حل عبقري لأزمة نقص الدولار.. الحكومة فاقت وهتعمل عظمة

 
قولنا لحضراتكم قبل كده كتير ان الشغل الشاغل للحكومة في الفترة الأخيرة هو حل أزمة نقص العملة الأجنبية والقضاء على السوق السودا للدولار وفعلا الحكومة بدأت تشتغل صح وتطلق مبادرات وأفكار خارج الصندوق عشان تحل أزمة الدولار وتوفر سيولة من لانقد الأجنبي بعيد ع المصادر التقليدية يعنى جنب السياحة والصادرات وقناة السويس تدور على مصادر تانية لجذب العملة الأجنبية زي مثلا مبادرة سيارات المصريين في الخارج اللى من خلالها يقدر اى مصري مقيم في لاخارج انه يدخل مصر سيارة بدون جمارك ولا رسوم مقاب وديعة دولارية تتحط في حساب وزراة المالية لمدة 5 سنين وكمان مبادرة تسوية الموقف التجنيدي للمغتربين مقابل سداد مبلغ 5 الاف دولار.. ومؤخرا الحكومة وصلت لحل عبقري هيساهم في القضاء على أزمة شح العملة.. فيا ترى ايه الحل ده وممكن يدخل لمصر كام مليار دولار ؟ وايه فرص نجاحه واستمراره؟ 
 

مجلس الوزراء أعلن امبارح خبر في غاية الأهمية وهيكون ليه دور كبير جدا في توفير سيولة دولارية لمصر تمكنها من حل أزمة نقص العملة اللى بنعانى منها من مارس 2022 ولحد دلوقتي.. والخبر بيقول ان الحكومة بتدرس طرح وحدات عقارية بالدولار للمصريين في الخارج أو الأجانب بالتعاون مع شركات التطوير العقاري من القطاع الخاص.. ورئيس الوزراء مصطفى مدبولي استعرض بنفسه  مبادرة مقترحة "لتعزيز صادرات العقار" باعتباره أحد المصادر المهمة للنقد الأجنبي.
والمبادرة هتشمل وحدات تابعة للمطورين العقاريين بالقطاع الخاص وهيتم تقديم عدد من المحفزات تسهم في نجاح المبادرة، خصوصا ان الحكومة بتعول كتير جدا على المبادرة دي في جمع حوالى 10 مليار دولار خلال الفترة الجاية.. وده رقم لو اتحقق هيعمل طفرة في السولة الدولارية وهيزود الاحتياطي النقدي لمصر وهيساهم في زيادة المعروض من العملة الأجنبية وكلنا عارفين ان الدولار بقا سلعة زي كتير من السلع لما بيزيد المعروض السعر بيقل والعكس صحيح لما بيقل المعروض زي ما حاصل دلوقتى سعر العملة الأمريكية في السوق السودا بيوصل لمستويات تاريخية. 
والى جانب توفير سيولة دولارية ضخمة المبادرة دي هيكون ليها تاثير كبير على جوانب اقتصادية تانية ومن المتوقع انها تحقق طفرة كبيرة في أداء البورصة المصرية وتساهم كمان في سرعة نمو مشروعات العاصمة الإدارية الجديدة وغيرها من المدن الجديدة وتقوية وتحفيز الطلب على العقارات المحلية.. خصوصا ان العقارات في مصر وتحديدا في مناطق زي الساحل الشمالى والعلمين والعاصمة الادراية وبعض المشروعات في شرق وغرب القاهرة بتحظى باقبال كبير جدا من العرب والمصريين المقيمين في الخارج اللى بيدوروا على مستوى رفاهية كبير في السكن. 
وعشان تعرف أهمية مبادرة زي دي كفاية تعرف ان سوق تصدير العقار على مستوى العالم بيتم فيه تداول 300 مليار دولار سنويا نصهم صناديق عقارية والنص التاني أفراد أو صغار المستثمرين.. تخيل 300 مليار دولار سنويا مصر مكنتش طول السنين اللى فاتت بتحاول تحصل على اى حصة منهم وعشان كده متوقع بشكل كبير ان مبادرة تصدير العقار تشهل اقبال منقطع النظير خصوصا كمان ان في البداية هيكون فيه تسهيلات كبيرة جدا وحوافز للمستثمرين الراغبين في المشاركة في المبادرة.