ارتباك شديد في السوق السودا للدولار.. ضربة السعودية خلت الفيران تدخل الجحور

يا ترى ايه اللى بيحصل فى السوق السودا للدولار فى الساعات الأخيرة؟ وليه سعر العملة الأمريكية بدأ يتراجع بقوة؟ وليه فيه ارتباك شديد بين المتعاملين؟ وايه دور السعودية فى اللي بيحصل فى سوق الدولار فى مصر؟ وهل كلام رئيس الحكومة من يومين هو اللى عمل الربكة ولا فيه حاجات تانية هتحصل؟ وليه اصلا سعر الدولار فى السوق السودا قفز قفزات جنونية فى الكام يوم اللى فاتوا؟

أكيد الناس اللى بتتعامل فى السوق السودا للدولار فى مصر لاحظت التراجع الكبير الللى حصل فى سعر الدولار خلال ال 48 ساعة الأخيرة وكفاية حضراتكم تعرفوا ان سعر العملة المريكية فى السوق الموازية خسرت 2 جنيه في يومين بس وبعد ما كان الدولار عدا مستويات ال 50 % رجع تانى الى حدود 48 جنيه.

وفى الكام ساعة اللى فاتوا سيطرت حالة من الارتباك على تعاملات السوق السوداء للدولار في مصر بعد سلسلة من الأنباء اللى بتبشر بانفراجة قريبة في السيولة الدولارية بفعل الدعم الخليجي والدولي

والانفراجة دي بدأت تحديدا من وقت اعلان دولة الكويت الشقيقة تمديد وديعة بقيمة 4 مليار دولار لدى البنك المركزي وكان للخبر ده تأثير قوي وسريع على المضاربة على الدولار وعلى تجار العملة اللى بدأوا ينسحبوا ويرجعوا خطوات للخلف خصوصا ان ضربة الكويت مكنتش الوحيدة لأن بعدها بساعات وخلال جولته التفقدية للمصانع في مدينة العاشر من رمضان أدلى رئيس الوزراء الدكتور مصطفى مدبولي بتصريحات مهمة وليها دلالة وقال ان أزمة العملة في عابرة وهنتهي قريب جداً.

ويمكن دي أول مرة رئيس الحكومة يتكلم عن موعد نهاية ازمة نقص العملة وطبعا رئيس الحكومة مش حد عادي ولا مجرد خبير اقتصادي بيقول ارقام او كلام فى الهوا .. ده المسئول الاول فى الحكومة واكيد تحت ايده بيانات وارقام واتفاقيات بتحصل هيكون ليها دور حقيقي فى انهاء أزمة الدولار.

اللافت جدا فى تصريحات رئيس الحكومة انه اتكلم عن مرحلة ما بعد نهاية ازمة الدولار وقال ان الهم هو الفترة اللى بعد كده وقال كمان إن الدرس اللي تعلمناه من الأزمات العالمية اللى فاتت هو أهمية امتلاك القدرة على الإنتاج والتصنيع المحلي.
ومن الضربات القوية اللى ادت الى ارتباك وااضح فى السوق السودا للدولاراعلان رئيس التمثيل التجاري المصري يحيى الواثق بالله إن وزير التجارة السعودي اتقدّم بمقترح لبحث إمكانية سداد جزء من عمليات التبادل التجاري بالعملات المحلية وتأكيده ان المقترح هيخضع لمباحثات بين البنكين المركزيين في البلدين.
وتوقع الواثق بالله الانتهاء من دراسات هذا المقترح قبل نهاية 2024 .. يعنى خلال سنة من دلوقتى على اقصى تقدير المعاملات التجارية بين مصر والسعودية هتكون بالجنيه والريال وهيتم التخلي بشكل نهائي عن التعامل بالدولار .. في ظل حرص البلدين على التحرر من قيود العملة الأمريكية
وطبعا لو اتفاق زي ده تم.. هيخفف جدا الضغط على الدولار وعلى الاحتياطي النقدي في البنك المركزي يعنى اى حاجة احنا بنشتريها من السعودية هندفع تمنها بالراله واى حاجة هما بيستوردوها مننا هيدفعوها بالجنيه وده هيقوي من قيمة الجنيه وهيقلل فاتورة الاستيراد بشكل كبير
وأكد وزير التجارة السعودي ماجد القصبي أن الوقت حان لتحقيق التكامل والتعاون مع مصر، وأوضح أهمية استكشاف الفرص فى الاقتصاد المصري بهدف تعزيز العلاقات الاقتصادية بين البلدين اللى توافقوا على تنظيم منتدى سعودي مصري لتسويق الفرص الاستثمارية في البلدين وده بيبشر بقدوم تدفقات دولارية جديدة ل مصر الفترة الجاية.
ومن الأخبار اللى كان ليها تاثير قوي جدا على السوق السودا للدولار اعلان مديرة صندوق النقد الدولي كريستالينا جورجيفا أن الصندوق بيدرس بجدية زيادة محتملة في برنامج القروض لمصر اللي بيبلغ 3 مليار دولار بسبب التحديات الاقتصادية اللى نتجت عن التوترات الجيوسياسية بالمنطقة.
وكانت فيه تقارير من أسابيع اتكلمت عن زيادة محتملة في قرض الصندوق المقدم إلى مصر من 3 إلى 5 مليار دولار
ومع الأخبار الايجابية من صندوق النقد فيه أخبار سارة تانية عن سعى الاتحاد الأوروبي لتعميق علاقته مع مصر بشكل يُسهم في التصدي لتداعيات التصعيد الحاصل على الحدود المصرية بفعل الحرب على غزة ووفقا للأخبار المتداولة الاتحاد الاوربي بيحاول يسرع  جهوده لدعم مصر في المرحلة الحرجة دي. .
وهتركز جهود الدعم على 6 أولويات تتنوع بين الاقتصاد والاستثمارات والهجرة والأمن وبيسعى الاتحاد الأوروبي لاستكشاف خياراته لمساعدة مصر في التعامل مع عبء ديونها المتراكمة مع دعمها بحوالى 10 مليار دولارهيتم توجيهها للاستثمار فى القطاعات الرقمية والطاقة والزراعة والنقل