السيسي معلم.. حطم أحلام نتنياهو بقرار اتأخر 50 سنة

 

السيسي حرفيا بقي كابوس اسرائيل والخطر اللي ييهدد أحلامها ووجودها كدولة ولولا وقفته الجريئة في الأحداث الأخيرة كانت غزة اتشالت من الوجود والفلسطينيين ماتوا من العطش والجوع والأمراض.. حاليا فيه رعب وصدمة حقيقية في اسرائيل وحكومتها وحلفائها في امريكا والغرب بسبب تصريح الرىئيس السيسي الآخير في استاد القاهرة.. ايه اللي حصل وايه اللي قاله السيسي وليه اسرائيل مصدومة وسر القرار اللي اتاخر 50 سنة وازاي السيسي زنق أوروبا وامريكا في الزاوية الضيقة

كل مصر والعالم شاف تصريحات الرئيس السيسي خلال مؤتمر صحفي مشترك بالقاهرة، مع رئيس الوزراء الإسباني بيدرو سانتشيز ورئيس الوزراء البلجيكي ألكسندر دي كرو وقبلها في ستاد القاهرة إن كل الشعب المصري ناصر وساهم في نصرة القضية الفلسطينية ووضع الرئيس في تصريحاته خطوط حمرا جديدة لإسرائيل بخصوص مؤامرة التهجير وتصفية القضية الفلسطينية والكلام كان واضح وصريح ومفهوش لبس والرسالة وصلت.

لكن كلام الرئيس السيسي عن التهجير مش هو اللي رعب اسرائيل لأن اسرائيل عارفة ومتأكدة أنها مستحيل تعمل كده في ظل الرفض المصري القاطع للتجهير ومع التضامن الشعبي المصري الرهيب مع الفلسطينيين وكمان عارفة خطورة اس استفزاز للجيش المصري دلوقتي هتكون نتائجه ازاي.. لكن فيه تصريح تاني مهم للرئيس السيسي طير النوم من عيون نتيناهو والإسرائيليين وأصدقائهم ونرجع نفكركم بالرئيس قال ايه.  "مسار حل الدولتين فكرة استنفدت وآن الأوان بالمجتمع الدولي الاعتراف  بالدولة الفلسطينية وإدخالها الأمم المتحدة"... دي كانت قنبلة السيسي اللي هزت اسرائيل..

طيب حد يسأل ليه التصريح دا خطير جدا.. شوف حضرتك اسرائيل من ساعة قيامها في الاربيعنيات وهي بتقاوم فكرة وجود دولة للفلسطينيين معترف بها من الأمم المتحدة وليها سفارات وعندها سفارات ودا لأنها طمعانة في كل الأراضي الفلسطينية والجولان السوري وكمان كان في المخطط جنوب لبنان ومعندهاش نية خالص أنها تدي اي ارض للفلطسنين يعملوا عليها دولة وعشان كده دايما بيرهبوا الفلسطينيين بالعنف والقتل والاعتقال والحصار عشان يجبروا أكبر عدد ممكن منهم للهجرة خارج فلسطين.. وحتي المفاوضات اللي دخلتها اسرائيل من سنين طويلة مع الفلسطينيين بضغط دولي كان الهدف منها المماطلة وعدم حصول الفلسطينيين على دولتهم ويفضل حل الدولتين شعار سياسي بيظهر قي في الأزمات وبعدين يختفي لكن الرئيس السيسي في تصريحاته الأخيرة قفز فوق كل الحلول والثوابت واعاد الكرة في ملعب العالم وقال طالما حل الدولتين مات اكلنيكيا يبقي العالم يعترف بدولة فلسطين مباشرة وتبقي عضو في الأمم المتحدة ودي معناه نهاية كل خطط اسرائيل لدفن القضية الفلسطينية وإن السيسي ألهم العالم بفكرة تانية وغير تقليدية لإقامة الدولة الفلسطينية نتيناهو مكانش عامل حسابه عليها

يعني تخيل حضرتك لو بكرة الجمعية العامة للأمم المتحدة عملت تصويت على الاعتراف بدولة فلسطين وانضمامها كعضو كامل ايه اللي هيحصل .. طبعا هتكون دولة معترف بيها وعضو كامل الأمم المتحدة مطالبة بالدفاع عنه لغاية ما تاخد حقوقها.. والسيسي عشان يقطع الطريق على الإسرائيليين لمعارضة الفكرة قال إن الدولة الفلسطينية الجديدة المستقلة هتكون منزوعة السلاح وكمان هيكون فيه قوات دولية بينهم عشان محدش يعتدي على التاني.. ومن ساعة تصريحات السيسي وإسرائيل زي المخبوطة على دماغها مش عارفة تعمل ايه.. لكن السياسيين في العالم بدأو يفكروا في دعوة السيسي وممكن نشوف تحرك دولي قريب للاعتراف بدولة فلسطين المستقلة.