حملة جديدة على الرئيس السيسي.. ازاي يبقي اقتصاد مصر الأول في أفريقيا
إيه سر الحملة الجديدة اللي بيشنها إعلام الإخوان والمنصات الفتنة على الدولة المصرية وعلى الرئيس السيسي واشمعنا في التوقيت دا بالذات وايه المقصود بيها وليه تركيا لسه طالقة الإعلام المأجور على مصر
هجوم إعلام الإخوان والمطاريد خاصة الهاربين لتركيا مش جديد لكن اليومين دول الحملة زادت أووي على الرىئيس السيسي والدولة بشكل عام والملاحظ إن الحملة زادت وتيرتها بعد موقف مصر البطولي من أحداث غزة ووقفة الرىئيس السيسي في وش اسرائيل وفرض إرادته ووقف إطلاق النار وإدخال المساعدات وتمديد الهدنة وإخراج المرضى وتحرير الأسري الأجانب وصفقة السجناء وكمان مع تصدر الاقتصاد المصري كل اقتصاديات افريقيا وبقي رقم واحد في القارة متفوقاً على نيجيريا اللي احتلت المركز الاول من 12 سنة.
طبعا الموضوع مش محتاج تفسير لأن الإعلام العميل بينشط مع كل نجاح مصري سواء داخلياً أو خارجيا وازاي يعني الرئيس السيسي يبقي بكل المشهد في المنطقة والعالم كله بيتابع أخباره وكل رؤساء وملوك العالم من أول بايدن لغاية المجر بتشكره وازاي يبقي زعيم المنطقة بلامنازع وازاي بردوا ينجح رغم ظروف البلد الصعبة والاقتصاد المصري يبقي رقم واحد في القارة الأفريقية واحنا على بعد خطوات من انتخابات الرئاسة وشعبية السيسي ارتفعت الذروة.. طبعا دا كله معناه وفاة مشروع التحريض على الدولة المصرية واللي تنظيم الإخوان المحظور صرف ملايين الدولارات عشان يشوه كل الانجازات ودا معناه إن عناصر الاعلام في الإخوان أو الاعلام المعادي بشكل عام هتفقد وظايفها بعد مافشلت في تحريك الشارع.
الإعلامي المأجور محمد ناصر كان واحد من الإعلاميين اللي بيحاول ينقذ لقمة عيشه قبل تسريحه وشن هجوم على الرىئيس السيسي كعادته لكن زي كل مرة محدش شافه ومش لاقي حاجة تانية يقولها قدام التأييد الكاسح من المصريين للسيسي.. وهنا السؤال ليه تركيا سايبة اعلام الاخوان يهاجم مصر رغم تحسن العلاقات بشكل كبير بين البلدين ولسه أردوغان مصرح إنه هيزور مصر قريب جدا ولسه مقابل الرىئيس السيسي في السعودية على هامش قمة غزة وكان اللقاء ودي جدا.. التفسير الوحيد هو إن تركيا هتتخذ إجراءات ضد اعلام الفتنة قريب جدا ومع قرب زيارة أردوغان للقاهرة عشان مش من المنطقي يزور مصر لاول مرة بعد وصول السيسي للرئاسة وبسبب وراه شوكة بتهدد بفشل زيارته ومش هيضحي بكل التطور في العلاقات بين البلدين خاصة في مجال الاقتصاد والاتفاقات الضخمة بين البلدين والتعاون عشان اعلام بيهري ليل نهار وبيروج لاكاذيب وفتن.
