فنكوش السوق السوداء.. ازاي دولار الموازية متوفر وبردوا سعره بيزيد

 

لو سألت اي حد ايه بيحصل في السوق السوداء هيقولك عشرين رأي، لكن هيقولك الدولار موجود بس سعره غالي ودي معادلة غريبة وغير منطقية.. طيب ايه اللي بيحصل وازاي السوق السوداء قلبت فنكوش واللي بيحصل فيها نصب في نصب ورزق الطامعين على الساذجين ومين اللي بيحبس الدولار عن التداول

طبيعي لما يكون السلعة متوفرة حتى لو في سوق غير شرعي زي السوق السوداء للدولار يبقي سعرها على الأقل يستقر أو ينزل طالما اللي بيحتاج دولار بيلاقيه بره البنوك لكن اللي بيحصل العكس الدولار على كلام المضاربين والتجار متوفر جدا في السوق السوداء وفي نفس الوقت فيه مضاربات عنيفة على سعره خلته يعدي خط الـ50 دولار..شوف حضرتك.. اللي بيحصل كالاتي فيه مجموعة من كبار المضاربين والتجار يسلموا أو يبلعوا اي دولار في السوق أو من اي حد عاوز. يشتري أو من المغتربين في الخارج زي الدوامة لما تبلع اي حاجة قدامها وبعدها بيخزنوا كميات كبيرة من الدولار نتيجة عمليات جمع العملة الأمريكية.

تيجي بعد كده المرحلة التانية والمضاربين دول يتحكموا في الأسعار زي ما هما عاوزين عشان متحكمين في المعروض ولأن السوق السوداء بتلم الخارجين على القانون والمهربين وتجار المنوعات ومستوردي السلع الترفيهية فطبيعي دول يكونوا اكتر زباين لتجار العملة الكبار والموضوع بيدخل في سكة غسل أموال قذرة أو مشبوهة وعاوزين يبدلوا الفلوس المصري الكتيرة اللي عندهم واللي هي اصلا حصيلة تجارة غير مشروعة بالدولارات واللي بيكون حجمها أقل وقيمتها اكبر وبكده وبعدها يخزنوه وبكده يبقوا هربوا من عيون مباحث الأموال العامة والمسؤولية لأن الدولار سهل جدا يستخبى وممكن في أي لحظة يرجع يعرضه في السوق السوداء ويكسب كمان وفي نفس الوقت المضاربين يكسبوا وبتلف الدائرة طول ما فيه نشاط مشبوه وتجارة حرام في حرام

كمان مش عاوزين ننسي إن الطلب على الدولار وراه أيادي خفية محدش عارفها في السوق ودي ليها هدف تاني خالص شرحناه قبل كده بالتفصيل وهو تعميق الأزمة لأقصى درجة ممكنة قبل انتخابات الرئاسة والناس دي مش بيهمها المكسب خالص وممكن تشتري الدولار بالخسارة كمان أهم حاجة عندها السوق يولع والدولار يفضل دائما أزمة عشان أسعار السلع تزيد والعيشة تصعب على المواطنين والحكومة تلاقي نفسها في موقف صعب جدا قدام الناس.

واحد من المتعاملين على الدولار في  السوق السودا للدولار اعترف لبانكير إن فعلت فيه عمليات سحب كبيرة للدولار من السوق مهما كان السعر غالي ومحدش عارف الدولار دا بيروح فين وليه مش بيراجع يتداول قي السوق ويستفاد من فرق الاسعار والمضاربة وقال كمان إن التجار بيشتروا الدولار بكميات كبيرة لكن مش بيرجعوا يبيعوه تاني وبيحتفظو بيه عشان يعطشوا السوق وعشان لو حصل تعويم يرجعوا الحياة تاني للسوق السوداء في اقرب أزمة تواجه الدولة بعد التعويم.