوق توقع تحسن الظروف الاقتصادية العالمية خلال  2024 .. وتحديدًا الدول العربية اللي متوقع تسجل معدل نمو 3.3 في المئة، والتحسن دا وفقًا للتحليلات بيرجع لتعافي النمو العالمي وتراجع تشديد السياسة النقدية.

الصندوق توقع كمان ارتفاع معدل نمو اقتصاد مصر خلال السنة الجاية إلى 4.1 في المئة.. ودا في وقت تزايد تنافسية الصادرات المصرية بالإضافة لـ انخفاض سعر الجنيه المصري، وكمان النمو الواضح والمتوقع في قطاع الخدمات وقطاع الإنشاءات زائد ارتفاع عوائد قناة السويس مع عودة حركة التجارة العالمية.

وخلينا نقول لحضراتكم إن العوامل اللي ذكرناها بشأن احتمالية نمو اقتصاد مصر في 2024.. مدعومة كمان بجهود الدولة للتخلص من أزمة الدولار.. واللي بيشرف عليها الرئيس السيسي شخصيًا .. خاصة إنه وجه بضرورة زيادة الاستثمار.. ودا نقدر نترجمه في عدد من الإجراءات زي الرخصة الذهبية اللي بتدي الحق للمستثمر إنه يعمل مشروعه من شباك واحد وهو مجلس الوزراء.. يعني نسف كل المحطات البيروقراطية القديمة.

يعني نقدر نقول إن أغلب التحليلات بتشير إلى أن معدل النمو الاقتصادي في مصر هايزيد بشكل كبير في 2024..