من يرفع أسعار السجائر على المواطنين؟؟ وأية حل ارتفاع سعرها؟

يا أخي سبحان الله.. بنلاقي الدهب متوفر في السوق.. ومابنلاقيش سجاير.. كيف المصريين راح فين؟؟ ولية أسعاره ارتفعت؟؟ يلا بينا نعرف الإجابة

في مواقف كتير ممكن تروح تسأل على علبة سجائر.. وماتلاقيهاش.. ولو لقيتها تلاقي سعرها زايد بتاع 20 جنيه.. دا أصلًا لو لقيتها زي ما قولنا.

وبالرغم من أن أغلب أنواع السجائر دلوقتي سعرها بقى مطبوع على العلبة لكن برضوا بتتباع بأعلى من السعر الرسمي.

أول سؤال هايجي على بالك.. السجائر مختفية لية.. ومين له مصلحة في اختفائها؟

وبدورنا سألنا عدد من أصحاب الأكشاك عن السبب.. واللي أكدوا أنهم مابيخزنوش سجائر علشان يبيعوا بأعلى من السعر العادل.. وأنهم بيروحوا لتجار الجملة مابيلاقوش الكمية المناسبة.. ولو لقوها فبتكون الأسعار عالية وبالتالي عند بيعها للمستهلة بتكون بسعر أعلى.

وحرفيا الفترة دي نادر لما تلاقي بعض أنواع السجائر الأجنبية مثل "إل إم" و"مارلبورو" و"ميريت" ودا بالرغم من بيعها في حالة وجودها بأسعار تتجاوز الأسعار الرسمية بأكثر من 30 في المئة.

وبرضوا السجائر المحلية، ارتفعت أسعارها في الأسواق بنحو 30 في المئة من أسعارها الرسمية.

الملاحظة الهامة اللي عرفناها هو إن التجار بيبيعوا منتجات السجائر بأسعار أعلى من الأسعار الرسمية في الأشهر الأخيرة.. ودا على خلفية النقص الحاد في الأسواق مع ارتفاع كلف الإنتاج وأزمة نقص العملات الأجنبية.

سألنا برضوا عن هل مسألة شراء شركة "جلوبال" الإماراتية" على حصة تبلغ 30 في المئة من أسهم "الشركة الشرقية للدخان"، في صفقة بقيمة 625 مليون دولار.

والكلام دا نفاه رئيس "الشركة الشرقية للدخان" هاني أمان بشكل قاطع.. وأكد أن"هذا كلام عارٍ تماماً من الصحة"، خاصة أن (الشركة الشرقية للدخان) لسه بتمتلك 20 في المئة من أسهم الشركة.

الاتهام سواء من البائعين أو المسئولين كان متجه للتجار.. حتى إن  رئيس "الشرقية للدخان" أكد أنه تم إبلاغالجهات الرسمية والرقابية بأسماء كبار تجار وموزعين الشركة لمراقبة أسعار البيع، دا بالاضافة إلى طبع أسعار السجائر على العبوات بواسطة باركود يمكن من خلال الهاتف المحمول معرفة السعر في الحال".

رئيس شعبة الدخان باتحاد الصناعات إبراهيم امبابي أكد أن الحل هو إعادة هيكلة نظام التوزيع من قبل الشركات المنتجة اللي عادة بتبيع السجائر لكبار الموزعين المسيطرين على السوق واللي بدورهم بيوزعوا على تجار الجملة.. وأكد أن التاجر الجشع هايتعمد إخفاء مخزونه من السجائر لرفع أسعارها، وزيادة هامش ربحه إلى أكثر من 50 في المئة عن الأسعار الرسمية.

الحل زي ما قال امبابي هو أن الجهات الرقابية، تضبط كميات ضخمة من السجائر المخزنة بغرض الاحتكار، ومن ثم  ضخها في الأسواق لزيادة المعروض وتقليل الطلب، مع ضرورة  توزيع كميات على صغار التجار والأكشاك والمحال الصغيرة.